ព្រះអគ្គីលេបត្របាក់លំនៅឋានអ្នកលក់ត្រីទាំងស្រុង ពេលទៅលក់ត្រីនៅឯផ្សារ
- បន្ទាយមានជ័យ
ព្រះអគ្គីបានលេបត្របាក់ផ្ទះ១ខ្នងអស់ទាំងស្រុង ខណៈពេលម្ចាស់ទៅលក់ត្រីនៅឯផ្សារ ដោយទុកតែកូនតូច
ព្រះអគ្គីបានលេបត្របាក់ផ្ទះ១ខ្នងអស់ទាំងស្រុង ខណៈពេលម្ចាស់ទៅលក់ត្រីនៅឯផ្សារ ដោយទុកតែកូនតូច
ខេត្តបន្ទាយមានជ័យ ៖ ព្រះអគ្គីបានលេបត្របាក់ផ្ទះ១ខ្នងអស់ទាំងស្រុង ខណៈពេលម្ចាស់ទៅលក់ត្រីនៅឯផ្សារ ដោយទុកតែកូនតូចឲ្យនៅចាំផ្ទះ ។ ហេតុការណ៍នេះ កើតឡើងកាលពីវេលាម៉ោងប្រមាណ៧និង៤៥នាទីយប់ ថ្ងៃទី២៥ ខែឧសភា ឆ្នាំ២០២២កន្លងទៅ ស្ថិតនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ។
ផ្ទះដែលត្រូវភ្លើងឆេះខាងលើនេះ មានម្ចាស់ឈ្មោះ ទូច ជឿន ភេទប្រុស អាយុ៦០ឆ្នាំ ប្រពន្ធឈ្មោះ អុិញ អុីម អាយុ៥៤ឆ្នាំ ។
មន្ត្រីការិយាល័យបង្ការ និងពន្លត់អគ្គិភ័យនៃស្នងការដ្ឋាននគរបាលខេត្ត បានថ្លែងថា នៅពេលមានអគ្គិភ័យឆាបឆេះផ្ទះ១ខ្នងនេះ គេឃើញលោក ហ៊ឹល រ៉ាយ៉ា អភិបាលក្រុងសិរីសោភ័ណ ដឹកនាំកងកម្លាំងទៅធ្វើអន្តរាគមន៍បាញ់ទឹកពន្លត់ ដែលមានកម្លាំងនគរបាល និងរថយន្តពន្លត់អគ្គិភ័យចំនួន២គ្រឿង សហការជាមួយកម្លាំងយោធាតំបន់ប្រតិបត្តិការសឹករងបន្ទាយមានជ័យ និងកងរាជអាវុធហត្ថខេត្ត ដោយប្រើប្រាស់ទឹកអស់២រថយន្ត ទើបរលត់ និងមិនបណ្តាលឱ្យឆេះរាលដាលដល់ផ្ទះអ្នកជិតខាងទេ ។
មន្ត្រីនគរបាលបញ្ជាក់ថា ករណីភ្លើងឆេះផ្ទះនេះ បណ្តាលមកពីផ្ទុះកំប៉ុងហ្គាស ដែលម្ចាស់ធ្វើម្ហូបទុកចោល ហើយភ្លេចបិទហ្គាស ។ លំនៅឋានដែលបានក្លាយជាចំណីភ្លើងនេះ ជាផ្ទះឈើប្រក់ស័ង្កសី មានទំហំ៤ម៉ែត្រគុណនឹង៥ម៉ែត្រ ហើយទ្រព្យសម្បត្តិផ្សេងទៀតដែលខូចខាតជាមួយផ្ទះមាន ម៉ូតូ១គ្រឿងម៉ាកឌ្រីម១២៥ ស៊េរីឆ្នាំ២០២២ និងសម្ភារៈក្នុងផ្ទះទាំងអស់ ៕
ចែករំលែកព័តមាននេះ