ខេត្តកំពត ៖ ពិការភាពបាន និងកំពុងរួមរឹតជីវិតប្តីប្រពន្ធ១គូ ប្រៀបដូចជាត្រូវបណ្តាសាព្រហ្មលិខិត ដែលបង្កើតរូបគេមកហើយ ម្តេចឡើយមិនឱ្យវាសនាមកជាមួយផង ។ បានជាមើលឃើញបែបនេះ ព្រោះពិតណាស់ថា ជីវិតនេះរងនឹងភាពអយុត្តិធម៌ ដោយស្ត្រីជាប្រពន្ធពិការតាំងពីកំណើត និងបានបុរសម្នាក់មានចិត្តប្រតិព័ទ្ធស្នេហា បានស្ម័គ្រចិត្តធ្វើជាប្តីដ៏ល្អ តែងជួយសម្រាលទុក្ខលំបាកប្រពន្ធគ្រប់ការងារទាំងអស់ តែជាអកុសល ជីវិតកម្មករសំណង់ បានធ្លាក់ខ្លួនរងគ្រោះ ដោយសារចរន្តអគ្គិសនីឆក់ ក៏ធ្លាក់ខ្លួនពិការដែរ ដោយត្រូវកាត់ដៃទាំង២ត្រឹមកំភួនដៃ ។
នាងប្រពន្ធដែលពិការដៃ និងជើងពីកំណើតឈ្មោះ ស៊ីវ វឌ្ឍនា អាយុ២៩ឆ្នាំ នៅភូមិអង្គសុរភី ឃុំអង្គសុរភី ស្រុកកំពង់ត្រាច ។ នាងបានព្រមព្រៀងរៀបការ ក្នុងឆ្នាំ២០១១ ជាមួយនឹងយុវជនឈ្មោះ ញឺម ហំ អាយុ២៧ឆ្នាំ នៅភូមិបុសញិញ ឃុំកូនសត្វ ស្រុកទឹកឈូ ។
បន្ទាប់ពីបានគ្នាជាប្តីប្រពន្ធមក នាងបានទៅរស់នៅខាងប្តី គឺនៅឃុំកូនសត្វ ដោយបុរសជាប្តីចេញទៅធ្វើសំណង់នៅភ្នំពេញ តែជាអកុសល លើកដែកប៉ះខ្សែកាបតង់ស្យុងខ្ពស់ អត់ស្រោម បណ្តាលឱ្យឆក់ស្ទើរស្លាប់ស្ទើររស់ រហូតដល់កាត់ដៃទាំងពីរ កាលពីចុងខែសីហា ឆ្នាំ២០១៦ កន្លងមកនេះ ។
ប្រការដែលកាន់តែលំបាកថែមទៀតនោះ គឺម្តាយក្មេករបស់នាង ដែលធ្លាប់ពឹងពាក់ជួយសម្រាលការងារ ជំនួសនាងជាជនពិការនោះ បានស្លាប់ចោលទៀត ហើយដោយសារតែធ្លាក់ខ្លួនពិការទាំង២នាក់ប្តីប្រពន្ធបែបនេះ ទើបពួកនាងវិលមករកទ្រនំចាស់វិញ ។
ចំណែកស្ត្រីឈ្មោះ គង់ ណារ៉េត ជាម្តាយនាងពិការនិយាយថា កូនស្រីគាត់ពិការដៃជើងតាំងពីកំណើត និងបានរៀបចំទុកដាក់ឱ្យកូនមានប្តីនេះថា នឹងជួយចិញ្ចឹមគ្នីគ្នាទៅ ស្រាប់តែកូនប្រសាប្រុស ត្រូវរងគ្រោះដោយខ្សែកាបអគ្គិសនីឆក់ រហូតកាត់ដៃទាំងពីរទៀត ដូច្នេះ២នាក់ប្តីប្រពន្ធនេះសល់តែជើង២ទេ ។
ស្ត្រីជាម្តាយនិយាយបន្តថា គាត់សព្វថ្ងៃលក់នំបញ្ចុក រីឯប្តីរត់ម៉ូតូឌុប ហើយបើពួកគេពិការបែបនេះ តើអ្នកណាជួយបាន ។ ស្ត្រីជាម្តាយនិយាយថា បើមានទុក្ខលំបាកពេកបែបនេះ មានតែអំពាវនាវដល់ សម្តេចតេជោ ហ៊ុន សែន ទេ ទើបអាចជួយបាន! ព្រោះពេលនេះពួកគេមានកូន២នាក់ហើយ គឺកូនស្រីម្នាក់អាយុ៤ឆ្នាំ និងកូនប្រុសម្នាក់អាយុទើប២ខែ ប៉ុណ្ណោះ ។
លោក ជួប សេរី ប្រធានភូមិអង្គសុរភី បានឱ្យដឹងថា គ្រួសារនេះពិតជាមានជីវភាពខ្សត់ខ្សោយណាស់ ដោយសារតែពិការភាពមិនទោះរកស៊ីធ្វើការងារអ្វីក៏មិនកើត ។
ពិតជាអាណោចអាធ័មណាស់សម្រាប់ជីវិតប្តីប្រពន្ធនេះ ឥឡូវពួកគេពិការទាំងអស់គ្នាទៅហើយ តើបាននរណាជួយនរណា ដូច្នេះមានតែសប្បុរសជន ឬអង្គការសង្គមនានា ជាពិសេសសម្តេតតេជោ ហ៊ុន សែន និងសម្តេចកិត្តិព្រឹទ្ធបណ្ឌិតទេ ទើបអាចជួយសង្គ្រោះជីវិតអភ័ព្វនេះបាន ។
សូមមន្ត្រីដែលមានចិត្តបុណ្យ ពាំនាំព័ត៌មាននេះជូនដល់សម្តេចបានជ្រាបផង ។ សង្ឃឹមថា សម្តេចតេជោ និងសម្តេចកិត្តិព្រឹទ្ធបណ្ឌិត នឹងបានជ្រាបមិនខាន ៕
ចែករំលែកព័តមាននេះ