រាជធានី​ភ្នំពេញ ៖ សេចក្តី​ប្រកាស​ព័ត៌មាន​របស់​ស្ថានទូត​សហរដ្ឋ​ប្រចាំ​ព្រះរាជាណាចក្រ​កម្ពុជា ចេញ​នៅ​ថ្ងៃ​ទី​១៧ ខែវិច្ឆិកា ឆ្នាំ​២០១៦ បាន​ឲ្យ​ដឹង​ថា បើ​យោង​តាម​របាយការណ៍​មួយ​ដែល​មានឈ្មោះ​ថា របាយការណ៍​ទ្វារ​បើកចំហ ឆ្នាំ​២០១៦ ស្តី​ពី​ការ​ផ្លាស់​ប្តូរ​ផ្នែក​សិក្សាអប់រំ​អន្តរជាតិ ដែល​បាន​ចេញ​នៅ​ស​ប្តា​ហ៍​នេះ រក​ឃើញ​ថា ចំនួន​និស្សិត​អន្តរជាតិ​ដែល​កំពុង​សិក្សា​នៅ​តាម​មហាវិទ្យាល័យ និង​សាកលវិទ្យាល័យ ក្នុង​សហរដ្ឋអាមេរិក​មាន​ចំនួន​លើក​ស​ពី​១​លាន​នាក់​ជា​លើក​ដំបូង​នៅ​ក្នុង​ឆ្នាំ​សិក្សា​២០១៥-២០១៦ ដែល​ជា​ចំនួន​កើនឡើង​ចំនួន​៧%​លើស​ឆ្នាំ​មុន គឺ​មាន​ចំនួន​ឡើង​ដល់​១.០៤៤.០០០​នាក់ ដែល​ត្រូវជា​ចំនួន​៥%​នៃ​និស្សិត​សរុប​នៅ​ក្នុង​ស្ថាប័ន ក្នុង​សហរដ្ឋអាមេរិក ។

របាយការណ៍​នេះ​ក៏​បាន​បង្ហាញ​ផង​ដែរ​នូវ​កំណើន​នៃ​ចំនួន​សិស្ស និស្សិត​កម្ពុជា ដែល​កំពុង​សិក្សា​ក្នុង​សហរដ្ឋអាមេរិក​គឺ​កើន​ពី​ចំនួន​៤៩២​នាក់​នៅ​ឆ្នាំ​២០១៤-២០១៥ ដល់​ចំនួន​៤៩៩​នាក់​នៅ​ក្នុង​ឆ្នាំ​២០១៥-២០១៦ ពោល​គឺ​មាន​កំណើន​ចំនួន​១,៤% ។

លោក Jay Raman ប្រធាន​ផ្នែក​កិច្ចការ​សាធារណៈ​របស់​ស្ថានទូត​អា​មេ​រិ​ក បាន​មាន​ប្រសាសន៍​ថា «​ការ​អង្កេត​នៅ​ឆ្នាំ​នេះ​បង្ហាញ​ថា ពេល​នេះ​មាន​សិស្ស​-​និស្សិត​កម្ពុជា​ច្រើន​ជាង​ពេល​ណា​ទាំងអស់​បំពេញ​ការ​ស្រ​ម៉ៃ​របស់​គេ ក្នុង​ការ​បាន​សិក្សា​នៅ​តាម​មហាវិទ្យាល័យ និង​សាកលវិទ្យាល័យ ក្នុង​សហរដ្ឋអាមេរិក ។ ស្ថានទូត​អា​មេ​រិ​ក និង​មជ្ឈមណ្ឌល​ផ្តល់​ប្រឹក្សា​ស្តី​ពី​ការ​សិក្សា​នៅ​ក្នុង​សហរដ្ឋអាមេរិក (EducationUSA) កំពុង​ត្រៀមខ្លួន​ជួយ​ប្រជាជន​កម្ពុជា​នៅ​ក្នុង​ការ​ស្វែង​យល់​បន្ថែម​ពី​ដំណើរការ និង​រក​មើល​វិធី​ក្នុង​ការ​ជួយ​រក​ថវិកា​សំរាប់​ការ​សិក្សា​របស់​គេ ។ យើង​សង្ឃឹមថា នឹង​មាន​សិស្ស​-​និស្សិត​កម្ពុជា​ច្រើន​ថែម​ទៀត​ដាក់​ពាក្យ​សិក្សា​ក្នុង​សហរដ្ឋអាមេរិក​នៅ​ឆ្នាំ​ខាង​មុខ​ៗ» ។

EducationUSA គឺជា​បណ្តាញ​មួយ​នៃ​មជ្ឈមណ្ឌល​ផ្តល់​ប្រឹក្សា​ដល់​និស្សិត​អន្តរជាតិ​ចំនួន​ជាង​៤០០​របស់​ក្រសួងការបរទេស​សហរដ្ឋអាមេរិក ដែល​មាននៅ​តាម​ប្រទេស​ចំនួន​ជាង​១៧០ ។ មជ្ឈមណ្ឌល​ទាំងនេះ​ផ្តល់​ព័ត៌មាន​ស្តី​ពី​ស្ថាប័ន​អប់រំ​នៅ​សហរដ្ឋអាមេរិក និង​ការ​ណែនាំ​ដល់​អ្នក​ដែល​មាន​លក្ខណៈសម្បត្តិ​គ្រប់គ្រាន់​ក្នុង​ការ​ដាក់​ពាក្យ​ទៅ​សិក្សា​នៅ​សហរដ្ឋអាមេរិក ។ មជ្ឈមណ្ឌល EducationUSA ដែល​ផ្តល់​ប្រឹក្សា​នៅ​កម្ពុជា​មាន​ទីតាំង​ស្ថិត​នៅ​ក្នុង​សាកលវិទ្យាល័យ​បញ្ញា​សាស្ត្រ​នៃ​កម្ពុជា ។

ធនធាន​ព័ត៌មាន​មួយទៀត​ដែល​ស្ថានទូត​អា​មេ​រិ​ក​អាច​ផ្តល់​អោយ​បាន​សំរាប់​ប្រជាជន​កម្ពុជា​ដែល​មានការ​ចាប់អារម្មណ៍​ចង់​សិក្សា​នៅ​ក្នុង​សហរដ្ឋអាមេរិក គឺ​បណ្ណាល័យ​របស់​ស្ថានទូត​អា​មេ​រិ​ក ។ ដោយ​មាន​ទីតាំង​ស្ថិត​នៅ​ក្រុងភ្នំពេញ ខេត្តសៀមរាប បាត់ដំបង និង​ខេត្តកំពង់ចាម បណ្ណាល័យ​និ​មួយ​ៗ​របស់​ស្ថានទូត​អា​មេ​រិ​ក​មាន​សៀវភៅ​និង​ព័ត៌មាន​ផ្សេង​ៗ ឯកសារ​ណែនាំ​សំរាប់​សិស្ស និស្សិត​ជា​ច្រើន​ជា​ភាសា​អង់គ្លេស គេហទំព័រ​ស្តី​ពី សាកលវិទ្យាល័យ​និង​អាហារូបករណ៍ ឯកសារ​ត្រៀម​សំរាប់​ការ​ធ្វើតេស្ត និង​ព័ត៌មាន​ស្តី​ពី​ទិដ្ឋាការ​សិស្ស ។

ចំពោះ​ទិន្នន័យ ព័ត៌មាន​ជា​ក្រាហ្វិក និង​ធនធាន​ព័ត៌មាន​នានា​ស្តី​ពី​របាយការណ៍​ទ្វារ​បើកចំហ ឆ្នាំ​២០១៦ ស្តី​ពី​ការ​ផ្លាស់​ប្តូរ​ផ្នែក​សិក្សាអប់រំ​អន្តរជាតិ សូម​ចូល​មើល​គេហទំព័រ http://www.iie.org/ Open-Doors ។

ចំពោះ​ព័ត៌មាន​បន្ថែម​ស្តី​ពី​មជ្ឈមណ្ឌល EducationUSA និង​បណ្ណាល័យ​របស់​ស្ថានទូត​អា​មេ​រិ​ក នៅ​កម្ពុជា សូម​ចូល​មើល​គេហទំព័រ http://cambodia.usembassy.gov/education_advice.html និង​គេហទំព័រ http://cambodia.usembassy.gov/american_corners_in_cambodia.html ៕