សមត្ថកិច្ចនគរបាលខេត្តព្រះសីហនុ ឃាត់ខ្លួន​ជនជាតិចិន ក្នុងករណី​ប៉ុនប៉ងមនុស្សឃាត​ ចាប់ជំរិត ​គំរាមសម្លា.ប់ ​កាន់កា.ប់រក្សាទុក និងប្រើប្រាស់អាវុធដោយខុស​ច្បាប់

ខេត្តព្រះសីហនុ៖ បុរសជនជាតិចិនម្នាក់ បានមកប្តឹង​ថា មានជនជាតិចិន ១ក្រុម មានគ្នាជាង  ១០នាក់ ជិះរថយន្ត ៤ ទៅ ៥គ្រឿង ក្នុងនោះ មានរថយន្ត ២គ្រឿង ម៉ាក MERCERDES BENZ ពណ៌ស មានមនុស្ស ៣នាក់ និង ម៉ាក TUNDRA ពណ៌ទឹកមាស មានមនុស្ស ម្នាក់ បានចតនៅ​មុខក្រុមហ៊ុនរបស់មិត្តភក្តិគាត់ធ្វើការ ស្ថិតនៅភូមិ ៦ សង្កាត់ ៤ ក្រុង-ខេត្តព្រះសីហនុ ត្រៀមចាប់​ជម្រិតមិត្តភក្តិរបស់គាត់។ ចំណែករថយន្ត ២ ទៅ ៣គ្រឿងទៀត ឈប់នៅខាងក្រៅផ្លូវ។ បន្ទាប់​ពីទទួលបានព័ត៌មានភ្លាម កម្លាំងជំនាញផែននគរបាលព្រហ្មទណ្ឌ បានចុះទៅដល់ទីតាំង​កើតហេតុ ​និងបានឃាត់ខ្លួន​ជនសង្ស័យចំនួន ​៣នាក់ នៅក្នុងរថយន្ត ១គ្រឿង ម៉ាក MERCEDES BENZ រីឯ​ជនសង្ស័យ ម្នាក់ ដែលនៅក្នុងរថយន្ត ម៉ាក TUNDRA បានរត់គេចខ្លួនបាត់ បន្សល់ទុករថយន្តនៅកន្លែងកើតហេតុ។

លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានឲ្យដឹងថា បន្ទាប់ពី​ឃាត់ខ្លួនជនទាំងនោះ សមត្ថកិច្ចយើង បានស្ទួចរថយន្តម៉ាក TUNRDA មករក្សាទុក​បណ្តោះអាសន្ននៅស្នងការដ្ឋាននគរបាលខេត្តព្រះសីហនុ ចំណែក រថយន្ត ២ ទៅ ៣គ្រឿងទៀត ដែលជាបក្ខពួករបស់ជនសង្ស័យ បានបើករត់គេចខ្លួនបាត់។

ករណីនេះ កើតឡើងកាល​ពីថ្ងៃទី​១២ ខែមិថុនា ឆ្នាំ២០២២ វេលាម៉ោង ១៤ និង ០០ នាទីដោយសារ​ជនរងគ្រោះ និងជនសង្ស័យ បានសហការគ្នា រកស៊ី ចាប់ពីអំឡុងខែកុម្ភៈ ឆ្នាំ២០២២ រហូតដល់​ខែមិថុនា ឆ្នាំ២០២២ ហើយពួកគេ បានខាតប្រាក់អស់ចំនួន $១,២០០,០០០ (មួយលាន ពីរសែនដុល្លារអាមេរិក) បន្ទាប់មក ជនសង្ស័យ បានខឹងនឹងជនរងគ្រោះ ទើបរៀប​ចំ​ផែនការចាប់ជំរិតជនរងគ្រោះតែម្តង​។

​លោកស្នងការ បន្ថែមថា នៅថ្ងៃទី១៤ ខែមិថុនា ឆ្នាំ២០២២ វេលាម៉ោង ១៦ និង ០០ នាទី កម្លាំងសមត្ថកិច្ច បានបង្កើតជាគណៈកម្មការឆែកឆេរ ដោយមានការចូលរួមពីលោក ពេញ ពិសិដ្ឋ ព្រះរាជអាជ្ញារង នៃអយ្យការ អមសាលាដំបូងខេត្តព្រះសីហនុ ជាលទ្ធផល ក្នុងការឆែកឆេរ រកឃើញមានអាវុធខ្លី ០១ ដើម ម៉ាក ZORAKI MOD914-TD AUTO R3DTSC1-2100172 ​បង់ ០១ ​គ្រាប់ចំនួន ០៨ គ្រាប់​។

ជនរងគ្រោះឈ្មោះ Yu Liang ភេទប្រុស អាយុ ៣៣ ឆ្នាំ ជនជាតិចិន កាន់លិខិតឆ្លងដែនលេខៈ EJ1529461 មុខរបរ អ្នករកស៊ី ស្នាក់នៅភូមិ ៦ សង្កាត់ ៤ ក្រុង-ខេត្តព្រះសីហនុ​។

ចំណែក​ជនសង្ស័យ ​៤ នាក់ រួមមាន៖ ១-ឈ្មោះ Jin KaiBin ហៅ Lin Yi ឬ​ Xiao Bin ភេទប្រុស អាយុ ២៥ឆ្នាំ ជនជាតិចិន កាន់លិខិតឆ្លងដែនលេខៈ គ្មាន មុខរបរ សន្តិសុខ ស្នាក់នៅភូមិ ៤ សង្កាត់ ៤ ក្រុង-ខេត្តព្រះសីហនុ។ ២-ឈ្មោះ Wang Ying ហៅ អាយន្តហោះ ភេទប្រុស អាយុ ២៨ឆ្នាំ ជនជាតិចិន កាន់លិខិតឆ្លងដែនលេខៈ គ្មាន មុខរបរ សន្តិសុខ ស្នាក់នៅភូមិ ៤ សង្កាត់ ៤ ក្រុង-ខេត្តព្រះសីហនុ​។ ៣-ឈ្មោះ Yang QianJun ហៅ Ta Jing ភេទប្រុស អាយុ ៣៦ ឆ្នាំ ជនជាតិចិន កាន់លិខិតឆ្លងដែនលេខៈ គ្មាន មុខរបរ សន្តិសុខ ស្នាក់នៅភូមិ ៤ សង្កាត់ ៤ ក្រុង-ខេត្តព្រះសីហនុ​។ ៤-ឈ្មោះ Min SiSong ហៅ Xiao Song ភេទប្រុស អាយុ ២៧​ឆ្នាំ កាន់លិខិត​ឆ្លងដែនលេខ EH7292577 និងបក្ខពួកបានរត់គេចខ្លួនបាត់​។

ចំណែកវត្ថុតាងចាប់យកបាន ជាក់ស្ដែង រួមមាន៖ ទូរស័ព្ទដៃចំនួន ០៥ គ្រឿង ម៉ាក Iphone X ពណ៌ស ០១ គ្រឿង ,ម៉ាក Iphone12 Pro Max ពណ៌ខៀវ ០១ គ្រឿង ,ម៉ាក Iphone13 Pro Max ពណ៌ប្រផេះ ០១ គ្រឿង ,ម៉ាក OPPO ពណ៌ខៀវ ០១ គ្រឿង និងម៉ាក Sansung Fold2 ពណ៌ផ្កាឈូក ០១ គ្រឿង ។ កាត ០១ សន្លឹក និងកូនសោរផ្ទះ ០១ ។ រថយន្ត ០១ គ្រឿង ម៉ាក MERCEDES BENZ ពណ៌ស ពាក់ផ្លាកលេខ ភ្នំពេញ 2AT-7333​។ រថយន្ត ០១ គ្រឿង ម៉ាក TUNRDA ពណ៌ទឹកមាស ពាក់ផ្លាកលេខ ភ្នំពេញ 2AJ-2050 ។ កាំភ្លើងខ្លី ០១ ដើម ម៉ាក ZORAKI MOD914-TD AUTO R3DTSC1-2100172 ,បង់ ០១ ,គ្រាប់ចំនួន ០៨ គ្រាប់ ។

​ករណីខាងលើនេះ ការិយាល័យនគរបាលព្រហ្មទណ្ឌកម្រិតស្រាល កំពុងសួរនាំ និងចាត់ការ​តាមនីតិវិធីច្បាប់៕