កូរ៉េខាងជើង ៖ ប្រព័ន្ធផ្សព្វផ្សាយរដ្ឋ KCNA បានចុះផ្សាយនៅថ្ងៃព្រហស្បតិ៍នេះថា កូរ៉េខាងជើង កំពុងបង្កើនការផលិតថ្នាំពេទ្យ និងបរិក្ខារពេទ្យ រួមមានឧបករណ៍រម្ងាប់មេរោគ និងទែម៉ូម៉ែត្រ ខណៈប្រទេសនេះ កំពុងតែទប់ទល់នឹងការរាតត្បាតកូវីដ១៩។
របបកុម្មុយនីស្តនេះ ក៏កំពុងបង្កើនការផលិតថ្នាំបុរាណកូរ៉េខាងផងដែរ ដែលត្រូវបានគេប្រើប្រាស់ ដើម្បីកាត់បន្ថយកម្តៅ និងការឈឺចាប់ ដោយហៅថា ជាថ្នាំមានប្រសិទ្ធភាពក្នុងការបង្ការ និងព្យាបាលជំងឺ។
រលកជំងឺកូវីដ១៩ ដែលកូរ៉េខាងជើង ប្រកាសពីការផ្ទុះកាលពីសប្តាហ៍មុន បានធ្វើឲ្យមានការព្រួយបារម្ភយ៉ាងខ្លាំង ដោយសារបញ្ហាខ្វះធនធានវេជ្ជសាស្ត្រ និងវ៉ាក់សាំង ខណៈដែលភ្នាក់ងារសិទ្ធិមនុស្សរបស់អង្គការសហប្រជាជាតិបានធ្វើការព្រមានពីការបំផ្លិចបំផ្លាញធ្ងន់ធ្ងរនៅក្នុងប្រទេសកូរ៉េខាងជើងដែលមានប្រជាជនចំនួន ២៥លាននាក់។
KCNA ចុះផ្សាយថា មនុស្សយ៉ាងតិច ២៦២.២៧០នាក់ ត្រូវបានគេរកឃើញថា មានរោគសញ្ញា ហើយមនុស្សម្នាក់ទៀតបានស្លា.ប់ គិតត្រឹមថ្ងៃពុធម្សិលមិញនេះ។ ប៉ុន្តែវាមិនបានចុះផ្សាយថា តើមនុស្សប៉ុន្មាននាក់ធ្វើតេស្តវិជ្ជមានកូវីដ ១៩នោះទេ?។
រហូតមកដល់ពេលនេះ កូរ៉េខាងជើងមានមនុស្សចំនួនជិត ២លាននាក់ដែលមានរោគសញ្ញាគ្រុនក្តៅ និង ៦៣នាក់ស្លា.ប់។
ប្រព័ន្ធផ្សព្វផ្សាយរដ្ឋដដែលបានរាយការណ៍ទៀតថា រោងចក្រនានាកំពុងធ្វើការផលិតថ្នាំចាក់ ថ្នាំពេទ្យ ទែម៉ូម៉ែត្រ និងបរិក្ខារពេទ្យផ្សេងៗទៀតនៅក្នុងរដ្ឋធានីព្យុងយ៉ាង និងតំបន់នៅក្បែររដ្ឋធានី ខណៈមានការអនុវត្តន៍វិធានការរឹតបន្តឹងកាន់តែខ្លាំងទៀត ដើម្បីទប់ទល់នឹងការឆ្លងរាតត្បាត។
KCNA ចុះផ្សាយថា «អំបិលរាប់ពាន់តោនត្រូវបានដឹកជញ្ជូនទៅកាន់រដ្ឋធានីព្យុងយ៉ាងជាបន្ទាន់ដើម្បីធ្វើការផលិតថ្នាំសម្លា.ប់មេរោគ”។
ដោយសារមិនមានកម្មវិធីវ៉ាក់សាំង និងថ្នាំព្យាបាលកូវីដ ១៩ ប្រព័ន្ធផ្សព្វផ្សាយរដ្ឋបានជំរុញឲ្យអ្នកជំងឺប្រើប្រាស់ថ្នាំបំបាត់ការឈឺចាប់ (painkiller) និងថ្នាំអង់ទីប៊ីយោទិច ព្រមទាំងឱសថមួយចំនួនដែលរកបាននៅផ្ទះដូចជា ការខ្ពុលទឹកអំបិល និងផឹកតែជាដើម។
ប្រទេសកូរ៉េខាងត្បូង និងអាមេរិកបានស្ម័គ្រចិត្តជួយកូរ៉េខាងជើងប្រយុទ្ធប្រឆាំងនឹងការផ្ទុះកូវីដ ១៩ ប៉ុន្តែរហូតមកដល់ពេលនេះ មិនទាន់ទទួលបានការឆ្លើយតបនោះទេ។ នេះបើយោងតាមការបញ្ជាក់របស់ទីប្រឹក្សាសន្តិសុខជាតិកូរ៉េខាងត្បូង។
ទោះយ៉ាងណា យន្តហោះចំនួន ៣គ្រឿងរបស់ក្រុមហ៊ុន Air Koryo របស់កូរ៉េខាងជើងបានធ្វើដំណើរទៅដល់ប្រទេសចិន និងបានត្រឡប់មកកាន់រដ្ឋធានីព្យុងយ៉ាងវិញនៅថ្ងៃច័ន្ទ ដោយមានដឹកនាំបរិក្ខារពេទ្យ។ នេះបើយោងតាមប្រភពការទូតបញ្ជាក់ដោយសុំមិនបញ្ចេញឈ្មោះ៕ (យោងតាមប្រភព៖ Reuters)
ចែករំលែកព័តមាននេះ