ភ្នំពេញ៖ ក្រសួងអប់រំ យុវជន និងកីឡា បានប្រកាស​ឈ្មោះសិស្សពូកែ ៦០នាក់ នៅទូទាំងប្រទេស ក្នុងឆ្នាំ២០២២ នេះ ដែលជាសិស្សថ្នាក់ទី៩ និងថ្នាក់ទី១២ ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា នៃសាលាចំណេះទូទៅ។ សិស្សពូកែ ថ្នាក់ទី៩ ផ្នែកអក្សរសិល្ប៍ខ្មែរ មាន ១០នាក់ ពីលេខ១ ដល់លេខ១០ រីឯផ្នែកគណិតវិទ្យា ក៏មាន ១០នាក់ដែរ ហើយរូបវិទ្យា មាន ១០នាក់។ ចំណែក​សិស្សពូកែថ្នាក់ទី១២ ផ្នែកអក្សរសិល្ប៍ខ្មែរ ក៏មាន ១០នាក់ គណិតវិទ្យា ១០នាក់ និងរូបវិទ្យា មាន ១០នាក់ដូចគ្នា​។

ក្រសួងអប់រំ យុវជន និងកីឡា បានរៀបចំ​ការប្រឡង​សិស្សពូកែ ថ្នាក់ទី៩ និងថ្នាក់ទី១២ ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា នៃសាលារៀនចំណេះទូទៅ កាលពីថ្ងៃទី១៣ ខែមិថុនា ឆ្នាំ២០២២​។

សេចក្តីប្រកាស ក៏បានបង្ហាញថា​ សិស្សពូកែថ្នាក់ទី៩ និងថ្នាក់ទី១២ ដែលជាជ័យ​លាភីសិស្សពូកែទូទាំងប្រទេស ត្រូវបានរង្វាន់ និងការលើកទឹកចិត្តពីរាជរដ្ឋាភិបាល រួមមាន៖ ១-ប្រកាស​ស្តីពី​ការទទួល​ស្គាល់សិស្សពូកែទូទាំងប្រទេស ដោយរដ្ឋមន្ត្រីក្រសួងអប់រំ យុវជន និងកីឡា មួយច្បាប់ ២-មេដាយ​មួយគ្រឿង សម្រាប់បេក្ខជនជ័យ​លាភី ចំណាត់​ថ្នាក់លេខ១ ដល់លេខ៣ ៣-វិញ្ញាបនបត្រ​បញ្ជាក់សិស្សពូកែទូទាំងប្រទេស មួយច្បាប់ ៤-ប្រាក់រង្វាន់​តាមចំណាត់ថ្នាក់ ដោយលេខ១ ចំនួន ៣ ៥០០ ០០០រៀល ហើយលេខ១០ ចំនួន ៨០០ ០០០រៀល និង៥-ប្រាក់រង្វាន់ ឬវត្ថុផ្សេងៗ ពីសប្បុរសជន​៕