តេក្វាន់ដូWTនិងវ៉ូវីណាមជួយឱ្យកម្ពុជាកើនមេដាយមាសដល់ទៅ៤គ្រឿង
- ភ្នំពេញ
ស៊ីហ្គេមវៀតណាម ៖ គិតត្រឹមល្ងាចថ្ងៃទី១៨ ឧសភា នៅក្នុងព្រឹត្តិការណ៍កីឡាស៊ីហ្គេមលើកទី៣១នៅ
ស៊ីហ្គេមវៀតណាម ៖ គិតត្រឹមល្ងាចថ្ងៃទី១៨ ឧសភា នៅក្នុងព្រឹត្តិការណ៍កីឡាស៊ីហ្គេមលើកទី៣១នៅប្រទេសវៀតណាម កម្ពុជាដណ្ដើមបានមេដាយមាស៤គ្រឿង មេដាយប្រាក់៦គ្រឿង និងមេដាយសំរឹទ្ធ១៤គ្រឿង សរុប២៤គ្រឿង។ក្នុងនោះកីឡាករតេក្វាន់ដូWT វ៉ា មិថុនា ប្រកួតលើវិញ្ញាសាផ្នែកបុរសប្រភេទទម្ងន់៧៤គីឡូក្រាមបានយកឈ្នះកីឡាករហ្វីលីពីននៅវគ្គផ្ដាច់ព្រ័ត្រក្នុងលទ្ធផល៣៥ទល់១៤ ធ្វើឱ្យគេក្លាយជាម្ចាស់មេដាយមាសទី៤របស់កម្ពុជា ក្រោយពេលដែលកីឡាវ៉ូវីណាមជាអ្នករកបានមេដាយមាសទី៣ពីការប្រកួតសម្ដែងលើវិញ្ញាសាជាក្រុម(នារី១ បុរស៣ មានអាវុ.ធ)។
បន្ទាប់ពីកីឡាករតេក្វាន់ដូវ៉ា មិថុនា ប្រកួតឈ្នះកីឡាករហ្វីលីពីននៅវគ្គផ្ដាច់ព្រ័ត្រដណ្ដើមបានមេដាយមាសទី៤ជូនជាតិនោះ នៅថ្ងៃដដែលកីឡាការិនីឈឿង អាលីហ្សា បានប្រកួតចាញ់កីឡាការិនីវៀតណាមដែលជាម្ចាស់ផ្ទះលើប្រភេទទម្ងន់៥៧គីឡូក្រាមដោយលទ្ធផល៧ទល់១៧ ទទួលបានត្រឹមមេដាយសំរឹទ្ធប៉ុណ្ណោះ។ ចំណែកមេដាយមាសទី៣ដែលកីឡាវ៉ូវីណាមដណ្ដើមបាន គឹលើវិញ្ញាសាសម្ដែងជាក្រុម(នារី១បុរស៣ មានអាវុ.ធ)រួមមាន៖កីឡាការិនីប៉ាល់ ឆរស្មី កីឡាករលី បូរ៉ាមី, កីឡាករជ្រិន ប៊ុនឡេង និងកីឡាករប្រាក់ សុវណ្ណនី ដោយទទួលបានពិន្ទុ២៦៩។
គួររំលឹកផងដែរថា សម្រាប់មេដាយមាស២គ្រឿងដែលកម្ពុជាដណ្ដើមបានមុននេះគឺបានមកពីកីឡាឃីកបុកស៊ីងកីឡាករទូច រ៉ាឆាន់ រីឯមេដាយមាសទី២បានមកពីកីឡាប៉េតង់ប្រកួតលើវិញ្ញាសាចម្រុះបុរសនារីរវាងកីឡាករស៊ីន វងនិងកីឡាការិនីវង់ ចន្ថា ។ ចំណែកមេដាយប្រាក់ចំនួន៦គ្រឿងដែលអត្តពលិកកម្ពុជាដណ្ដើមបានគឺកីឡាការិនីវ៉ូវីណាមសុខ សុភី លើវិញ្ញាសានារីទម្ងន់៥៥គីឡូក្រាម,កីឡាករតេក្វាន់ដូWTសំ យូដេត លើវិញ្ញាសាប្រយុទ្ធប្រភេទទម្ងន់៥៨គីឡូក្រាម, កីឡាករថោង ឈឿន និងកីឡាករយឹម សុភ័ណ្ឌ លើវិញ្ញាសាវាយគូបុរសកីឡាប៉េតង់,កីឡាករឃីកបុកស៊ីង កាន់ ម៉េងហុង លើប្រភេទទម្ងន់៥៤គីឡូក្រាម,កីឡាករឃីកបុកស៊ីងឈឿន ល្វៃ លើប្រភេទទម្ងន់៧១គីឡូក្រាមនិងកីឡាករឃីកបុកស៊ីងលន បញ្ញា លើប្រភេទទម្ងន់៦៧គីឡូក្រាម៕
ចែករំលែកព័តមាននេះ