ខេត្តតាកែវ ៖ មន្ត្រីនគរបាលស្រុកគិរីវង់ មួយក្រុមរងការចោទប្រកាន់ពីប្រជាពលរដ្ឋថា បានរំលោ.ភចូលផ្ទះរបស់គាត់ ដោយគ្មានដីកាពីតុលាការ ហើយមន្ត្រីនគរបាលដែលដឹកនាំនោះ មានឈ្មោះ ហែម សីហបូរ៉ា និងបក្សពួក រងបណ្ដឹងពីលោកស្រី ង៉ោញ ណី ពីបទ «រំលោ.ភលំនៅដ្ឋាន» ទៅតុលាកាភ្លាមៗ ក្រោយដឹកនាំកម្លាំងចម្រុះទៅព័ទ្ធផ្ទះចាប់ប្រជាពលរដ្ឋ ដោយគ្មានបង្ហាញដីកា។
នេះយោងតាមពាក្យបណ្ដឹងចុះថ្ងៃទី១៦ ខែមិថុនា ឆ្នាំ២០២២ របស់លោកស្រី ង៉ោញ ណី ដែលកោះសន្តិភាពយើងទើបតែទទួលបាននៅល្ងាចថ្ងៃទី១៨ ខែមិថុនា ឆ្នាំ២០២២នេះ។
ដោយនៅក្នុងពាក្យបណ្តឹងនោះ ជនរងគ្រោះបានរៀបរាប់ថា កាលពីថ្ងៃទី១៦ ខែមិថុនា ឆ្នាំ២០២២ វេលាម៉ោង១០និង១០នាទីព្រឹក មានកម្លាំងសមត្ថកិច្ចចម្រុះស្រុកគិរីវង់មួយក្រុម មានគ្នាប្រមាណជា១០នាក់ ជិះរថយន្តសារ៉ែន១គ្រឿង និងម៉ូតូនគរបាលចំនួន៣គឿង បានចុះព័ទ្ធសម្រុកចូលផ្ទះលោកស្រី ស្ថិតនៅភូមិភ្ញាស ឃុំឣង្គប្រាសាទ ស្រុកគិរីវង់ ដោយឣះអាងថា មកចាប់ខ្លួនលោកស្រីទៅដាក់ពន្ធនាគារ ហើយមិនបានបង្ហាញឯកសារដីកាឡើយ ធ្វើឱ្យអ្នកស្រុកមួយភូមិផ្អើលឈុល។
ហើយកម្លាំងសមត្ថកិច្ចទាំងនោះ ដឹកនាំដោយលោក ហែម សីហបូរ៉ា គឺមានស្លៀកពាក់ឯកសណ្ឋានខ្លះ ស៊ីវិលខ្លះ ហើយត្រូវបានដកថយភ្លាមៗ បន្ទាប់ពីម្ចាស់ផ្ទះសួរនាំរកដីកាពីតុលាការ។
ក្រោយពេលឃើញមានភាពមិនប្រក្រតីរបស់លោក ហែម សីហបូរ៉ា និងបក្សពួកសម្រុកចូលផ្ទះលោកស្រី ដោយគ្មានការជូនដំណឹង និងគ្មានការឣនុញ្ញតិ ដោយឣយុត្តិធម៌បែបនេះ លោកស្រីក៏សម្រេចចិត្តដាក់ពាក្យបណ្ដឹងលោក ហែម សីហបូរ៉ា និងបក្សពួកទៅតុលាការ ដោយទាមទារសំណងជំងឺចិត្ត១០ម៉ឺនដុល្លារ និងសំណូមពរផ្តន្ទាទោសលោក ហែម សីហបូរ៉ា និងបក្សពួកតាមច្បាប់ ។
លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ បានប្រាប់អ្នកសារព័ត៌មានថា ចំពោះករណីខាងលើនេះ លោកបានតបយ៉ាងខ្លីវិញថា ៖ «លោកមិនបានដឹងទេចំពោះរឿងនេះ បើមានដីកាចាប់ខ្លួនមែន គឺមិនរំលងលោកឡើយ តែចំពោះករណីមួយនេះលោកពិតជាមិនបានដឹងពិតមែន»។
ដោយឡែកលោកវរសេនីយ៍ឯក យុគ សារ៉ាត់ អធិការនគរបាលស្រុកគីរីវង់ បានប្រាប់ដែរថា «ពិតជាមានករណីសមត្ថកិច្ចចុះទៅផ្ទះនោះមែន ដោយសារមានដីកាចាប់ខ្លួនពីតុលាការទាក់ទិននឹងរឿងដីធ្លី។
តើការអនុវត្តនីតិវិធី ខ្លះពាក់ឯកសណ្ឋាន ខ្លះពាក់ស៊ីវិល ត្រង់ចំណុចនេះ ពលរដ្ឋគាត់ថា បែងចែកមិនដាច់ (ខុសច្បាប់) ជាពិសេសមិនបានបង្ហាញដីកាពីតុលាការថែមទៀត?
មជ្ឈដ្ឋានមហាជនដែលដឹង និងឃើញហេតុការណ៍ពិតជាមានការងឿយឆ្ងល់យ៉ាងខ្លាំងចំពោះទង្វើរបស់លោក ហែម សីហបូរ៉ា ដែលជាមន្ត្រីនគរបាលស្រុក និងបក្សពួក ដែលបានចុះទៅប្រព្រឹត្តិដោយនាំគ្នាទៅចាប់ខ្លួនប្រជាពលរដ្ឋខាងលើនេះ បើសិនមិនមានបញ្ជាពីលោកវរសេនីយ៍ឯក យ៉ុគ សារ៉ាត់ អធិការនគរបាលស្រុកទេនោះ គឺមិនអាចអោយមន្ត្រីនគរបាលស្រុកនាំគ្នាទៅឆែកឆេរ និងចុះចាប់ខ្លួនប្រជាពលរដ្ឋដោយខុសច្បាប់កើតទេ ។
ចុងក្រោយ លោកស្រីដែលជាជនរងគ្រោះ ក៏បានសូមសំណូមពរដល់តុលាការ និងថ្នាក់ដឹកនាំទាំងអស់ ជួយរកយុត្តិធម៌ដល់រូបលោកស្រី និងក្រុមគ្រួសាររបស់គាត់ផង។
ចែករំលែកព័តមាននេះ