ទីក្រុងតូក្យូ ៖ រដ្ឋាភិបាលជប៉ុន និងក្រុមហ៊ុនផលិតយានយន្តកំពូលមួយចំនួនរបស់ប្រទេសនេះ បានព្រមានប្រទេសវៀតណាមថា ផែនការហាមឃាត់ទោចក្រយានយន្តប្រើសាំងនៅទីក្រុងហាណូយ អាចបង្កឱ្យមានការបាត់បង់ការងារ និងរំខានដល់ទីផ្សារមានតម្លៃ ៤,៦ពាន់លានដុល្លារអាមេរិក ដែលគ្រប់គ្រងដោយក្រុមហ៊ុនហុងដា។…
ទីក្រុងតូក្យូ ៖ រដ្ឋាភិបាលជប៉ុន និងក្រុមហ៊ុនផលិតយានយន្តកំពូលមួយចំនួនរបស់ប្រទេសនេះ បានព្រមានប្រទេសវៀតណាមថា ផែនការហាមឃាត់ទោចក្រយានយន្តប្រើសាំងនៅទីក្រុងហាណូយ អាចបង្កឱ្យមានការបាត់បង់ការងារ និងរំខានដល់ទីផ្សារមានតម្លៃ ៤,៦ពាន់លានដុល្លារអាមេរិក ដែលគ្រប់គ្រងដោយក្រុមហ៊ុនហុងដា។ នេះបើតាមការចេញផ្សាយពីទីភ្នាក់ងារសារព័ត៌មាន Reuters កាលពីថ្ងៃទី២១ ខែតុលា ឆ្នាំ២០២៥ ដោយស្រង់ប្រភពពីឯកសារពាក់ព័ន្ធ ក៏ដូចជាបុគ្គល៧នាក់ ក្រោមលក្ខខណ្ឌមិនបញ្ចេញអត្តសញ្ញាណ ដែលដឹងអំពីបញ្ហានេះ។
កាលពីខែកក្កដាកន្លងទៅ នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានចេញសេចក្តីណែនាំមួយ ហាមឃាត់ម៉ូតូប្រើសាំងបង្ហាញវត្តមានកណ្តាលទីក្រុងហាណូយ ចាប់ពីពាក់កណ្តាលឆ្នាំ ២០២៦ តទៅ ខណៈប្រទេសនៅអាស៊ីអាគ្នេយ៍មួយនេះ កំពុងព្យាយាមកាត់បន្ថយការបំពុលបរិយាកាសកម្រិតខ្ពស់។ ការរឹតត្បិតនេះ នឹងអនុវត្តទូទាំងទីក្រុងមួយនេះ នៅត្រឹមឆ្នាំ ២០២៨ ហើយការហាមឃាត់នេះ ក៏ត្រូវបានរំពឹងថា នឹងបង្កើនការអនុវត្តទៅកាន់តំបន់ផ្សេងទៀតនៃប្រទេសវៀតណាមផងដែរ។
ជាការឆ្លើយតប ស្ថានទូតជប៉ុនប្រចាំប្រទេសវៀតណាមបានផ្ញើលិខិតមួយច្បាប់ទៅកាន់អាជ្ញាធរវៀតណាម ដោយគូសបញ្ជាក់ថា ការហាមឃាត់ភ្លាមៗបែបនេះ អាចប៉ះពាល់ដល់ការងារនៅក្នុងឧស្សាហកម្មគាំទ្ររបស់វៀតណាម ដូចជា ហាងលក់ម៉ូតូ និងអ្នកផ្គត់ផ្គង់គ្រឿងបន្លាស់ជាដើម។ នេះបើតាមសេចក្តីថ្លែងការណ៍ដែលត្រូវបានសង្ខេបដោយស្ថានទូតជប៉ុន ខណៈដែលស្ថានទូតបានបដិសេធមិនចែករំលែកខ្លឹមសារទាំងស្រុងនៃលិខិតនេះ។
ស្ថានទូតជប៉ុនក៏បានជំរុញឱ្យអាជ្ញាធរវៀតណាមពិចារណា ផែនទីបង្ហាញផ្លូវសមស្រប សម្រាប់យានយន្តអគ្គិសនី ដែលនឹងរួមបញ្ចូលរយៈពេលនៃការរៀបចំ និងការអនុវត្តជាដំណាក់កាលនៃបទប្បញ្ញត្តិ។ បើតាមប្រភពពី Reuters បានឱ្យដឹងថា ស្ថានទូតជប៉ុនបានបដិសេធមិនបង្ហាញថា លិខិតនេះ ត្រូវបានផ្ញើទៅកាន់អាជ្ញាធរវៀតណាមនៅពេលណានោះទេ0x017d7 បើទោះបីជាមន្ត្រីរដ្ឋាភិបាលជប៉ុនម្នាក់បានបង្ហើបថា លិខិតត្រូវបានផ្ញើកាលពីខែកញ្ញាក៏ដោយ។
យោងតាមក្រុមហ៊ុនស្រាវជ្រាវទីផ្សារ Mordor Intelligence បានឱ្យដឹងថា ទីផ្សារយានយន្តកង់ពីរ (ទោចក្រយានយន្ត) របស់ប្រទេសវៀតណាម គឺជាទីផ្សារធំបំផុតមួយរបស់ពិភពលោក ដែលមានតម្លៃប៉ាន់ស្មានថា ៤,៦ ពាន់លានដុល្លារនៅឆ្នាំនេះ ដោយចំនួនទោចក្រយានយន្តដែលបានចុះបញ្ជីកាលពីឆ្នាំមុនមានជិត ៨០% នៃចំនួនប្រជាជនសរុបជាង ១០១លាននាក់របស់ប្រទេសនេះ ដែលជាអត្រាកម្មសិទ្ធិខ្ពស់បំផុតមួយនៅទូទាំងពិភពលោក៕ ប្រភព ៖ Reuters
ចែករំលែកព័តមាននេះ