សហរដ្ឋអាមេរិក ៖ លោក Elon Musk មហាសេដ្ឋីបច្ចេកវិទ្យាដ៏ល្បីសញ្ជាតិអាមេរិក បានក្លាយជាមនុស្សដំបូងគេលើពិភពលោក ជាមួយទ្រព្យសម្បត្តិសរុបឈានដល់ជាង ៥០០ពាន់លានដុល្លារអាមេរិក ជំរុញដោយតម្លៃភាគហ៊ុនក្រុមហ៊ុនរថយន្តអគ្គិសនី…
សហរដ្ឋអាមេរិក ៖ លោក Elon Musk មហាសេដ្ឋីបច្ចេកវិទ្យាដ៏ល្បីសញ្ជាតិអាមេរិក បានក្លាយជាមនុស្សដំបូងគេលើពិភពលោក ជាមួយទ្រព្យសម្បត្តិសរុបឈានដល់ជាង ៥០០ពាន់លានដុល្លារអាមេរិក ជំរុញដោយតម្លៃភាគហ៊ុនក្រុមហ៊ុនរថយន្តអគ្គិសនី Tesla និងអាជីវកម្មផ្សេងទៀតរបស់លោក បន្តកើនឡើងនៅឆ្នាំនេះ។ នេះបើតាមប្រភពពី BBC ចេញផ្សាយនៅថ្ងៃទី២ ខែតុលា ឆ្នាំ២០២៥។
ទិន្នន័យពីទស្សនាវដ្តី Forbes បានរាយការណ៍ថា ទ្រព្យសុទ្ធរបស់មហាសេដ្ឋីបច្ចេកវិទ្យា ស្ថាបនិកក្រុមហ៊ុន SpaceX ហើយក៏ជានាយកប្រតិបត្តិក្រុមហ៊ុន Tesla វ័យ៥៤ឆ្នាំរូបនេះ បានឡើងដល់ ៥០០,១ពាន់លានដុល្លារក្នុងរយៈពេលខ្លី កាលពីរសៀលថ្ងៃទី១ ខែតុលា កន្លងទៅ (ម៉ោងនៅទីក្រុងញូវយ៉ក) មុនពេលធ្លាក់ចុះបន្តិចមកត្រឹមតែជាង ៤៩៩ពាន់លានដុល្លារ នៅថ្ងៃបន្ទាប់ (ថ្ងៃទី២ តុលា)។
ទន្ទឹមនឹងការកើនឡើងតម្លៃលើការបណ្តាក់ទុនរបស់ក្រុមហ៊ុន Tesla នោះ អាជីវកម្មផ្សេងទៀតរបស់លោក រួមទាំងការចាប់ផ្តើមបង្កើតក្រុមហ៊ុន xAI ផ្តោតលើបញ្ញាសិប្បនិមិត្ត AI និងក្រុមហ៊ុនបច្ចេកវិទ្យាអវកាស SpaceX ត្រូវបានរាយការណ៍ថា ក៏បានកើនឡើងផងដែរ នៅក្នុងប៉ុន្មានខែថ្មីៗនេះ។ តាមរយៈប្រាក់ចំណូលកើនឡើងឥតឈប់ឈរនេះហើយ បានពង្រឹងឋានៈរបស់លោក Elon Musk បន្តឈរជាបុគ្គលមានទ្រព្យសម្បត្តិច្រើនជាងគេបំផុតលើពិភពលោក ដោយនាំមុខមហាសេដ្ឋីជាគូប្រជែងផ្សេងទៀតនៅក្នុងវិស័យបច្ចេកវិទ្យាពិភពលោក។
តាមទិន្នន័យពីទស្សនាវដ្ដី Forbes លោក Larry Ellison មហាសេដ្ឋីអាមេរិក ស្ថាបនិកក្រុមហ៊ុនបច្ចេកវិទ្យា Oracle គឺជាអ្នកមានបំផុតទី ២ លើពិភពលោក ដែលមានទ្រព្យសុទ្ធប្រហែល ៣៥០,៧ពាន់លានដុល្លារ។ កាលពីខែមុន លោក Ellison បានក៏បង្កើតរឿងដ៏ភ្ញាក់ផ្អើលមួយ ដោយទ្រព្យសម្បត្តិរបស់លោកបានវ៉ាដាច់លោក Elon Musk នៅក្នុងរយៈពេលខ្លី បន្ទាប់ពីភាគហ៊ុនរបស់ Oracle បានកើនឡើងជាង ៤០%។
ទ្រព្យសម្បត្តិមួយផ្នែកធំរបស់លោក Elon Musk កើតចេញពីភាគហ៊ុនច្រើនជាង ១២% នៅក្នុងក្រុមហ៊ុន Tesla ដែលបានមើលឃើញថា ភាគហ៊ុនកើនឡើងយ៉ាងខ្លាំងនៅក្នុងឆ្នាំនេះ។ ភាគហ៊ុនរបស់ក្រុមហ៊ុន Tesla បានកើនឡើងច្រើនជាង ៣,៣% នៅថ្ងៃបិទការជួញដូរនៅទីក្រុងញូវយ៉ក កាលពីថ្ងៃទី១ តុលា កន្លងទៅ ហើយឥឡូវនេះ បានកើនឡើងជាង ២០% ហើយ នៅឆ្នាំនេះ។
ភាគហ៊ុនរបស់ក្រុមហ៊ុនផលិតរថយន្តអគ្គិសនីមួយនេះ បាននិងកំពុងកើនឡើងក្នុងរយៈពេលប៉ុន្មានខែថ្មីៗនេះ ដោយសារតែវិនិយោគិនស្វាគមន៍ និងរីករាយជាមួយលោក Elon Musk ដែលកំពុងផ្តោតលើពេលវេលាបន្ថែមទៀតលើក្រុមហ៊ុនជាជាងឆាកនយោបាយ។ ស្របពេលដែល Tesla បានប្រឈមមុខនឹងបញ្ហាជាច្រើនក្នុងប៉ុន្មានឆ្នាំថ្មីៗនេះ រួមទាំងការប្រកួតប្រជែងដ៏ស្វិតស្វាញពីក្រុមហ៊ុនផលិតរថយន្តអគ្គិសនីដែលជាគូប្រជែងដូចជាក្រុមហ៊ុន BYD របស់ចិនជាដើម។ ទោះយ៉ាងណាក៏ដោយ ក្រុមហ៊ុន Tesla ក៏កំពុងស្ថិតក្នុងដំណើរការផ្លាស់ប្តូរទៅជាអាជីវកម្ម AI និងមនុស្សយន្តផងដែរ៕
ចែករំលែកព័តមាននេះ