រាជធានីភ្នំពេញ ៖ លោកវេជ្ជបណ្ឌិត ស៊ឹម ស៊ូយេង តំណាងឱ្យលោកហ៊ុន ម៉ាណែត ប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោ បានបញ្ជាក់ថា គោលបំណងរបស់សមាគម គឺផ្តល់ការព្យាបាលប្រជាពលរដ្ឋដោយឥតគិតថ្លៃ និងទី២ ចូលរួមចំណែកជាមួយរាជរដ្ឋាភិបាល ដើម្បីកាត់បន្ថយភាពក្រីក្ររបស់ប្រជាពលរដ្ឋ ដោយមិនប្រកាន់និន្នានយោបាយ និងសាសនាអ្វីទាំងអស់។
លោកបន្តថា បេសកកម្មរបស់សមាគមមានបានចុះព្យាបាលដោយឥតគិតថ្លៃជូនប្រជាពលរដ្ឋនៅគោលដៅធំៗចំនួន៣ គឺទី១-ចុះតាមបណ្តាខេត្ត ទី២-ចុះតាមអង្គការ មណ្ឌលកុមារកំព្រា សហគមន៍ និង និងទី៣នៅតាមរោងចក្រ។ គិតត្រឹមថ្ងៃទី៣០ តុលា គឺជាបេសកកម្មមនុស្សធម៌លើកទី៣របស់សមាគមគ្រូពេទ្យស្ម័គ្រចិត្តយុវជនសម្តេចតេជោរួមសហការជាមួយអជ្ញាធរក្រុមគ្រូពេទ្យបរទេស (បារាំង-អាមេរិក) និងផ្នែក ដែលពាក់ព័ន្ធចុះព្យាបាលដោយឥតគិតថ្លៃជូនដល់បងប្អូនកម្មករ កម្មការនីនិងប្រជាពលរដ្ឋនៅ សង្កាត់ចាក់អង្រែក្រោម ខណ្ណមានជ័យ រាជធានីភ្នំពេញ។
តំណាងអភិបាលនៃគណអភិបាលមានជ័យបានថ្លែងអំណរគុណចំពោះការយកចិត្តទុកដាក់ និងគិតគូរដល់សុខមាលភាព និងជីវភាពរស់នៅរបស់បងប្អូនកម្មករ-កម្មការនីរបស់ប្រមុខរាជរដ្ឋាភិបាលតាមរយៈការព្យាបាលដោយឥតគិតថ្លៃជូនដល់បងប្អូនកម្មករ កម្មការនី និងប្រជាពលរដ្ឋដល់មូលដ្ឋាន។
ជាមួយគ្នានោះ ប្រជាពលរដ្ឋ ដែលបានមកទទួលការព្យាបាលឥតគិតថ្លៃនេះ បានមានបង្ហាញអារម្មណ៍ រីករាយដែលបានឃើញក្រុមគ្រូពេទ្យយកចិត្តទុកដាក់ព្យាបាលជំងឺប្រកបដោយភាពរួសរាយរាក់ទាក់។ ក្រៅពីនោះ ប្រជាពលរដ្ឋ ក៏បានគោរពថ្លែងអំណរគុណ ចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានយកចិត្តទុកដាក់ខ្ពស់ចំពោះសុខទុក្ខសុខភាព និងការលំបាករបស់ប្រជាពលរដ្ឋ។
ចែករំលែកព័តមាននេះ