រាជធានីភ្នំពេញ ៖ នៅរសៀលថ្ងៃទី២៦ វិច្ឆិកា ខានស្អែកនេះ ប្រដាល់អន្តរជាតិរបស់ខារ៉ាបាវនៅតែបើកការប្រកួតរវាងកីឡាករកម្ពុជា និងបរទេសដដែល បើទោះជាព្រឹត្តិការណ៍នេះ ទើបតែបានបញ្ចប់ការប្រកួតដណ្ដើមជើងឯកអន្តរជាតិកាលពី២សប្ដាហ៍មុនក្ដី ។ នេះជាការប្រកួតមិត្តភាពអន្តរជាតិ ប៉ុន្តែអ្នកស្នេហាវិស័យប្រដាល់នៅតែមើលឃើញថា ជំនួបប៉ះគ្នារវាងកីឡារថុល មករា និង រឿង សោភ័ណ្ឌ ជាមួយកីឡាករថៃនឹងធ្វើឱ្យកក្រើកមិនខុសពីសប្ដាហ៍ដែលមានការប្រកួតដណ្ដើមខ្សែក្រវាត់នោះឡើយ ។
ការប្រកួតដែលនឹងធ្វើឡើងចាប់ពីម៉ោង២រសៀលក្រោមការរៀបចំរបស់ភេសជ្ជៈខារ៉ាបាវលើសង្វៀនទូរទស្សន៍អាស៊ីអាគ្នេយ៍នេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិកាលពីសប្ដាហ៍មុនៗនោះទេ ដោយសារតែភាពជាក់ស្ដែងគឺព្រឹត្តិការណ៍នេះមានការចាប់អារម្មណ៍តាំងពីការប្រកួតដណ្ដើមខ្សែក្រវាត់អន្តរជាតិមិនទាន់ដំណើរការ ។ កីឡាករកម្ពុជា២រូប គឺ ថុល មករា និងរឿង សោភ័ណ្ឌ គឺជាគូប្រកួតស៊ីសាច់ហុតឈាមជាមួយកីឡាករថៃនៅរសៀលថ្ងៃសៅរ៍ខានស្អែកនោះ ។ អ្នករៀបចំការប្រកួតបានអះអាងថា កីឡាករទាំង៤មានបំណងប៉ះគ្នាយូរហើយមុនពេលមានការសម្រេចរៀបចំព្រឹត្តិការណ៍អន្តរជាតិខារ៉ាបាវឲ្យពួកគេប្រកួតគ្នាម្ល៉េះ ។ កីឡាករកម្ពុជាបានទាំងសុំខ្លួនចង់សាកកណ្ដាប់ដៃជាមួយកីឡាករថៃតាំងពីឮថាមានការផ្គូផ្គងឱ្យប៉ះគ្នានោះផង ។
លោក ញាណ សុធី អ្នករៀបចំកម្មវិធីប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ឱ្យថុល មករា មកពីក្លិបឃ្លាំងមឿងកីឡាខេត្តពោធិ៍សាត់ ឱ្យឡើងប៉ះប្រកួតជាមួយកីឡាករថៃឈ្មោះ អារាំ ប៊យ ក្នុងនាមជាគូបើកឆាកអន្តរជាតិរបស់ព្រឹត្តិការណ៍នោះ បន្ទាប់ពីការប្រដាល់មួយនេះបានបញ្ចប់ការប្រកួតដណ្ដើមខ្សែក្រវាត់ ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងចង់ឱ្យពួកគេប៉ះគ្នានៅក្នុងព្រឹត្តិការណ៍នេះតែម្ដង ដើម្បីកំដរសង្វៀនខារ៉ាបាវនៅពេលការប្រកួតដណ្ដើមខ្សែក្រវាត់វគ្គថ្មីមិនទាន់ចាប់ផ្ដើម ។ លោកថាកីឡាករថុល មករា អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិខារ៉ាបាវ ដែលជាព្រឹត្តិការណ៍ចម្រុះទៅដោយកីឡាករខ្លាំងៗនៅក្នុងពិភពប្រដាល់តាំងពីមុនការប្រដាល់ដណ្ដើមខ្សែក្រវាត់រដូវកាលទី១មិនទាន់ចាប់ផ្ដើម ។
លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករកម្ពុជារូបនេះ ទើបលោកសម្រេចចិត្តឱ្យគេឡើងប្រកួតជាមួយកីឡាករថៃខាងលើ ក្នុងពេលដែលគេទើបនឹងឈ្នះកីឡាករថៃក្នុងពេលឡើងប្រកួតលើកមុន ។ លោកនិយាយថា «សម្រាប់គូនេះ កីឡាករថៃល្អ ប៉ុន្តែខ្ញុំពេញចិត្តលើថុល មករា ដោយសារតែគេឥឡូវប្រកួតកាន់តែល្អទើបសម្រេចដាក់ឱ្យប្រកួតនៅថ្ងៃសៅរ៍នេះ!» ។ លោកថា កីឡាករថៃអារាំ ប៊យ ធ្លាប់ប្រកួត៦៩លើក ឈ្នះ៥៦លើក និងចាញ់១៣លើក ក្នុងពេលកីឡាករកម្ពុជាទើបតែប្រកួតបាន៦៥លើក ឈ្នះ៥០លើក ចាញ់១៤លើក និងស្មើ១លើក តែលោកទុកចិត្តកីឡាករកម្ពុជាទើបដាក់ឱ្យប៉ះគ្នា ។
សម្រាប់កីឡាករ រឿង សោភ័ណ្ឌ លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងរបស់ថៃឈ្មោះភីត សាយហ្វា នៅក្នុងព្រឹត្តិការណ៍ប្រដាល់អន្តរជាតិខារ៉ាបាវ នៅរសៀលថ្ងៃសៅរ៍នោះដែរ ។ លោកថា ការប្រកួតរបស់គូនេះនៅមិនទាន់ដឹងថា អ្នកណាខ្លាំងជាងអ្នកណានោះទេ ក្នុងពេលដែលកីឡាកររឿង សោភ័ណ្ឌ ត្រូវគេឃើញធ្លាក់ដៃជាងមុន បើធៀបនឹងមួយរយៈពេលមុន ប៉ុន្តែគេនៅប្រកួតល្អ ។ កីឡាករថៃធ្លាប់ប្រកួត៨៩លើក ឈ្នះ៧៤លើក ចាញ់១៤លើក និងស្មើ១លើក រីឯកីឡាករកម្ពុជាធ្លាប់ប្រកួត១៤៣លើក ឈ្នះ១២៧លើក ចាញ់១៤លើក និងស្មើ២លើក ដែលបង្ហាញឱ្យឃើញថា បទពិសោធន៍ប្រកួតរបស់កីឡាករកម្ពុជាខ្ពស់ជាងច្រើនជាង ។
យ៉ាងណាក៏ដោយ កីឡាករកម្ពុជាមិនអាចមើលស្រាលសមត្ថភាពរបស់កីឡាករថៃបានទេ ដោយសារតែសមាសភាពរបស់កីឡាករថៃក៏មិនមែនធម្មតា ។ គូនេះមានការរំពឹងខ្ពស់ថានឹងបង្កការជក់ចិត្តដិតអារម្មណ៍ច្រើន ដោយសារតែ រឿង សោភ័ណ្ឌ ក៏មិនចង់ធ្លាក់ចុះក្រេឌីត ហើយកីឡាករថៃក៏មិនចង់ចាញ់នាំឱ្យមានការរិះគន់ ។ ដោយឡែក នៅក្នុងព្រឹត្តិការណ៍ប្រដាល់នាយប់ថ្ងៃសុក្រនេះដែរ ក៏មានជំនួបប៉ះគ្នារវាងកីឡាករកម្ពុជា និងថៃខ្លាំងៗនៅលើសង្វៀនទូរទស្សន៍អាស៊ីអាគ្នេយ៍ផងដែរ ៕
ចែករំលែកព័តមាននេះ