កីឡាករ-កីឡាការិនីជាង១ពាន់នាក់ចូលរួមប្រកួតកីឡាឧត្តមសិក្សានិងមធ្យមសិក្សាបច្ចេកទេស
- ភ្នំពេញ
រាជធានីភ្នំពេញ ៖ ការប្រកួតកីឡាក្របខណ្ឌឧត្តមសិក្សា និងមធ្យមសិក្សាបច្ចេកទេសឆ្នាំ២០២២
រាជធានីភ្នំពេញ ៖ ការប្រកួតកីឡាក្របខណ្ឌឧត្តមសិក្សា និងមធ្យមសិក្សាបច្ចេកទេសឆ្នាំ២០២២គ្រោងបើកដំណើរជាផ្លូវការនៅថ្ងៃទី២១ មិថុនា ខាងមុខនេះហើយ។ នេះបើតាមការឱ្យដឹងតាមរយៈសន្និសីទសារព័ត៌មានកាលពីព្រឹកថ្ងៃទី១៦មិថុនា នៅនាយកដ្ឋានអប់រំកាយ និងកីឡា។
ការប្រកួតកីឡាក្របខណ្ឌឧត្តមសិក្សា និងមធ្យមសិក្សាបច្ចេកទេស ឆ្នាំ២០២២ មានកីឡាករ-កីឡាការិនីមកពីតាមគ្រឹះស្ថានឧត្តមសិក្សានិងមធ្យមសិក្សាបច្ចេកទេសរាជធានី ខេត្តចំនួន៣៨សរុបកីឡាករកីឡាការិនីមានចំនួន១៤៤៣នាក់ ក្នុងនោះក៏មានការចូលរួមពីសហព័ន្ធកីឡាជាតិចំនួន១២ផងដែរ។ ការប្រកួតដែលគ្រោងបញ្ចប់នៅថ្ងៃទី៣០ ខែមិថុនា ឆ្នាំ២០២២ ខាងមុខនេះ ត្រូវបានដាក់១២ប្រភេទកីឡាឱ្យប្រកួតរួមមាន៖កីឡាបាល់ទាត់ បាល់ទះ បាល់បោះ អត្តពលកម្ម ប៉េតង់ ហែលទឹក វាយកូនឃ្លីលើតុ វាយសី តេក្វាន់ដូWT តេក្វាន់ដូITF ការ៉ាតេ និងសីប៉ាក់តាក្រ ចំណែកវិញ្ញាសាប្រកួតសរុបចំនួន៨៨ ។ សម្រាប់ការរៀបចំដំណើរការប្រកួតនេះទៀតជាថវិការបស់ក្រសួងអប់រំ យុវជន និងកីឡា ដែលត្រូវចំណាយសរុបជាង១ពាន់លានរៀល។
លោក ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា ដែលបានអញ្ជើញជាអធិបតីនៅក្នុងកម្មវិធីប្រកាសបើកការប្រកួតកីឡាក្របខណ្ឌឧត្តមសិក្សា និងមធ្យមសិក្សាបច្ចេកទេសឆ្នាំ២០២២បានមានប្រសាសន៍ថា ការប្រកួតនេះពិតជាមានសារៈសំខាន់ខ្លាំងណាស់ ។
លោកបានបន្តថា ទី១-ក្រសួងអប់រំ យុវជន និងកីឡា ចង់ឱ្យនិស្សិតដែលបានសិក្សាពេញម៉ោងមានឱកាសចូលរួមប្រកួតប្រជែងដើម្បីជ្រើសរើសអ្នកដែលមានទេពកោសល្យតំណាងឱ្យជាតិចូលរួមប្រកួតកីឡាសាកលវិទ្យាល័យអន្តរជាតិ។ ទី២-ផ្ដល់លទ្ធភាពឱ្យសហព័ន្ធកីឡាជាតិយកការប្រកួតជាការដ្ឋានអនុវត្តការងារត្រៀមលក្ខណៈឆ្ពោះទៅធ្វើជាម្ចាស់ផ្ទះកីឡាស៊ីហ្គេមលើកទី៣២ ឆ្នាំ២០២៣ ។ ទី៣-ផ្ដល់ឱកាសឱ្យមន្ត្រីបច្ចេកសហព័ន្ធកីឡាជាតិ បានបណ្ដុះបណ្ដាល ហើយបានអនុវត្តការងារជាក់ស្ដែង ដើម្បីទទួលបានចំណះដឹង និងបទពិសោធន៍ និងទី៤លើកកម្ពស់គុណភាពនៃការរៀបចំការប្រកួតត្រៀមលក្ខណៈឆ្ពោះទៅស៊ីហ្គេមឆ្នាំ២០២៣។
នៅក្នុងឱកាសនោះដែរ លោកអនុរដ្ឋលេខាធិការក្រសួងអប់រំ យុវជន និងកីឡា រូបនេះបានផ្ដាំផ្ញើទៅដល់មន្ត្រីបច្ចេកទេសទាំងអស់ដែលបានចូលរួមនៅក្នុងព្រឹត្តិការណ៍កីឡាសិស្ស-និស្សិតឧត្តមសិក្សានិងមធ្យមសិក្សាបច្ចេកទេសឆ្នាំ២០២២ ត្រូវយកចិត្តទុកដាក់ឱ្យបានខ្ពស់បំផុតក្នុងការបំពេញការងារ ៕
ចែករំលែកព័តមាននេះ