ខេត្តព្រះសីហនុ៖ លោក វ៉ែន ស៊ីវន ជាគ្រូបង្រៀនផ្នែកគណិតវិទ្យា នៅសាលាអនុវិទ្យាល័យ​សម្តេចឪ ក្នុង​ខេត្តព្រះសីហនុ។ ក្រៅពីបង្រៀនសិស្សនៅសាលា លោកគ្រូ បានចិញ្ចឹមសត្វ ដើម្បីរួមចំណែក​លើកកម្ពស់ជីវភាពគ្រួសាររបស់លោកគ្រូ។

ជួបអ្នកយកព័ត៌មានកាសែតកោះសន្តិភាព នៅព្រឹកថ្ងៃទី២៤ ខែឧសភា ឆ្នាំ២០២២ លោកគ្រូ ស៊ីវន បានឲ្យដឹងថា រូបលោក មានឪពុក​ម្តាយ ជាកសិករ ប្រកបរបរធ្វើស្រែ-ចំការ និងចិញ្ចឹមសត្វ។ ដោយសារតែមានដើមកំណើតឈាមជ័រ ជាកូនកសិករ ក្រោយបញ្ចប់ការសិក្សា នៅសាលា​គរុកោសល្យ ភូមិភាគ តាកែវ នៅឆ្នាំ១៩៨៩ រូបលោក បានចេញមកបង្រៀន ផ្នែកគណិតវិទ្យា នៅសាលាអនុវិទ្យាល័យសម្តេចឪ ក្នុង​ក្រុង/ខេត្តព្រះសីហនុ។ បច្ចុប្បន្ន ក្រៅពីការងារជា​មន្ត្រីរាជ​ការ និងមានឧប្បនិស្ស័យ ជាកូនកសិករ លោកមានចំណូលចិត្តលើវិស័យកសិកម្ម ដូចជា ការដាំ​ដំណាំផ្សេងៗ និងការចិញ្ចឹមសត្វ។ល។

លោក វ៉ែន ស៊ីវន បានបន្ត​ថា ក្រៅពីម៉ោងបង្រៀនសិស្ស លោកបានរៀបចំបើកជាកសិដ្ឋាន​ចិញ្ចឹមសត្វមួយកន្លែង លើទំហំដីប្រមាណជាងពីរហិកតា ដែលមានទីតាំងស្ថិតនៅភូមិស្រែក្នុង ឃុំអូរជ្រៅ ស្រុកព្រៃនប់ ខេត្តព្រះសីហនុ។ សត្វ ដែលលោកគ្រូចិញ្ចឹម មានដូចជា មាន់ក្រិចតួគី មាន់ស្រែ ទាកាប ទាកាប៉ា និងក្ងាន។

លោកបានបញ្ជាក់​ទៀតថា ការងារចិញ្ចឹមសត្វនេះ គឺការឲ្យចំណីតាមបែបធម្មជាតិ ដូចជា យកដើមចេកមកហាន់ជញ្រ្ចាំ លាយជាមួយកន្ទួក និងស្រូវពាក់កណ្តាល ក្នុងនោះ ក៏មានឲ្យ​ចំណីកូនមាន់កូនទា ដែលមានអាយុចាប់ពីមួយថ្ងៃ ដល់ ៣០ថ្ងៃ ប្រើចំណីកូនមាន់របស់ក្រុមហ៊ុន។ ចំណែកទឹកសម្រាប់កូនមាន់ និងកូនទា ត្រូវប្រើវីតតាម៉ីនការពារជំងឺ ក្នុង ១សប្តាហ៍ ចំនួន ៣ដង ដើម្បីឲ្យកូនមាន់ឆាប់បានធំធាត់។

លោកគ្រូ បន្ថែមថា ក្នុងដំណាក់កាលមេមាន់ពង ត្រូវបានរៀបចំតាមបែបលក្ខណៈបច្ចេកទេស​វិទ្យាសាស្ត្រ ដោយប្រើទូ​កំដៅអ៊ុនៗ ក្នុងការភ្ញាស់កូនមាន់ ដោយមិនទុកឲ្យមេក្រាប នាំឲ្យ​ខាតពេលវេលា។

បច្ចុប្បន្ននេះ នៅក្នុងកសិដ្ឋានរបស់លោកគ្រូ កំពុងតែនាំចូលទីផ្សារជាបណ្តើរៗហើយ។ ទាំងមាន់-ទា ក្នុងតម្លៃសមរម្យ ហើយ​ទទួលបានផលចំណេញ អាចលើកកម្ពស់ជីវភាពគ្រួសារ​មន្ត្រីរាជការដូចជាលោកគ្រូបានមួយកម្រិត​។

លោក វ៉ែន ស៊ីវន បានសំណូមពរដល់មន្ទីរជំនាញពាក់ព័ន្ធ ជួយផ្តល់ជំនាញបច្ចេកទេសនៃ​ការចិញ្ចឹម​សត្វបន្ថែម ដែលលោកមានស្រាប់ ដើម្បីឲ្យកាន់តែមានប្រសិទ្ធភាព ចៀសវាង​ពីហានិភ័យ ដោយសារជំងឺ ដែលកើតឡើង ដោយយថាហេតុ៕ រស់ ភីណា