ប្រទេសឥណ្ឌូណេស៊ី ៖ អនុប្រធានធនាគារពិភពលោក World Bank សម្រាប់អាស៊ីខាងកើត និងប៉ាស៊ីហ្វិក លោកស្រី Victoria Kwakwa បានអះអាងជាថ្មីថា ស្ថាប័នហិរញ្ញវត្ថុអន្តរជាតិមួយនេះនឹងបន្តផ្តល់ជំនួយដល់ប្រទេសឥណ្ឌូណេស៊ី ដើម្បីទទួលបានការលូតលាស់សេដ្ឋកិច្ចកាន់តែខ្ពស់ និងរុងរឿងសម្រាប់ប្រជាជនប្រមាណ២៥០លាននាក់ក្នុងប្រទេសនេះ ។
ក្នុងអំឡុងពេលទស្សនកិច្ចនៅប្រទេសឥណ្ឌូណេស៊ី លោកស្រី Kwakwa បានជួបជាមួយឧបនាយករដ្ឋមន្ត្រី Jusuf Kalla និងគណៈរដ្ឋមន្ត្រីជាច្រើនទៀត ។ លោកស្រីក៏បានជួបជាមួយអ្នកតំណាងសង្គមស៊ីវិល អ្នកផ្តល់យោបល់ផ្នែកសង្គម វិស័យឯកជន និងដៃគូអភិវឌ្ឍន៍នានាផងដែរ ។
លោកស្រី Kwakwa បានពិភាក្សាពីបញ្ហាជាច្រើនរួមមាន កំណែទម្រង់របស់រដ្ឋាភិបាលដើម្បីទទួលបានការលូតលាស់ខ្ពស់ជាងមុន តាមរយៈស្ថិរភាពផ្នែកម៉ាក្រូសេដ្ឋកិច្ច កំណែទម្រង់រចនាសម្ព័ន្ធ និងផ្តោតបន្ថែមលើការវិនិយោគផ្នែកហេដ្ឋារចនាសម្ព័ន្ធ និងធនធានមនុស្ស ។
លោកស្រី Kwakwa ថ្លែងថា ៖ « ដំណើរការរបស់ប្រទេសឥណ្ឌូណេស៊ី ក្នុងការពង្រឹងមូលដ្ឋានម៉ាក្រូសេដ្ឋកិច្ច និងការធ្វើឲ្យល្អជាងមុននៃបរិស្ថានអាជីវកម្ម នឹងជួយឱ្យប្រទេសនេះទទួលបានគោលដៅលូតលាស់របស់ខ្លួន ខណៈមានភាពអន់ថយក្នុងពិភពលោក ។ ឥណ្ឌូណេស៊ីនឹងក្លាយជាឧទាហរណ៍មួយដ៏ល្អសម្រាប់ការធ្វើកំណែទម្រង់គោលនយោបាយផងដែរ » ។
ក្នុងដំណើរទស្សនកិច្ចរបស់លោកស្រី រវាងថ្ងៃទី១៣-១៨ វិច្ឆិកា កន្លងមក លោកស្រីក៏បានទៅកាន់ Yogyakarta ហើយបានឃើញដោយផ្ទាល់ភ្នែកពីវិធីដែលសហគមន៍ និងអាជ្ញាធរក្នុងស្រុកសហការជាមួយគ្នាដើម្បីបង្កើនភាពងាយស្រួលនៃសេវាកម្មមូលដ្ឋាន ។ សេវាកម្មទាំងនោះរួមមាន សុខាភិបាល ទឹកស្អាតនិងអនាម័យ ក៏ដូចជាការបង្កើតស្ថានភាពរស់នៅតាមតំបន់អនាធិបតេយ្យ ។
គម្រោងទាំងនោះត្រូវបានគិតថា មានប្រសិទ្ធភាពណាស់ក្នុងការដោះស្រាយបញ្ហាមួយក្នុងចំណោមបញ្ហាធំៗដែលប្រទេសឥណ្ឌូណេស៊ីកំពុងតែជួបប្រទះ គឺបញ្ហាកង្វះជីវជាតិពីកុមារភាព ។
World Bank កត់សម្គាល់ថា ឥណ្ឌូណេស៊ីជាប់ចំណាត់ថ្នាក់លេខ៥ ក្នុងចំណោមប្រទេសដែលមានជំងឺក្រិនច្រើនជាងគេលើលោក ដោយកុមារអាយុក្រោម៥ឆ្នាំ ប្រមាណ៩លាននាក់មានជំងឺនេះ ៕
ចែករំលែកព័តមាននេះ