ទីក្រុងប៉េកាំង ៖ ប្រទេសចិនបានរឹតបន្តឹងច្បាប់នាំចេញធនធានរ៉ែកម្រសំខាន់ៗ សម្រាប់ការផលិត ផលិតផលបច្ចេកវិទ្យាកម្រិតខ្ពស់ជាច្រើន។ បទប្បញ្ញត្តិថ្មីនេះ ត្រូវបានប្រកាសដោយក្រសួងពាណិជ្ជកម្មប្រទេសមួយនេះ ដើម្បីការពារសន្តិសុខជាតិ និងផ្អែកលើច្បាប់ដែលមានស្រាប់ពាក់ព័ន្ធបច្ចេកវិទ្យាកែច្នៃ និងកិច្ចសហប្រតិបត្តិការក្រៅប្រទេសដែលគ្មានការអនុញ្ញាត។…
ទីក្រុងប៉េកាំង ៖ ប្រទេសចិនបានរឹតបន្តឹងច្បាប់នាំចេញធនធានរ៉ែកម្រសំខាន់ៗ សម្រាប់ការផលិត ផលិតផលបច្ចេកវិទ្យាកម្រិតខ្ពស់ជាច្រើន។ បទប្បញ្ញត្តិថ្មីនេះ ត្រូវបានប្រកាសដោយក្រសួងពាណិជ្ជកម្មប្រទេសមួយនេះ ដើម្បីការពារសន្តិសុខជាតិ និងផ្អែកលើច្បាប់ដែលមានស្រាប់ពាក់ព័ន្ធបច្ចេកវិទ្យាកែច្នៃ និងកិច្ចសហប្រតិបត្តិការក្រៅប្រទេសដែលគ្មានការអនុញ្ញាត។ នេះបើយោងតាមប្រភពពីសារព័ត៌មាន BBC ចេញផ្សាយនៅថ្ងៃទី៩ ខែតុលា ឆ្នាំ២០២៥។
ប្រទេសចិនក៏ទំនងជាបិទការនាំចេញទៅកាន់ក្រុមហ៊ុនផលិតអាវុធបរទេស និងក្រុមហ៊ុនផលិតបន្ទះឈីប ឬផលិតផលពាក់កណ្តាលសម្រេច (Semiconductor) មួយចំនួនផងដែរ។ ការនាំចេញធនធានរ៉ែកម្រ គឺជាចំណុចជាប់គាំងដ៏សំខាន់មួយក្នុងការចរចារយៈពេលជាច្រើនខែរវាងចិន និងសហរដ្ឋអាមេរិក ជុំវិញបញ្ហាពាណិជ្ជកម្ម និងពន្ធគយ។
ការប្រកាសថ្មីនេះ ធ្វើឡើងស្របពេលប្រធានាធិបតីចិន លោក ស៊ី ជិនភីង (Xi Jinping) និងប្រធានាធីបតីសហរដ្ឋអាមេរិក លោក ដូណាល់ ត្រាំ (Donald Trump) ត្រូវបានគេរំពឹងថានឹងជួបគ្នា នៅចុងខែតុលានេះ។
ក្រសួងពាណិជ្ជកម្មចិនបានបញ្ជាក់ថា បច្ចេកវិទ្យាដែលប្រើក្នុងការជីកយករ៉ែ និងកែច្នៃធនធានរ៉ែកម្រ អាចនាំចេញបានលុះត្រាមានការអនុញ្ញាតពីរដ្ឋាភិបាល ដ្បិតបច្ចេកវិទ្យាទាំងនេះជាច្រើន ត្រូវបានដាក់កម្រិតរួចទៅហើយ។
ប្រទេសចិនបានបញ្ជូលប្រភេទធនធានរ៉ែកម្រ និងសម្ភារៈពាក់ព័ន្ធមួយចំនួនទៅក្នុងបញ្ជីត្រួតពិនិត្យការនាំចេញរបស់ខ្លួន កាលពីខែមេសាកន្លងទៅ ដែលបណ្តាលឱ្យមានការខ្វះខាតយ៉ាងខ្លាំងនៅពេលនោះ។ ប៉ុន្តែការប្រកាសថ្មីនេះបញ្ជាក់យ៉ាងច្បាស់ថា អាជ្ញាប័ណ្ណទំនងជាមិនត្រូវបានចេញឱ្យក្រុមហ៊ុនផលិតអាវុធ និងក្រុមហ៊ុនមួយចំនួនក្នុងឧស្សាហកម្មផលិតបន្ទះឈីបនោះទេ។ ជាមួយគ្នានោះ បណ្តាក្រុមហ៊ុនចិនក៏ត្រូវបានហាមឃាត់មិនឱ្យធ្វើការជាមួយក្រុមហ៊ុនបរទេសលើការងារពាក់ព័ន្ធធនធានរ៉ែក្រម ដោយគ្មានការអនុញ្ញាតពីរដ្ឋាភិបាលផងដែរ។
ប្រទេសចិនត្រូវបានចោទប្រកាន់ដោយសហរដ្ឋអាមេរិក និងបណ្តាប្រទេសលោកខាងលិចផ្សេងទៀតថាបានជួយដល់សង្គ្រាមរបស់រុស្ស៊ីលើអ៊ុយក្រែន ដោយអនុញ្ញាតឱ្យមានការនាំចេញពាក់ព័ន្ធវិស័យបច្ចេកវិទ្យា ក៏ដូចជាសម្ភារៈអាចប្រើសម្រាប់គោលបំណងស៊ីវិល ឬយោធា ដែលត្រូវបានបញ្ជូនទៅកាន់ប្រទេសរុស្ស៊ី បើទោះបីជាចិនបានបដិសេធម្តងហើយម្តងទៀតអំពីការចោទប្រកាន់នេះ។
បទប្បញ្ញត្តិថ្មីរបស់ចិន ស្រដៀងគ្នាទៅនឹងបទប្បញ្ញត្តិរបស់អាមេរិក ដែលរារាំងប្រទេសនានាមិនឱ្យលក់ឧបករណ៍ផលិតបន្ទះឈីបទៅឱ្យប្រទេសចិន។ អាមេរិកបានប្រើប្រាស់វិធានការទាំងនោះ ដើម្បីពន្យឺតការអភិវឌ្ឍន៍របស់ចិនលើការផលិតបន្ទះឈីបដ៏មានឥទ្ធិពល ដែលអាចត្រូវបានប្រើសម្រាប់ការស៊ើបការណ៍ដោយភ្ជាប់ជាមួយបច្ចេកវិទ្យាបញ្ញាសិប្បនិម្មិត AI ទៅនឹងកម្មវិធីយោធា៕
ចែករំលែកព័តមាននេះ