ប្រជាពលរដ្ឋចំនួន៣គ្រួសាររស់នៅជាប់នឹងជួរភ្នំស្ដេចគង់ និងជួរភ្នំល្ងៀង ក្នុងឃុំស្ដេចគង់ខាងត្បូង ស្រុកបន្ទាយមាស បាននិយាយត្អូញត្អែរពីការចិញ្ចឹមពពែរបស់ពួកគាត់ ដោយសារប៉ុន្មានឆ្នាំចុងក្រោយនេះ ហាក់ដូចជា
ខេត្តកំពត ៖ ប្រជាពលរដ្ឋចំនួន៣គ្រួសាររស់នៅជាប់នឹងជួរភ្នំស្ដេចគង់ និងជួរភ្នំល្ងៀង ក្នុងឃុំស្ដេចគង់ខាងត្បូង ស្រុកបន្ទាយមាស បាននិយាយត្អូញត្អែរពីការចិញ្ចឹមពពែរបស់ពួកគាត់ ដោយសារប៉ុន្មានឆ្នាំចុងក្រោយនេះ ហាក់ដូចជានៅទ្រឹងទៅមុខមិនរួចថយក្រោយក៏មិនរួច ។
លោក ខឹម ខ្លី អាយុ៥៤ឆាំ្ន រស់នៅភូមិស្ដេចគង់ បាននិយាយកាលព្រឹកថ្ងៃទី២៨ ខែឧសភា ឆ្នាំ២០២២ថា គាត់ចិញ្ចឹមពពែចំនួន១៣០ក្បាល ។ ហើយកាលពីអំឡុងកូវីដ-១៩ ពពែគាត់នៅតែមានអតិថិជនមកទិញជាហូរហែ ស្រាប់តែនៅចុងឆ្នាំ២០២១ និងឆ្នាំ២០២២នេះ ពពែរបស់គាត់នៅពេញទ្រុង ព្រោះតែមិនមានអតិថិជនណាមកទិញឡើយ ធ្វើឱ្យជីវភាពគ្រួសារគាត់មានការខ្សត់ខ្សោយ ដោយសារលក់ពពែមិនដាច់ ។ ហើយពពែ១ក្បាលបើលក់គិត១គីឡូក្រាម ត្រឹមតែ៧ដុល្លារតែប៉ុណ្ណោះ ។
ចំណែកអ្នកចិញ្ចឹមពពែម្នាក់ទៀត គឺលោក ម៉េង កិន អាយុ៤២ឆ្នាំ ក៏បាននិយាយដែរថា គាត់ចិញ្ចឹមពពែជិត១០០ក្បាលដែរ ។ នៅឆ្នាំ២០២២នេះ ពពែគាត់តែ១ក្បាលក៏លក់មិនដាច់ដែរ ដោយសារបែបនេះ នៅឆ្នាំក្រោយប្រហែលជាគាត់បោះបង់ចោលរបរចិញ្ចឹមពពែនេះហើយ ព្រោះមិនអាចផ្គត់ផ្គង់ជីវភាពបាន ។
ពេលនេះពលរដ្ឋជាអ្នកចិញ្ចឹមពពែ បានស្វែងរកអតិថិជនជួយទិញពពែពួកគាត់ឱ្យអស់ពីទ្រុង ដើម្បីចាប់យកមុខរបរទិញគោមកចិញ្ចឹមវិញម្ដង ។ អាជ្ញាធរមូលដ្ឋានធ្លាប់បានឲ្យដឹងថា ប្រជាពលរដ្ឋនៅឃុំស្ដេចគង់ខាងត្បូង មានរបរចិញ្ចឹមពពែចំនួន៥គ្រួសារ ប៉ុន្តែជាក់ស្ដែងអ្នកចិញ្ចឹមពពែពេលនេះនៅតែ៣គ្រួសារប៉ុណ្ណោះ ៕
ចែករំលែកព័តមាននេះ