ទីក្រុងតេអេរ៉ង់៖ កងទ័ពជើងទឹកនៃឆ្មាំបដិវត្តអ៊ីរ៉ង់បានចេញសេចក្ដីព្រមានត្រង់ៗទៅអាមេរិកដែលមាននាវាចម្បាំងឈប់សំចតនៅដែនសមុទ្ររបស់អ៊ីរ៉ង់ភាគខាងត្បូង។ អ៊ីរ៉ង់ប្រាប់អាមេរិកថាត្រូវរក្សាគំលាតឱ្យឆ្ងាយបន្តិចនៅពេលកងទ័ពអ៊ីរ៉ង់កំពុងធ្វើសមយុទ្ធយោធា។ អ៊ីរ៉ង់កំពុងធ្វើសមយុទ្ធយោធាទ្រង់ទ្រាយធំនៅឈូងសមុទ្រពែក្ស, ច្រកសមុទ្រហ័រមូស (Hormuz) និងសមុទ្រអូម៉ង់ (Oman)។ អ៊ីរ៉ង់ចង់បង្ហាញពីការត្រៀមខ្លួនរួចជាស្រេច និងបង្ហាញអំពីសមត្ថភាពក្នុងការទប់ទល់នឹងការវាយប្រហារ។
មន្ត្រីរដ្ឋាភិបាលអ៊ីរ៉ង់ថ្លែងថាការចេញសេចក្ដីព្រមាននេះដើម្បីទប់ស្កាត់មិនឱ្យកើតមានទង្វើបង្កហេតុ ឬការគំរាមកំហែងចំពោះដែនសមុទ្រអធិបតេយ្យរបស់ខ្លួន។ ការព្រមាននេះកើតឡើងបន្ទាប់ពីមានជម្លោះប្រដាប់អាវុធរយៈពេល១២ថ្ងៃកាលពីខែមិថុនារវាងអ៊ីរ៉ង់ និងអ៊ីស្រាអែល។ កាលនោះ អាមេរិកក៏ចូលរួមជាមួយអ៊ីស្រាអែលវាយប្រហារទីតាំងនុយក្លេអ៊ែររបស់អ៊ីរ៉ង់ផងដែរ។
អ៊ីរ៉ង់ប្រកាសថ្កោលទោសការវាយប្រហារនោះ និងចាត់ទុកថានេះជាការរំលោភបំពានយ៉ាងធ្ងន់ធ្ងរចំពោះអធិបតេយ្យភាពជាតិរបស់ខ្លួន។ ភាពតានតឹងកាន់តែឡើងកម្ដៅបន្ថែមពីលើការជាប់គាំងការចរចានុយក្លេអ៊ែរ, អាមេរិកក៏បង្កើនវត្តមានយោធារបស់ខ្លួនកាន់តែច្រើនឡើងៗនៅក្នុងតំបន់ និងប្រទាំងប្រទើសគ្នាជាច្រើនលើកច្រើនសានៅឈូងសមុទ្រពែក្ស។
ការដែលឆ្មាំបដិវត្តអ៊ីរ៉ង់ហ៊ានព្រមានអាមេរិកធ្ងន់ៗដល់ថ្នាក់នេះជាសញ្ញាបង្ហាញថាទីក្រុងតេអេរ៉ង់ឥឡូវនេះមិនដូចពីមុនទេ។ អ៊ីរ៉ង់ត្រៀមខ្លួនរួចហើយដើម្បីការពារដែនសមុទ្ររបស់ខ្លួនមិនឱ្យបរទេសឈ្លានពានបានឡើយ។ អ៊ីរ៉ង់ថែមទាំងចូលគ្រប់គ្រងតំបន់ច្រករបៀងដែនសមុទ្រជាយុទ្ធសាស្ត្រ។ សភាពការណ៍នេះប៉ះពាល់ពិភពលោកទាំងមូលព្រោះឈូងសមុទ្រពែក្ស និងច្រកសមុទ្រហ័រមូសមានសារៈសំខាន់ខ្លាំង។ ទីនេះមានចំណែក២០%នៃការដឹកជញ្ជូនប្រេងឆៅទូទាំងពិភពលោក។ មានន័យថាបើសិនសភាពការណ៍ឡើងកម្ដៅ ពេលនោះទីផ្សារផ្គត់ផ្គង់ថាមពលនឹងមានបញ្ហារអាក់រអួល ហើយនឹងបង្កអស្ថិរភាពផ្នែកភូមិសាស្ត្រនយោបាយនៅអឺរ៉ុប អាស៊ី និងទីកន្លែងដទៃទៀត។
សមយុទ្ធយោធារបស់ឆ្មាំបដិវត្តអ៊ីរ៉ង់ដែលមានឈ្មោះសម្ងាត់ថាសាហ៊ីត មហាមេត ណាហ្សេរី (Shahid Mohammad Nazeri) ចាប់ផ្ដើមតាំងពីថ្ងៃព្រហស្បតិ៍។ នៅអំឡុងពេលធ្វើសមយុទ្ធនេះ អង្គភាពទ័ពជើងទឹកអ៊ីរ៉ង់បានចេញសេចក្ដីព្រមានត្រង់ៗទៅនាវាចម្បាំងអាមេរិកដែលបោះមូលដ្ឋានមិនឆ្ងាយប៉ុន្មានពីទីនោះ។ អ៊ីរ៉ង់ព្រមានថាបើសិនអាមេរិកនៅសុខៗបញ្ជូននាវាទាំងនោះមករំខានសមយុទ្ធរបស់ខ្លួន ពេលនោះអ៊ីរ៉ង់លែងគួរសមតទៅទៀតហើយ។
នៅក្នុងសមយុទ្ធយោធានេះ អ៊ីរ៉ង់បង្ហាញប្រព័ន្ធអាវុធការពារ និងអាវុធវាយលុកដែលប្រើប្រាស់បច្ចេកវិទ្យាទំនើបចុងក្រោយបំពាក់សុទ្ធតែបញ្ញាសិប្បនិម្មិតអេអាយ (AI)។ មន្ត្រីរដ្ឋាភិបាលអ៊ីរ៉ង់ថ្លែងថាសមយុទ្ធយោធាលើកនេះជាឱកាសសម្រាប់អ៊ីរ៉ង់ពិនិត្យកែសម្រួលឡើងវិញនូវការត្រៀមប្រតិបត្តិការសឹក និងការរៀបយុទ្ធសាស្ត្រ។ សមយុទ្ធនេះរំលេចឱ្យឃើញការប្រើប្រាស់ឱ្យស៊ីសង្វាក់គ្នារវាងមីស៊ីល ដ្រូន ប្រព័ន្ធឈ្លបយកការណ៍ និងសង្គ្រាមប្រើប្រព័ន្ធអេឡិចត្រូនិចដើម្បីឱ្យកងទ័ពជើងទឹកកាន់តែមានសមត្ថភាពចាប់បានសញ្ញាគំរាមកំហែង និងចាត់វិធានការឆ្លើយតប។ ខាងលើនេះជាការផ្សាយរបស់ញូស្វីក (Newsweek) និងប្រភពដទៃទៀត៕
ចែករំលែកព័តមាននេះ