លេងបៀក្នុងឱកាសរកលុយ
- ភ្នំពេញ
រាជធានីភ្នំពេញ ៖ មួយរយៈចុងក្រោយនេះ សមត្ថកិច្ចបានចុះបង្ក្រាបកន្លែងបើកល្បែងស៊ីសង លេងបៀ លេងអាប៉ោង ជល់មាន់ ជាហូរហែមិនថា នៅរាជធានីភ្នំពេញ និងបណ្តាខេត្តនោះទេ…
រាជធានីភ្នំពេញ ៖ មួយរយៈចុងក្រោយនេះ សមត្ថកិច្ចបានចុះបង្ក្រាបកន្លែងបើកល្បែងស៊ីសង លេងបៀ លេងអាប៉ោង ជល់មាន់ ជាហូរហែមិនថា នៅរាជធានីភ្នំពេញ និងបណ្តាខេត្តនោះទេ ។
សកម្មភាពបង្ក្រាបដូច្នេះបានបង្ហាញឲ្យឃើញថា មានពលរដ្ឋមួយចំនួនបានកំពុងចំណាយពេលវេលាលេងល្បែងស៊ីសង ខណៈដែលពួកគាត់កំពុងស្ថិតនៅក្នុងឱកាសរកប្រាក់បង្កើនចំណូលឲ្យគ្រួសារ ។
ល្បែងក្រៅពីជាបទល្មើសច្បាប់ វាបានបង្កជាបញ្ហាយ៉ាងច្រើនដល់សង្គម ។ ល្បែងស៊ីសងបង្កើតឲ្យមានអំពើចោរកម្ម លួចប្លន់ អសន្តិសុខសង្គម បង្កើតអំពើហិ.ង្សា ប៉ះពាល់ការរស់នៅ ពិសេស ពិសេសលេងល្បែងនាំឲ្យពលរដ្ឋខាតពេលវេលា បាត់បង់ទ្រព្យសម្បត្តិនៅក្នុងការបង្កើនជីវភាពគ្រួសារ ។
មែនទែនទៅ ល្បែងនាំឲ្យវិនាស នេះមានចែងនៅក្នុងព្រះពុទ្ធសាសនា ។ ល្បែងស៊ីសង មិនមែនមាននៅកន្លែងដែលបើកអាជីវកម្ម បើកវង់ធំៗនោះទេ នៅតាមដងផ្លូវនានានៅភ្នំពេញជាញឹកញាប់គេសង្កេតឃើញ មានពលរដ្ឋមួយចំនួនបានព័ទ្ធវង់ នៅតាមសំយ៉ាបផ្ទះគេ ក្រោមម្លប់ដើមឈើ គៀនរបងវត្តអារាម នាំគ្នាលេងបៀ ជាក្រុមៗ ទាំងថ្ងៃតែម្តង ។
ពលរដ្ឋអ្នកលេងល្បែងបៀទាំងអស់នោះ ភាគច្រើនជាអ្នករកទទួលទាននៅក្នុងមុខរបរសេដ្ឋកិច្ចក្រៅប្រព័ន្ធ ។ ការលេងបៀទាំងថ្ងៃ អាចថា ជាកែអផ្សុក គ្មានម៉ូតទិញ គ្មានម៉ូយដឹក ឬនៅក្នុងឱកាសរង់ចាំម៉ូយជាដើម ។
ទោះក្នុងប្រការណាក៏ដោយ ការចំណាយពេលវេលាលេងបៀនេះ នឹងក្លាយជាទម្លាប់មួយ និងជាសកម្មភាពមិនសមភ្នែកមហាជន ប៉ះពាល់ដល់សង្គមជាតិ ក្នុងក្រសែភ្នែក អ្នកទេសចរណ៍ផង ។
ក្រៅពីពលរដ្ឋសាមញ្ញលែងបៀ លេងល្បែងស៊ីសងគេសង្កេតឃើញមានលេងល្បែងនៅក្នុងជួរកម្លាំង អង្គរក្ស អ្នកបើកបរឲ្យអ្នកធំផងដែរ ។ ជាកម្លាំងការពារ និងជាអ្នកបើករថយន្តឲ្យអ្នកធំ អ្នកមានប្រាក់ ពួកគាត់តែងតែជុំគ្នាលេងល្បែងស៊ីសង នៅពេលមេ ឬចៅហ្វាយនាយជាប់ប្រជុំ ជាប់មានធុរម្តងៗ ។
ក្រៅពីការលេងល្បែងនៅតាមទីសាធារណៈ ស្ត្រីមេផ្ទះមួយចំនួនតូច នៅពេលស្វាមីចេញទៅរកស៊ី ឬនៅពេលពួកគាត់ទំនេរពីការងារផ្ទះក៏តែងតែជុំគ្នាលេងបៀ តាមភូមិតាមសហគមន៍របស់គាត់ កុំឲ្យស្ងាត់ ឬកែអផ្សុកដែរ ។
សកម្មភាពលេងបៀ ឬល្បែងស៊ីសងរបស់ពលរដ្ឋនេះស្ថិតនៅក្នុងឱកាសដែលពួកគាត់សុទ្ធតែអាចប្រកបកិច្ចផ្សេងៗបាន ។ លេងបៀ បើមានមិនបង្កផលប៉ះពាល់ដល់សង្គមដល់អ្នកដទៃ វាបានក្លាយជាទម្លាប់មិនល្អមួយជាការខាតពេលវេលា នៅក្នុងការអភិវឌ្ឍន៍សង្គមគ្រួសារ និងជាការបង្រៀនទម្លាប់មិនល្អទៅដល់កូនចៅដោយមិនដឹងខ្លួន ៕
ចែករំលែកព័តមាននេះ