ប្រទេសហ្វ៊ីលីពីន ៖ សេដ្ឋកិច្ចរបស់ហ្វ៊ីលីពីនបានលូតលាស់ក្នុងល្បឿនលឿនជាងគេនារយៈពេល៣ឆ្នាំកន្លងមកនេះ ដោយបានបង្ហាញពីភាពរឹងមាំរបស់ខ្លួន ខណៈមានកំណើននៃការវិនិយោគ និងការចំណាយក្នុងស្រុក ។
អាជ្ញាធរស្ថិតិរបស់ប្រទេសហ្វ៊ីលីពីនបាននិយាយក្នុងទីក្រុងម៉ានីល កាលពីថ្ងៃព្រហស្បតិ៍ថា ផលិតផលក្នុងស្រុកសរុបបានកើនឡើង៧,១% បើធៀបនឹងឆ្នាំមុន ហើយបើធៀបនឹងត្រីមាសមុនវិញ GDP បានកើនឡើង១,២% ។
យោងតាមការស្ទង់មតិអ្នកសេដ្ឋកិច្ចឲ្យដឹងថា ដោយគ្មានការប៉ះពាល់ពីហានិភ័យទាំងឡាយដូចជាគំនិតការពារនិយមរបស់លោក Donald Trump និងការរិះគន់របស់លោកប្រធានាធិបតី Rodrigo Duterte លើសហរដ្ឋអាមេរិក សេដ្ឋកិច្ចរបស់ប្រទេសនេះនឹងមានការលូតលាស់ច្រើនជាង៦%រហូតដល់ឆ្នាំ២០១៨ និងក្លាយជាប្រទេសលូតលាស់លឿនជាងគេក្នុងពិភពលោក ។
ជាមួយគ្នានេះ ការលូតលាស់កាលពីត្រីមាសមុន គឺមានអត្រាច្រើនជាងប្រទេសចិនដែលស្មើនឹង៦,៧% និងវៀតណាមស្មើនឹង៦,៤%។ ចំណែកប្រទេសឥណ្ឌា ដែលបានលូតលាស់៧,១%ក្នុងត្រីមាសទី២ គឺមិនទាន់ប្រកាសពីអត្រាសម្រាប់ត្រីមាសទី៣ នៅឡើយទេ ។
ខណៈមានប្រជាជនក្មេងៗច្រើន ក៏ដូចជាជំនួយពីក្រៅប្រទេសផងនោះ ប្រទេសហ្វ៊ីលីពីនត្រូវបានជំរុញដោយគម្រោងហេដ្ឋារចនាសម្ព័ន្ធតម្លៃ១៦០ប៊ីលានដុល្លាររបស់លោក Duturte ដែលមានគោលដៅបង្កើតការងារបន្ថែម។ គម្រោងទាំងនោះរួមមាន គម្រោងសាងសង់អាកាសយានដ្ឋានមួយ និងផ្លូវរថភ្លើងដែលមានតម្លៃ១ប៊ីលានដុល្លារ ដើម្បីប្រែក្លាយជំរំទាហានអាមេរិកទៅជាកន្លែងប្រកបអាជីវកម្មវិញ ។
លោក Gareth Leather ឧត្តមអ្នកសេដ្ឋកិច្ចអាស៊ីក្នុង Capital Economics Ltd នៅទីក្រុងឡុងដ៍ ឲ្យដឹងថា ៖ « ក្នុងរយៈពេលខ្លី ពួកយើងគិតថា សេដ្ឋកិច្ចនឹងបន្តលូតលាស់ក្នុងល្បឿនដ៏សមរម្យមួយ ។ មូលដ្ឋានទាំងអស់មានគ្រប់គ្រាន់ហើយសម្រាប់ការលូតលាស់រឹងមាំ ប៉ុន្តែព្រឹត្តិការណ៍នយោបាយទាំងក្នុងសហរដ្ឋអាមេរិក និងក្នុងស្រុកនាពេលថ្មីៗនេះបានធ្វើឲ្យអនាគតមិនទាន់ច្បាស់លាស់នៅឡើយ » ។
ចំណែកលោក John Padilla ដែលបានជួយគ្រប់គ្រងប្រាក់ប្រមាណ៩,១ប៊ីលានដុល្លារក្នុង Metropolitan Bank & Trust Co ឲ្យដឹងថា ៖ « ការចំណាយប្រាក់លើភាគហ៊ុនដែលទាក់ទងនឹងហេដ្ឋារចនាសម្ព័ន្ធ គឺជាការវិនិយោគដ៏ល្អបំផុត ហើយវាជាអ្វីដែលខ្ញុំកំពុងធ្វើ ។ ការលូតលាស់នេះបង្កបញ្ហាបន្ថែមទៅដល់លោកប្រធានាធិបតី Duterte ក្នុងការរក្សាល្បឿននេះ។ វាក៏បានបញ្ជាក់ឲ្យកាន់តែច្បាស់ថា ប្រទេសហ្វ៊ីលីពីនត្រូវការហេដ្ឋារចនាសម្ព័ន្ធដើម្បីរក្សាការលូតលាស់នេះ » ៕
ចែករំលែកព័តមាននេះ