រាជធានីភ្នំពេញ ៖ នៅរសៀលថ្ងៃសៅរ៍ទី១៩ វិច្ឆិកា ខានស្អែកនេះ ប្រដាល់អន្តរជាតិរបស់ក្រុមហ៊ុនខារ៉ាបាវ នៅតែបើកការប្រកួតរវាងកីឡាករកម្ពុជា និងបរទេសដដែល បើទោះជាព្រឹត្តិការណ៍នេះបានបញ្ចប់ការប្រកួតដណ្ដើមជើងឯកអន្តរជាតិតាំងពីមុនអុំទូកក្ដី ។ នេះជាការប្រកួតមិត្តភាពអន្តរជាតិក្នុងពេលការប្រកួតដណ្ដើមខ្សែក្រវាត់ថ្មីមិនទាន់ចាប់ផ្ដើម។ កីឡាករ សូត្រ ប៊ុនធី និង មាស ច័ន្ទមាន ក្លាយជាបេក្ខភាពឡើងប្រកួតជាមួយកីឡាករថៃនៅក្នុងសប្ដាហ៍នេះដើម្បីសាកល្បងសមត្ថភាពគ្នានៅលើសង្វៀន។
ការប្រកួតដែលនឹងចាប់ផ្ដើមឡើងពីម៉ោង២រសៀលក្រោមការរៀបចំរបស់ក្រុមហ៊ុនភេសជ្ជៈខារ៉ាបាវនៅលើសង្វៀនទូរទស្សន៍អាស៊ីអាគ្នេយ៍នេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិកាលពីសប្ដាហ៍មុនៗនោះទេ ដោយសារតែភាពជាក់ស្ដែងគឺព្រឹត្តិការណ៍នេះធ្វើឡើងនៅមុនពេលការប្រកួតដណ្ដើមខ្សែក្រវាត់ដំណើរការ ។
កីឡាករកម្ពុជា២រូប គឺ សូត្រ ប៊ុនធី និង មាស ច័ន្ទមាន គឺជាគូប្រកួតស៊ីសាច់ហុតឈាមជាមួយកីឡាករថៃនៅរសៀលថ្ងៃសៅរ៍នោះ។ អ្នករៀបចំការប្រកួតបានអះអាងថា កីឡាករទាំង៤រូបមានបំណងប៉ះគ្នាយូរហើយមុនពេលមានការសម្រេចរៀបចំព្រឹត្តិការណ៍អន្តរជាតិខារ៉ាបាវឲ្យពួកគេប្រកួតគ្នា ។ ក្នុងនោះភាគីកីឡាករកម្ពុជាបានទាំងសុំខ្លួនឯងសាកកណ្ដាប់ដៃគ្នាជាមួយកីឡាករថៃដែលត្រូវមកប្រកួតតាំងពីឮមានការផ្គូផ្គងនោះផង ដោយមិនមែនជាការផ្គូផ្គងបែបចាប់បង្ខំនោះឡើយ ។
លោក ញាណ សុធី អ្នករៀបចំកម្មវិធីប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ឱ្យ សូត្រ ប៊ុនធី មកពីក្លិបបក្សាស្លាបដែក ឱ្យឡើងប៉ះប្រកួតជាមួយកីឡាកថៃឈ្មោះយ៉ត សាយ៉ាម ក្នុងនាមជាគូបើកឆាកអន្តរជាតិជាប្រភេទមិត្តភាពសម្រាប់ប្រដាល់អន្តរជាតិរបស់ព្រឹត្តិការណ៍នេះ ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងចង់ឱ្យគេប៉ះគ្នាជាមួយគូបរទេសនៅក្នុងព្រឹត្តិការណ៍នេះដើម្បីបើកឆាកការប្រកួតមិត្តភាពតែម្ដង ដើម្បីកំដរសង្វៀនខារ៉ាបាវនៅពេលការប្រកួតដណ្ដើមខ្សែក្រវាត់រដូវកាលទី២នៅមិនទាន់ចាប់ផ្ដើម ។ លោកថា កីឡាករ សូត្រ ប៊ុនធី អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិខារ៉ាបាវ ដែលជាព្រឹត្តិការណ៍ចម្រុះដោយកីឡាករខ្លាំងៗនៅក្នុងពិភពប្រដាល់ ហើយមានការចាប់អារម្មណ៍ខ្លាំងតាំងពីមុនការប្រដាល់ដណ្ដើមខ្សែក្រវាត់រដូវកាលទី១មិនទាន់ចាប់ផ្ដើម ។
លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករកម្ពុជាសូត្រ ប៊ុនធី ទើបសម្រេចចិត្តឱ្យគេឡើងប្រកួតជាមួយកីឡាករថៃខាងលើជាថ្មីក្នុងពេលដែលគេទើបនឹងឈ្នះកីឡាករថៃមុននោះផងដែរ ។ លោកនិយាយថា៖«សម្រាប់គូនេះ កីឡាករថៃល្អ ប៉ុន្តែខ្ញុំពេញចិត្តលើសូត្រ ប៊ុនធី ច្រើនដែរ ទើបដាក់ឱ្យសាកលមើល ហើយខ្ញុំជឿថាពួកគេនឹងប្រកួតគ្នាបានល្អ!» ។ លោកថា កីឡាករថៃយ៉ត សាយ៉ាម ធ្លាប់ប្រកួត៨០លើក ឈ្នះ៦៥លើក ចាញ់១៤លើក និងស្មើ១លើក ក្នុងពេលដែលកីឡាករកម្ពុជាក៏ប្រកួតបានប្រហាក់ប្រហែលគ្នាគឺ៨១លើក ឈ្នះ៦៧លើក ចាញ់១១លើក និងស្មើ៣លើក ដែលលោកយល់ថាពួកគេនឹងអាចតតាំងគ្នាបានដោយស្មើភាពនៅលើសង្វៀនខារ៉ាបាវនាថ្ងៃសៅរ៍ខានស្អែកនេះ ។
សម្រាប់កីឡាករ មាស ច័ន្ទមាន លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងរបស់ថៃឈ្មោះកង សាយ៉ាម នៅក្នុងព្រឹត្តិការណ៍ប្រដាល់អន្តរជាតិខារ៉ាបាវនេះដែរ ។ លោកថា ការប្រកួតរបស់គូនេះ នៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែលកីឡាករ មាស ច័ន្ទមាន ជួនក៏ប្រកួតល្អ ហើយជួនក៏ប្រកួតមិនល្អ ។ លោកថា កីឡាករថៃធ្លាប់ប្រកួតបាន៨០លើក ឈ្នះ៧០លើក និងចាញ់១០លើក រីឯកីឡាករកម្ពុជាធ្លាប់ប្រកួតបាន១១៥លើក ឈ្នះ៨៧លើក ចាញ់២៧លើក និងស្មើ១៣លើក ដែលបង្ហាញថាបទពិសោធន៍ប្រកួតរបស់កីឡាករកម្ពុជាខ្ពស់ជាងច្រើនជាង ។ យ៉ាងណាក៏ដោយកីឡាករកម្ពុជាមិនអាចមើលស្រាលសមត្ថភាពកីឡាករថៃបានទេ ដោយសារតែសមាសភាពកីឡាករថៃក៏មិនមែនធម្មតា ។
គូនេះមានការរំពឹងខ្ពស់ថានឹងមានអ្នកជក់ចិត្តដិតអារម្មណ៍ភាគច្រើន ដោយសារតែ មាស ច័ន្ទមាន ក៏មិនចង់ធ្លាក់ចុះក្រេឌីត ហើយកីឡាករថៃក៏មិនចង់ចាញ់នាំឱ្យមានការរិះគន់ ។ ដោយឡែកនៅក្នុងព្រឹត្តិការណ៍ប្រដាល់នាយប់ថ្ងៃសុក្រស្អែកនេះវិញ ក៏មានជំនួបខ្លាំងៗរវាងកីឡាករកម្ពុជា និងកីឡាករថៃនៅលើសង្វៀនទូរទស្សន៍អាស៊ីអាគ្នេយ៍ផងដែរ៕
ចែករំលែកព័តមាននេះ