ខេត្តបន្ទាយមានជ័យ៖ ប្រពន្ធ័លូទឹកតាមបណ្តោយផ្លូវជាតិលេខ៥៩ ចាប់ពីចន្លោះគ.ម ៤១ ដល់គម ៤៣+៥០០ ត្រូវបានមន្ត្រីជំនាញនៃមន្ទីរសាធារណការ និដឹកជញ្ជូន បើកយុទ្ធនាស្តារឡើងវិញ និងកាយដីចាក់ខ្ពស់ជាងចិញ្ចើមផ្លូវចេញ ដែលធ្វើឲ្យទឹកដក់ខូចផ្លូវ។ នេះបើតាមលោក សុក ចាន់ថា ប្រធានមន្ទីរសាធារណការ និងដឹកជញ្ជូន ខេត្តបន្ទាយមានជ័យ។
លោក សុក ចាន់ថា បានបន្តថា កន្លងមក ប្រព័ន្ធលូ នៅតាមបណ្តោយផ្លូវជាតិលេខ៥៩ ចាប់ពីចន្លោះ គ.ម ៤១+០០០ ដល់គ.ម ៤៣+៥០០ ស្ថិតក្នុងទីរួមស្រុកម៉ាឡៃ រងគ្រោះដោយទឹកជំនន់ទឹកភ្លៀង និងទឹកហូរធ្លាក់ពីទីនានា ដីចូលពេញលូ ជាដុំៗ ច្រើនកន្លែង បណ្តាលឲ្យកកស្ទះ។ ដូច្នេះលោកបានដឹកនាំកម្លាំងជំនាញមន្ទីរសាធារណការដឹកជញ្ជូន យកគ្រឿងចក្រ មកស្តារតាមបណ្តោយផ្លូវជាតិលេខ៥៩ ចន្លោះពីគ.ម ៤១+០០០ ដល់គ.ម ៤៣+៥០០ ឡើងវិញ ដើម្បីឱ្យទឹកហូរចេញចូលស្រួលឡើងវិញ។ ការងារនេះ ត្រូវធ្វើឱ្យបានរួចរាល់ មុនរដូវវស្សាចូលដល់ ពិសេសកាយដី ដែលបានចាក់ខ្ពស់ជាងចិញ្ចើមផ្លូវចេញ ដើម្បីកុំឱ្យទឹកដក់ ខូចផ្លូវ។
លោកប្រធានមន្ទីរ បានបន្តទៀតថា ប្រពន្ធ័លូស្ទះ ទាំង ៩ ស្រុកក្រុង គឺកកស្ទះ ដោយសារតែដីបាក់ចូល ហើយក្រុមការងាររបស់លោក បានចាប់ផ្តើមស្តារឡើងវិញ ជាបណ្តើរៗ នៅក្នុងស្រុកម៉ាឡៃ ដោយចាប់ផ្តើមអនុវត្តមុនគេ។
លោកប្រធានមន្ទីរ បានបន្តទៀតថា ប្រព័ន្ធលូ នៅតាមបណ្តោយផ្លូវជាតិលេខ៥៩ ចាប់ពីចន្លោះ គ.ម ៤១+០០០ ដល់គ.ម ៤៣+៥០០ ក្នុងស្រុកម៉ាឡៃ ក្រោយពីស្តាររួចរាល់ហើយ លោកសង្ឃឹមថា វាមានសារៈសំខាន់ណាស់ សម្រាប់ប្រជាពលរដ្ឋ រស់ក្នុងស្រុកម៉ាឡៃ ធ្វើដំណើរចេញចូល ប្រកបមុខរបររកស៊ីប្រចាំថ្ងៃបានយ៉ាងស្រួល ព្រោះមិនព្រួយពីទឹកលេច នៅខែវស្សានោះទៀតទេ។
ជាមួយនោះ លោក សុក ចាន់ថា បានសំណូមពរដល់ប្រជាពលរដ្ឋ រស់នៅក្នុងស្រុកម៉ាឡៃទាំងអស់ ក្រោយពីបញ្ចប់ការងារស្តារលូ និងកាយដីចាក់ ដែលខ្ពស់ជាងចិញ្ចើមផ្លូវរួចរាល់ហើយ ត្រូវរួមគ្នាជួយថែរក្សាឱ្យបានល្អ និងធានាបានការប្រើប្រាស់យូរអង្វែង និងឈប់ការចាក់ដីឱ្យខ្ពស់ជាងផ្លូវ ព្រោះការស្តារលូនេះ ចំណាយថវិកាអស់ច្រើនណាស់។
ក្នុងការចុះត្រួតពិនិត្យការងារស្តារប្រព័ន្ធលូនេះដែរ លោកប្រធានមន្ទីរ ក៏បានណែនាំដល់ក្រុមការងារបច្ចេកទេស ឱ្យខិតខំជំរុញការងារឱ្យសម្រេចរួចរាល់ តាមផែនការ ដែលបានកំណត់។
ជាមួយគ្នានោះដែរ ប្រជាពលរដ្ឋនៅស្រុកម៉ាឡៃ ក៏បានថ្លែងអំគុណយ៉ាងជ្រាលជ្រៅដល់លោក សុក ចាន់ថា ដែលបានយកចិត្តទុកដាក់ស្តារប្រព័ន្ធលូ និងកាយដីចាក់ខ្ពស់ជាងចិញ្ចើមផ្លូវ ដើម្បីបញ្ជៀសពីការទឹកលិចលង់ ក្នុងទីរួមស្រុកម៉ាឡៃនេះ៕ ណុប រក្សា
ចែករំលែកព័តមាននេះ