ទីក្រុង​បាងកក ៖ អាជ្ញាធរ​ទេសចរណ៍​ថៃ (TAT) កាលពី​ថ្ងៃ​ទី​១៥ ខែតុលា បាន​ប្រកាស​ថា កញ្ញា Lisa សមាជិក​ក្រុម​ចម្រៀង​នារី​កូរ៉េ​ខាងត្បូង Blackpink ត្រូវ​បាន​តែងតាំង​ជា ទូត​សុ​ឆន្ទៈ​ទេសចរណ៍​ថៃ «Amazing Thailand Ambassador» សម្រាប់​រយៈពេល​១២​ខែ ឆ្នាំ​ក្រោយ ដើម្បី​ផ្សព្វផ្សាយ​រូបភាព​ទេសចរណ៍​របស់​ប្រទេស​មួយ​នេះ ទៅ​កាន់​ពិភពលោក​។

យោង​តាម​ប្រភព​ពី​សារព័ត៌មាន​ថៃ The Nation រាយការណ៍​ថា ប្រធាន TAT លោកស្រី Thapanee Kiatphaibool បាន​ថ្លែង​ថា ការ​តែងតាំង Lisa ជា​រឿង​ដ៏​សំខាន់​មួយ​នៅ​ក្នុង​ការ​បង្ហាញ​ពី​ភាព​ស្រស់​ស្អាត ភាព​សម្បូរ​បែប និង​ភាព​អស្ចារ្យ​របស់​ប្រទេស​ថៃ ដែល​នឹង​ជំរុញ​ទឹកចិត្ត​ប្រជាជន​ថៃ ក៏​ដូច​ជា​ភ្ញៀវ​អន្តរជាតិ​ឱ្យ​ស្វែងរក​ការ​កម្សាន្ត​នៅ​ក្នុង​ប្រទេស​ថៃ​ឡើង​វិញ​។

ជាមួយ​គ្នា​នោះ TAT សង្ឃឹមថា ឥទ្ធិពល​តារា​របស់​ចម្រៀង​ស្រី​រូប​នេះ នឹង​ជំរុញ​ឱ្យ​មានដំណើរ​ទស្សន​មក​កាន់​ប្រទេស​ថៃ​កាន់តែ​ច្រើន និង​ជំរុញ​ប្រាក់​ចំណូល​ទេសចរណ៍​សរុប​លើស​ពី ៣​ទ្រី​លាន​បាត (៩២,៤ ពាន់​លាន​ដុល្លារ​អា​មេ​រិ​ក​) នៅ​ក្នុង​ឆ្នាំ​២០២៦​។ លោក Thapanee បាន​បញ្ជាក់​ថា «TAT មាន​គោលបំណង​ដាក់​ប្រទេស​ថៃ​ជា​គោលដៅ​កម្សាន្ត​ដែល​មានគុណ​ភាព​ខ្ពស់ និង​សុវត្ថិភាព ស្វាគមន៍​យ៉ាង​កក់ក្ដៅ​ទាំង​អ្នក​ធ្វើ​ដំណើរ​ក្នុង និង​ក្រៅប្រទេស ដែល​អ្នកទេសចរ​អាច​បង្កើត​អនុស្សាវរីយ៍​ដ៏​យូរអង្វែង និង​មាន​អត្ថន័យ​នៅ​គ្រប់​ជំហាន​នៃ​ការ​ធ្វើ​ដំណើរ​របស់​ពួក​គេ​»​។

កញ្ញា Lisa គឺជា​តារាចម្រៀង អ្នក​រាំ និង​តារា​សម្តែង​ជនជាតិ​ថៃ​អាយុ​២៨​ឆ្នាំ បាន​បង្ហាញខ្លួន​ដំបូង​ជាមួយ​ក្រុម​ចម្រៀង Blackpink ក្នុង​ឆ្នាំ ២០១៦ ហើយ​បាន​ចាប់​អាជីព​ទោល​នៅ​ឆ្នាំ ២០២១ ជាមួយ​អាល់​ប៊ុ​ម Lalisa ។ នាង​មាន​អ្នក​តាមដាន​ច្រើន​ជាង ១០៧​លាន​នាក់​លើ​បណ្តាញ​សង្គម Instagram​។ នាង​បាន​បង្ហាញខ្លួន​លើក​ដំបូង​ក្នុង​រដូវ​កាល​ទី ៣ នៃ​កម្មវិធី​ទូរទស្សន៍​អា​មេ​រិ​ក «The White Lotus» ដែល​ប្រតិបត្តិ​ករ​ទេសចរណ៍​ថៃ​ចាត់​ទុក​ថា​ជា​ឱកាស​ដ៏​ល្អ​មួយ ដើម្បី​ផ្សព្វផ្សាយ​ការ​ធ្វើ​ដំណើរ​ឆ្លងកាត់​ខេត្ត​ភាគ​ខាងត្បូង នៅ​ក្នុងឆ្នាំនេះ​។

ការ​តែងតាំង Lisa ត្រូវ​បាន​មើលឃើញ​ថា ដើម្បី​ស្តារ​វិស័យ​ទេសចរណ៍​របស់​ប្រទេស​ថៃ ដែល​កំពុង​មាន​វិបត្តិ​យូរ​មក​ហើយ​។ គិត​ត្រឹម​រយៈពេល​៨​ខែ​ដំបូង​នៃ​ឆ្នាំ​នេះ ភ្ញៀវ​ទេសចរ​បរទេស​ប្រហែល ២៥​លាន​នាក់​បាន​ធ្វើ​ដំណើរ​មក​កាន់​ប្រទេស​ថៃ ដែល​ធ្លាក់​ចុះ​ប្រហែល ៧,៥% ធៀប​នឹង​រយៈពេល​ដូច​គ្នា កាលពី​ឆ្នាំ​មុន​។ ប្រទេស​ថៃ​បាន​ស្វាគមន៍​ភ្ញៀវ​ទេសចរ​បរទេស​ចំនួន ៣៥,៥​លាន​នាក់ កាលពី​ឆ្នាំ​មុន ពោល​កើនឡើង ២៦% ធៀប​នឹង​ឆ្នាំ ២០២៣​។

បច្ចុប្បន្ន​ប្រទេស​ថៃ​បាន​នឹង​កំពុង​តស៊ូ​ដើម្បី​ស្ដារ​ការ​មក​ដល់​របស់​ភ្ញៀវ​ទេសចរ ដើម្បី​អាច​ឈាន​ដល់​កម្រិត​មុន​ការ​រាតត្បាត​នៃ​ជំងឺ​រាតត្បាត ដោយសារ​តែ​កត្តា​អវិជ្ជមាន​ជា​ច្រើន រួម​ទាំង ការ​ព្រួយបារម្ភ​អំពី​សុវត្ថិភាព ការ​រញ្ជួយ​ដី​ក្នុង​ខែមីនា និង​ការ​ប៉ះទង្គិច​គ្នា​នៅ​តាម​ព្រំដែន​កម្ពុជា​-​ថៃ​៕ ប្រភព ៖ Vietnam Express