ដើមឈើដ៏ធំមួយដើម ដែលមានអាយុកាលជាង២សតវត្សរ៍ទៅហើយ នៅជាប់នឹងចិញ្ចើមផ្លូវជាតិលេខ១ ស្ថិតក្នុងភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្ដាលនោះ ត្រូវបានខ្យល់កន្ត្រាក់រលំបាក់អស់មួយចំហៀង បង្កឱ្យមានការភ្ញាក់ផ្អើល
ខេត្តកណ្ដាល ៖ ដើមឈើដ៏ធំមួយដើម ដែលមានអាយុកាលជាង២សតវត្សរ៍ទៅហើយ នៅជាប់នឹងចិញ្ចើមផ្លូវជាតិលេខ១ ស្ថិតក្នុងភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្ដាលនោះ ត្រូវបានខ្យល់កន្ត្រាក់រលំបាក់អស់មួយចំហៀង បង្កឱ្យមានការភ្ញាក់ផ្អើលកាលពីវេលាម៉ោងប្រហែល៤រសៀល ថ្ងៃទី២៧ ខែឧសភា ឆ្នាំ២០២២ តែសំណាងល្អមិនមានបង្កឱ្យមនុស្សណាម្នាក់មានរងគ្រោះថ្នាក់នោះឡើយ។
បើតាមបងស្រីម្នាក់ឈ្មោះ ហុង សុផល បានរៀបរាប់ប្រាប់អ្នកសារព័ត៌មានឱ្យបានដឹងថា ដើមឈើនេះ គឺជាដើមត្រាំង មានអាយុកាលប្រហែលជាង២០០ឆ្នាំមកហើយ ព្រោះថាឪពុករបស់គាត់អាយុជាង៩០ឆ្នាំគាត់បានស្លាប់បាត់ទៅហើយ ហើយឪពុកគាត់ធ្លាប់បាននិយាយប្រាប់គាត់ថា តាំងពីគាត់កើតមក គឺឃើញដើមត្រាំងនេះដុះនៅមុខផ្ទះតែម្ដង។ តែបើគិតមកដល់បច្ចុប្បន្ននេះ ដើមត្រាំងនេះគឺមានអាយុកាលមិនក្រោមជាង២ទសវត្សរ៍ ឬសតវត្សនោះទេ។
បងស្រីបញ្ជាក់បន្ថែមថា ដោយដើមឈើនេះ មានអាយុកាលយូរឆ្នាំ និងមានទំហំធំផងនោះ គ្រួសាររបស់បងស្រីក៏បានសង់តូបលោកតានៅក្រោមដើមឈើនេះមួយ ទុកសម្រាប់គោរពបូជា ហើយគ្រួសារគាត់ ក៏ដូចជាប្រជាពលរដ្ឋក្នុងភូមិជាមួយតែងតែប្រារព្ធធ្វើបុណ្យមួយឆ្នាំម្ដងជារៀងរាល់ឆ្នាំ ដើម្បីបែបន់សូមសេចក្តីសុខចម្រើនដល់កូនចៅ។
បងស្រីអះអាងថា ទោះយ៉ាងណា ដើមត្រាំងនេះ បានដុះជាប់ចិញ្ចើមផ្លូវជាតិលេខ១ ក៏ពិតមែន ក៏ប៉ុន្តែវាមិនដែលបង្កគ្រោះថ្នាក់ដល់ពលរដ្ឋអ្នកដំណើរ ឬប្រជាជននៅក្នុងមូលដ្ឋានណាម្នាក់ឡើយ បើទោះបីជាមេឃឈើពុកៗបាក់ធ្លាក់.ក បាក់ធ្លាក់នៅពេលយប់ជ្រៅស្ងាត់មនុស្សក៏ដោយ។ ជាក់ស្ដែងនៅរសៀលថ្ងៃទី២៧ ខែឧសភា ឆ្នាំ២០២២នេះ មេឃបានធ្លាក់ភ្លៀងលាយឡំជាមួយខ្យល់កន្ត្រាក់យ៉ាងខ្លាំងបោកបក់ដួលរលំដើមត្រាំងនេះ ហើយក៏ធ្វើឱ្យបាក់អស់មួយចំហៀង ដួលរំលំទៅខាងត្បូងផ្ទះរបស់គាត់ដេក បណ្ដោយចិញ្ចើមផ្លូវជាតិលេខ ១។
ទោះជាយ៉ាងណាករណីខាងលើនេះ មិនបង្កឱ្យមានមនុស្សណាម្នាក់រងរបួស ឬគ្រោះថ្នាក់ដល់ជីវិតនោះឡើយ គ្រាន់តែប៉ះពាល់ដាច់ខ្សែភ្លើងរបស់ក្រុមហ៊ុនចិនតែពីរ ឬបីខ្សែតែប៉ុណ្ណោះ ព្រោះថា មុននឹងបាក់ដើមឈើដ៏ធំនេះ បានអោយស្នូរសំឡេងលាន់សូរប្រឹបៗដឹងមុនបាត់ហើយ ណាមួយចំពេលស្ងាត់មនុស្សទៀត។
បងស្រីបញ្ជាក់បន្ថែមទៀតថា ដើមត្រាំងនេះ នាំមកនូវសេចក្តីសុខចំរើនត្រជាក់ត្រជុំដល់កូនចៅណាស់ មិនដែលឲ្យកូនចៅសុបិនឃើញប្រផ្នូលអាក្រក់ៗនោះទេ។ ហើយកន្លងទៅ ធ្លាប់មានរន្ទះបាញ់ដើមត្រាំងនេះម្ដងហើយដែរ តែមិនធ្ងន់ធ្ងរនោះទេ៕
ចែករំលែកព័តមាននេះ