រាជធានីភ្នំពេញ ៖ ក្រុមជម្រើសជាតិកម្ពុជា ដែលមានរហស្សនាមថា«គោព្រៃកម្ពុជា» បានបាត់បង់អស់៣ពិន្ទុសម្រាប់ថ្ងៃបើកឆាកពូល B នៃពានរង្វាន់ AFF Suzuki Cup 2016 បន្ទាប់ពីប្រកួតចាញ់ក្រុមជម្រើសជាតិម៉ាឡេស៊ីដែលមានរហស្សនាមថា «ខ្លាម៉ាឡេស៊ី» ដោយលទ្ធផល ២-៣ ក្នុងជំនួបវគ្គសន្សំពិន្ទុកាលពីថ្ងៃទី២០ វិច្ឆិកា នៅកីឡដ្ឋានThuwunna ក្នុងទីក្រុង Yangon ប្រទេសមីយ៉ាន់ម៉ា ។ ប៉ុន្តែជម្នះរបស់ក្រុមខ្លាម៉ាឡេស៊ីទទួលបានដោយភាពតានតឹងបំផុត ដោយសារក្រុមគោព្រៃកម្ពុជារកបានគ្រាប់បាល់នាំមុខចំនួន២លើកមុន ។
នៅតង់ទី១ កីឡាករ ចាន់ វឌ្ឍនាកា ដែលជាខ្សែប្រយុទ្ធឆ្នើមរបស់ក្រុមគោព្រៃកម្ពុជាបានបំប៉ោងសំណាញ់ទីក្រុមខ្លាម៉ាឡេស៊ី ១គ្រាប់នៅនាទីទី៨ មុននឹងកីឡាករSyazwan Zainon ជួយក្រុមម៉ាឡេស៊ីតាមស្មើវិញនៅនាទីទី៣៧ ។
ឈានចូលតង់ទី២ ខ្សែប្រយុទ្ធឆ្នើមមកពីក្លិបបឹងកេតអង្គរដែលមានរហស្សនាមថា «ម៉ាស៊ីនផលិតគ្រាប់បាល់-Goal Maker Machine» ចាន់ វឌ្ឍនាកា ដដែល បានជួយក្រុមគោព្រៃកម្ពុជានាំមុខ ២-១ ជាថ្មីលើក្រុមខ្លាម៉ាឡេស៊ីនៅនាទីទី៥៩ ធ្វើឱ្យស្ថានការណ៍ប្រកួតនៅលើសមរភូមិវាលស្មៅមួយនេះកាន់តែឡើងកម្ដៅទ្វេដង ។
ជាពិសេសក្រុមខ្លាម៉ាឡេស៊ីដែលគ្មានប្រវត្តិចាញ់ក្រុមគោព្រៃកម្ពុជាទាល់តែសោះក្នុងជំនួប៤លើកនាពេលកន្លងមកនោះ ពេលក្រុមមួយនេះអាចរកគ្រាប់បាល់នាំមុខម្ដងហើយម្ដងទៀតបែបនេះ ធ្វើឱ្យក្រុមគេក្ដៅក្រហាយយ៉ាងខ្លាំងក៏បើកការលេងសម្រុកក្នុងលក្ខណៈ«ដាច់ជើងចោល» ។
ស្ថិតក្នុងស្ថានភាពបែបនេះបណ្ដាលឱ្យក្រុមគោព្រៃកម្ពុជាដែលមិនចង់លេងទប់នោះមានចន្លោះប្រហោងនៅតំបន់ការពារទើបបណ្ដោយឱ្យកីឡាករ Amri Yahyah របស់ក្រុមខ្លាម៉ាឡេស៊ី រកបានគ្រាប់បាល់នាំមុខក្រុមខ្លួន៣-២ វិញនៅនាទីទី៦៩ និង៨០ ហើយលទ្ធផលចាញ់ទាំងមិនអស់ចិត្តរបស់ក្រុមគោព្រៃកម្ពុជានេះបានរក្សារហូតដល់ចប់ការប្រកួតពេញម៉ោងតែម្ដង ។
ក្រុមខ្លាម៉ាឡេស៊ី ជាបណ្ដោះអាសន្នពេលនេះកំពុងឈរនៅកំពូលតារាងពូលB ដោយមាន៣ពិន្ទុក្នុងដៃ រីឯក្រុមគោព្រៃកម្ពុជាក៏មិនទាន់អស់សង្ឃឹមដែរ ដោយសារនៅសល់២ប្រកួតទៀតដែលត្រូវជួបក្រុមម្ចាស់ផ្ទះមីយ៉ាន់ម៉ានៅថ្ងៃទី២៣ វិច្ឆិកា និងជួបក្រុមវៀតណាមនៅថ្ងៃទី២៦ ខែវិច្ឆិកា ក្នុងពេលទម្រង់លេងរបស់ក្រុមគោព្រៃកម្ពុជានៅពេលនេះ ត្រូវបានគេមើលឃើញថា មានការរីកចម្រើនជាងមុន ។
គួរបញ្ជាក់ថា ក្រុមម្ចាស់ផ្ទះមីយ៉ាន់ម៉ាដែលត្រូវជួបក្រុមគោព្រៃកម្ពុជានៅថ្ងៃទី២៣ វិច្ឆិកា ស្អែកនេះ បានចាញ់ក្រុមវៀតណាម១-២ក្នុងថ្ងៃបើកឆាកប្រកួតដំបូងរបស់ខ្លួនផងដែរ៕
ចែករំលែកព័តមាននេះ