អណ្ដាតភ្លើងឆាបឆេះឃ្លាំងទិញលក់អេតចាយ ផ្អើលនៅអូរបែកក្អម
- ភ្នំពេញ
ឃ្លាំងទិញលក់អេតចាយមួយ កន្លែង ត្រូវបានអគ្គិភ័យឆាបឆេះ បណ្តាលអោយបន្ទប់ចំនួន៣ រួមជាមួយ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ឃ្លាំងទិញលក់អេតចាយមួយ កន្លែង ត្រូវបានអគ្គិភ័យឆាបឆេះ បណ្តាលអោយបន្ទប់ចំនួន៣ រួមជាមួយសម្ភារៈមួយចំនួន បានរងការខូចខាតធ្ងន់ធ្ងរ ។ អគ្គីភ័យនេះ បង្កអោយមានការភ្ញាក់ផ្អើលកាលពីវេលាម៉ោងប្រមាណ១១ព្រឹក ថ្ងៃទី១៨ ខែឧសភា ឆ្នាំ២០២២ នៅតាមបណ្តោយផ្លូវបេតុង ស្ថិតក្នុងភូមិស្លែងរលីង សង្កាត់អូរបែកក្អម ខណ្ឌសែនសុខ រាជធានីភ្នំពេញ។
សេចក្តីរាយការណ៍បន្តថា ឃ្លាំងអេតចាយដែលត្រូវភ្លើងឆេះនោះ មានទំហំ១៣ម៉ែត្រ គុណ២៥ម៉ែត្រប្រក់សង្ក័សី ដែលមានម្ចាស់ឈ្មោះ ចិន ចំរ៉ុង ភេទប្រុស អាយុ៣៤ឆ្នាំ ។
ទាក់ទិននឹងការកើតមានអគ្គិភ័យខាងលើនេះ ត្រូវបាននគរបាលការិយាល័យ បង្ការពន្លត់អគ្គិភ័យ និងសង្គ្រោះ បានអោយដឹងថា បណ្តាលមកពីទុស្សេខ្សែភ្លើង ហើយផ្កាភ្លើងក៏បានធ្លាក់ទៅលើក្រដាសអេតចាយ បង្កឱ្យក្លាយជាអគ្គិភ័យឆាបឆេះតែម្តង។
ប្រភពដដែលបន្តថា នៅក្នុងហេតុការណ៍នោះ នគរបាលក៏បានទាក់ទងហៅរថយន្តពន្លត់អគ្គិភ័យចំនួន៨គ្រឿងទៅអន្តរាគមន៍បាញ់ពន្លត់ហើយ ហើយភ្លើងក៏បានរលត់ទៅវិញនៅវេលាម៉ោងប្រមាណ១១និង៥៥នាទីថ្ងៃត្រង់នេះផងដែរ ។
តាមនគរបាលបានអោយដឹងទៀតថា អគ្គិភ័យខាងលើនេះ បានបណ្តាលអោយបន្ទប់ស្នាក់នៅចំនួន៣បន្ទប់រងការខូចខាត រួមជាមួយនឹងសម្ភារៈមួយចំនួនទៀត ។ ទោះបីជាយ៉ាងណា អគ្គិភ័យនេះ ពុំបណ្តាលអោយឆេះរាលដាល ឬមានមនុស្សរងរបួសឡើយ ៕
ចែករំលែកព័តមាននេះ