រាជធានីភ្នំពេញ ៖ នៅយប់ថ្ងៃអាទិត្យ ទី១៣ វិច្ឆិកា ខានស្អែកនេះ ប្រដាល់អន្តរជាតិនឹងបើកសង្វៀនឱ្យកីឡាករកម្ពុជា២រូបគឺឃីម ឌីម៉ា និងរិទ្ធ មុន្នី ឡើងប្រកួតជាមួយកីឡាករថៃជាលក្ខណៈមិត្តភាព ។ ជំនួបរបស់អ្នកទាំង៤ត្រូវគេរំពឹងថានឹងធ្វើឱ្យមានការចាប់អារម្មណ៍ច្រើនក្នុងចំណោមអ្នកស្នេហាកីឡាប្រដាល់ ។
ការប្រកួតដែលចាប់ផ្ដើមឡើងនៅម៉ោង៨ព្រឹកថ្ងៃអាទិត្យនៅលើសង្វៀនទូរទស្សន៍អាស៊ីអាគ្នេយ៍មានការរំពឹងទុកខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលថ្ងៃអាទិត្យដែលជាម៉ោងសម្រាកពេលព្រឹក ហើយរមែងមានអ្នកទស្សនាកកកុញស្រាប់បើទោះជាការប្រកួតស្ថិតក្នុងលក្ខណៈជាតិ និងជាតិក្តី ។ កីឡាករកម្ពុជា២រូបគឺឃីម ឌីម៉ា និងរិទ្ធ មុន្នី ក្លាយជាគូស៊ីសាច់ហុតឈាមជាមួយកីឡាករថៃនៅព្រឹកថ្ងៃអាទិត្យដែលនឹងមកដល់នៅថ្ងៃខានស្អែក ។ អ្នករៀបចំការប្រកួតបានអះអាងថា កីឡាករទាំង៤រូបមានបំណងប៉ះគ្នាយូរហើយមុនពេលមានការសម្រេចរៀបចំព្រឹត្តិការណ៍អន្តរជាតិឲ្យពួកគេប្រកួតគ្នានេះទៅទៀត ។ ក្នុងនោះភាគីកីឡាករកម្ពុជាបានទាំងសុំខ្លួនសាកកណ្ដាប់ដៃគ្នាតាំងពីឮមានការផ្គូផ្គងនោះផង ។
លោក ញាណ សុធី អ្នករៀបចំកម្មវិធីប្រកួតប្រចាំសង្វៀនស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចដាក់ឃីម ឌីម៉ា មកពីក្លិបរស្មីភូមិគាបខេត្តបន្ទាយមានជ័យឱ្យឡើងប្រកួតជាមួយកីឡាករថៃឈ្មោះយុគ ភីត ក្នុងនាមជាគូឯកបើកឆាកអន្តរជាតិសម្រាប់ប្រដាល់អន្តរជាតិនៅថ្ងៃអាទិត្យនោះ។ លោកថាជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងចង់ឱ្យគេប៉ះគ្នាជាមួយគូបរទេសនៅក្នុងព្រឹត្តិការណ៍នេះតែម្ដង។ លោកថាកីឡាករឃីម ឌីម៉ា អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិសម្រាប់ព្រឹកថ្ងៃអាទិត្យ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។ លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករកម្ពុជារូបនេះ ទើបលោកសម្រេចចិត្តឱ្យគេឡើងប្រកួតជាមួយកីឡាករថៃខាងលើ បើទោះជាកីឡាករថៃមានសមត្ថភាពមិនអាចមើលស្រាលបានក្ដី ។ លោកនិយាយថា ៖« សម្រាប់គូនេះកីឡាករថៃខ្លាំងប៉ុន្តែខ្ញុំនៅតែទុកចិត្តលើ ឃីម ឌីម៉ា បើទោះជាមួយរយៈហ្នឹងគឺមើលទៅធ្លាក់ដៃជាងមុន!» ។ លោកថា កីឡាករថៃយុគ ភីត ធ្លាប់ប្រកួត៧១លើក ឈ្នះ៦១លើក និងចាញ់៩លើកក្នុងពេលដែលកីឡាករកម្ពុជាធ្លាប់ប្រកួត៨៤លើក ឈ្នះ៧០លើក ចាញ់១២លើក និងស្មើ២ដង ។
សម្រាប់កីឡាកររិទ្ធ មុន្នី លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងរបស់ថៃឈ្មោះឆាំ ណាដេត នៅក្នុងព្រឹត្តិការណ៍ប្រដាល់អន្តរជាតិពេលព្រឹកនៅព្រឹកថ្ងៃអាទិត្យនោះដែរ ។ លោកថា ការប្រកួតរបស់គូនេះនៅមិនទាន់ដឹងថាអ្នកណាល្អជាងអ្នកណានោះទេក្នុងពេលដែលរិទ្ធ មុន្នី ម្ដងក៏មានសន្ទុះ និងម្ដងក៏រាងធ្លាក់ដៃដែលធ្វើឱ្យអ្នកស្នេហាវិស័យប្រដាល់ហាក់មិនសូវមានទំនុកចិត្ត។ លោកថា កីឡាករថៃធ្លាប់ប្រកួត៧៩លើក ឈ្នះ៦៨លើក ចាញ់៩លើក និងស្មើ២លើក រីឯកីឡាករកម្ពុជាធ្លាប់ប្រកួត៦៩លើក ឈ្នះ៥៥លើក ចាញ់១៣លើក និងស្មើ១លើក ។ នៅក្នុងព្រឹត្តិការណ៍ប្រដាល់ពេលយប់នៅលើសង្វៀនទូរទស្សន៍អាស៊ីអាគ្នេយ៍ថ្ងៃអាទិត្យនោះដែរក៏មានការប្រកួតអន្តរជាតិផងដែរ ៕
ចែករំលែកព័តមាននេះ