ខេត្តប៉ៃលិន ៖ ក្រោមការដឹកនាំផ្ទាល់ពីសំណាក់លោកជំទាវ បាន ស្រីមុំ ប្រធានសហភាពសហព័ន្ធយុវជនកម្ពុជា (ស.ស.យ.ក) ខេត្តប៉ៃលិន បានចូលរួមចំណែកយ៉ាងសំខាន់ ក្នុងការលើកកម្ពស់ជីវភាព…
ខេត្តប៉ៃលិន ៖ ក្រោមការដឹកនាំផ្ទាល់ពីសំណាក់លោកជំទាវ បាន ស្រីមុំ ប្រធានសហភាពសហព័ន្ធយុវជនកម្ពុជា (ស.ស.យ.ក) ខេត្តប៉ៃលិន បានចូលរួមចំណែកយ៉ាងសំខាន់ ក្នុងការលើកកម្ពស់ជីវភាព និងសុខុមាលភាពប្រជាពលរដ្ឋក្នុងខេត្ត ជាពិសេស បានជួយសម្របសម្រួលដល់ប្រជាពលរដ្ឋ ដែលកំពុងធ្វើដំណើរឆ្លងដែនមកពីប្រទេសថៃផងដែរ។ ជាក់ស្តែងនៅព្រឹកថ្ងៃទី០១ ខែកក្កដា ឆ្នាំ២០២៥នេះ សហភាពសហព័ន្ធយុវជនកម្ពុជា (ស.ស.យ.ក) ខេត្តប៉ៃលិន បានយកចិត្តទុកដាក់ ចំពោះសុខទុក្ខប្រជាពលរដ្ឋខ្មែរ ដោយបានរៀបចំសកម្មភាពជួយដឹកជញ្ជូនសម្ភារៈផ្ទាល់ខ្លួនរបស់ពួកគាត់ ដើម្បីសម្រួលបន្ទុក មួយផ្នែក និងជួយកាត់បន្ថយការជួលរទេះរុញ ដែលនាំឱ្យអស់ថវិកាមួយចំនួនថែមទៀត ។
បើតាមប្រភពព័ត៌មាន ពីយុវជនសហភាពសហព័ន្ធយុវជនកម្ពុជាខេត្តម្នាក់ បានលើកឡើងថា សហភាពសហព័ន្ធយុវជនកម្ពុជាខេត្ត ក្រោមការដឹកនាំរបស់លោកជំទាវ បាន ស្រីមុំ ប្រធានសហភាពសហព័ន្ធយុវជនកម្ពុជា (ស.ស.យ.ក.) ខេត្តប៉ៃលិន តែងតែធ្វើសកម្មភាពមនុស្សធម៌ជាប្រចាំ ពិសេសក្នុងអំឡុងពេលនេះ គឺបានចូលរួម ជួយដល់ប្រជាពលរដ្ឋខ្មែរ ដែលកំពុងតែវិលត្រឡប់ចូលមកស្រុកកំណើតវិញ ដោយនាំគ្នាជួយដឹកជញ្ជូនសម្ភារៈប្រើប្រាស់ឆ្លងកាត់ព្រំដែនរបស់ពួកគាត់ការផ្សព្វផ្សាយ និងអប់រំជាសាធារណៈ អំពីសារៈសំខាន់ នៃសុវត្ថិភាពពលករចំណាកស្រុក ការផ្សព្វផ្សាយព័ត៌មាន និងការណែនាំនានាស្តីពីហានិភ័យ ដែលអាចកើតមាន ចំពោះប្រជាពលរដ្ឋចំណាកស្រុក និងវិធីការពារខ្លួន ក៏ដូចជាសិទ្ធិផ្ទាល់ខ្លួន។ជាមួយគ្នានេះ សហភាពសហព័ន្ធយុវជនកម្ពុជា (ស.ស.យ.ក.) ខេត្តប៉ៃលិន បានសហការជាមួយរដ្ឋបាលខេត្ត ដើម្បីរៀបចំរថយន្តដឹកជញ្ជូន ចេញពីច្រកព្រំដែន ត្រឡប់ទៅលំនៅឋានរៀងៗខ្លួនវិញ ដោយឥតគិតថ្លៃ ហើយនេះបានជួយកាត់បន្ថយបការចំណាយ និងការលំបាក របស់ពួកគាត់មួយកម្រិតថែមទៀតផងដែរ ។
លើសពីនេះសកម្មភាពមនុស្សធម៌ និងសង្គម របស់សហភាពសហព័ន្ធយុវជនកម្ពុជា (ស.ស.យ.ក) ខេត្តប៉ៃលិន ក្រោមការដឹកនាំរបស់លោកជំទាវ បាន ស្រីមុំ បានបង្ហាញពីស្មារតីសាមគ្គីភាព និងការទទួលខុសត្រូវខ្ពស់ ក្នុងការចូលរួមអភិវឌ្ឍសង្គមជាតិ និងជួយសម្រាលទុក្ខលំបាក របស់ប្រជាពលរដ្ឋក្នុងខេត្ត និងអ្នកមកពីតាមបណ្តាខេត្តនានាផងដែរ ៕
ចែករំលែកព័តមាននេះ