បញ្ហាចរន្ដឈាមនៅក្នុងរាងកាយរបស់មនុស្សគឺជារឿងសំខាន់ក្នុងការរស់នៅ ហើយមនុស្សម្នាក់ៗចាំបាច់ត្រូវមានឈាមក្នុងរាងកាយរបស់ខ្លួនដែលមានសុខភាពល្អ និងមានអនាម័យ ។ សារធាតុសំរាប់ជួយទ្រទ្រង់សុខភាពឈាម គឺមានភេសជ្ជៈមួយប្រភេទដែលបានពីផ្នែកផ្សំរបស់ផ្លែស្ដ្រវបឺរី (Strawberry) ចេកអំបូង ផ្លែគីវី (Kiwi) និងសារ៉ាយស្ប៉ាយរូលីណា (Spirulina) ។ ភេសជ្ជៈខាងលើសំរាប់ជួយទ្រទ្រង់ និងសំអាតឈាម រួមទាំងបង្កើនប្រសិទ្ធភាពក្នុងការដឹកជញ្ជូន អុកស៊ីហ្សែនរបស់គោលិកាឈាម ឬ គ្រាប់ឈាម ។
តទៅនេះគឺជាវិធីសាស្ដ្រធ្វើភេសជ្ជៈសំរាប់ប៉ូវឈាម ឬអាចហៅម្យ៉ាងទៀតថា ជាភេសជ្ជៈប្រភេទទឹកក្រឡុកដំបូងត្រូវយកផ្លែស្ដ្រវបឺរីហាន់ជាចំណិត ផ្លែគីវី ត្រូវបកសំបកនិងហាន់ បន្ទាប់មកយកទាំង២មុខទៅច្របាច់យកតែទឹក ។ ចំណែកចេកអំបូងពេលបករួច ត្រូវហាន់ជាចំណិតៗយកទៅដាក់ក្នុងម៉ាស៊ីនទឹកក្រឡុកលាយជាមួយទឹកស្ដ្រវបឺរី និងផ្លែគីវីក្រឡុកបញ្ចូលគ្នា ក្រោយមកយកសារ៉ាយស្ប៉ាយរូលីណា និងទឹកកកឈូសដាក់ក្រឡុកឱ្យសមល្មមដែល អាចទទួលទានបាន ។
-គុណប្រយោជន៍នៃផ្លែស្ដ្រវបឺរី (Strawberry) គឺមានលក្ខណៈល្អដល់ឈាម ព្រោះសំបូរដោយកាល់ស្យូម សូដ្យូម ម៉ាញេស្យូម ប៉ូតាស្យូម វីតាមីនC អាស៊ីដហ្វូលិក និងប៊ីយ៉ូទីន ។ ក្រៅពីនេះ ថែមទាំងអាចជួយបំបាត់អាការៈស្រវឹងស្រា លាងជាតិពុល ទ្រទ្រង់ពណ៌សំបុរ បង្កើនប្រសិទ្ធភាពនៃប្រព័ន្ធបន្ទោបង់បំបាត់អាការៈចុកក្នុងពោះ និងបំបាត់ក្អក ។
-ចេកអំបូង ជាប្រភេទអាហារមានសារធាតុដែក ជួយជំរុញឱ្យរាងកាយផលិតអ៊ីម៉ូគ្លូប៊ីន បំបាត់អាការៈកកឈាម និងសំបូរដោយ អំបិលប៉ូតាស្យូមពណ៌លឿង អាចកាត់បន្ថយភាពប្រថុយប្រថាននៃសម្ពាធឈាមបាន ។
-ដោយឡែកសំរាប់ផ្លែគីវី (Kiwi) គឺ មានសារធាតុអាហារស្រដៀងនឹងផ្លែស្ដ្រវបឺរី ប៉ុន្ដែមានសារធាតុ “បេតាឃែរ៉ូទីន” សំរាប់ជួយទ្រទ្រង់ប្រព័ន្ធការពារមេរោគក្នុងរាងកាយមិនឱ្យកើតជំងឺផ្ដាសាយដោយងាយឡើយ ។
-ចំណែកសារ៉ាយស្ប៉ាយរូលីណា(Spirulina) មានសារធាតុ “ក្លរ៉ូហ្វីល” ជួយលាងសារធាតុពុល និងធាតុអាក្រក់នៅក្នុងថ្លើម ។ ចរន្ដឈាមមានលក្ខណៈល្អប្រសើរ ធ្វើឱ្យ “អ៊ី ម៉ូគ្លូប៊ីន” ក្នុងឈាមអាចផ្លាស់ប្ដូរអុកស៊ី ហ្សែនបាន យ៉ាងមានប្រសិទ្ធភាព ៕
ចែករំលែកព័តមាននេះ