ខេត្តស្ទឹងត្រែង ៖ មិនថាក្រុមហ៊ុន ឬកសិករត្រូវបង្កើនការដាំដំណាំឈើហូបផ្លែឱ្យបានច្រើន ដើម្បីរួមចំណែកជួយលើកកម្ពស់សេដ្ឋកិច្ចជាតិ និងគ្រួសារកសិករនៅតាមមូលដ្ឋាន ហើយនៅពេលផលិតបានទិន្នផលច្រើន យើងអាចបង្កើតរោងចក្រនៅតំបន់នេះតែម្តង ។ នេះជាការលើកឡើងរបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ។
លោក វេង សាខុន ក្នុងគ្រាដែលលោកចុះពិនិត្យ និងពិគ្រោះយោបល់ស្តីពីការពង្រីកការងារដាំដុះដំណាំស្វាយ នៅក្រុមហ៊ុនក្រែនស៊ី ស្ថិតនៅឃុំអូរស្វាយ ស្រុកបុរីអូស្វាយសែនជ័យ នាពេលថ្មីៗនេះ ។
លោករដ្ឋមន្ត្រី ក្រសួងកសិកម្មរុក្ខាប្រមាញ់ និងនេសាទមាន ប្រសាសន៍ថា ក្រុមហ៊ុនក្រែនស៊ីមួយនេះពិតជាមានបច្ចេកទេសពេញលេញក្នុងការផលិតដំណាំឈើហូបផ្លែដូចនេះសុំឱ្យបង្កើនការដាំដុះឈើហូបផ្លែឱ្យបានច្រើនប្រភេទ ដើម្បីនាំផលិតផលទាំងនេះចេញទៅកាន់ទីផ្សារ និងឈានទៅរៀបចំឱ្យមានរោងចក្រកែច្នៃនៅក្នុងទីតាំងក្រុមហ៊ុននេះតែម្តង ។
ចំណុចនេះសូមឱ្យក្រុមហ៊ុនជួយបណ្តុះបណ្តាលបច្ចេកទេសដាំដុះស្វាយទៅដល់កសិករ ក្នុងតំបន់នេះ ដើម្បីបង្កើនទិន្នផលឈានទៅបង្កើតរោងចក្រកែច្នៃបាន ។
ដូចនេះក្រុមហ៊ុននឹងអាចប្រមូលទិញពីកសិករដែលគាត់ដាំដុះជុំវិញ យកមកកែច្នៃធ្វើជាទឹកសេរ៉ូស្វាយ ឬក៏ធ្វើជាភេសជ្ជៈពីផ្លែស្វាយ ហើយនៅពេលអនាគតក៏ធ្វើការវេចខ្ចប់នាំចេញទៅក្រៅប្រទសបានដែរ ប៉ុន្តែករណីវេចខ្ចប់នាំចេញផ្លែស្វាយស្រស់ មិនមែនជាការងាយស្រួលប៉ុន្មានទេ មុននឹងធ្វើការនាំចេញផ្លែស្វាយស្រស់ទៅបាន កសិករ និងត្រូវចុះបញ្ជីការ ចុះបញ្ជីនេះមានន័យថា នៅពេលដែលយើងវេចខ្ចប់យើងវ៉ៃឈ្មោះលេខកូដចម្ការ និងលេខ១ លេខ២ លេខ ៣ អញ្ចឹងហើយនៅពេលយើងបញ្ជូនផ្លែឈើនេះទៅដល់ចិន គឺបើសិនជាមានបញ្ហានៅទីនោះគេនឹងស្វែងរកបញ្ហានៅចំការស្វាយដែលមានលេខកូដហ្នឹង ។
លោក ចេក គី ជនជាតិចិន ជាអ្នកគ្រប់គ្រងផ្នែកបច្ចេកទេសដាំស្វាយនៅក្រុមហ៊ុនក្រែនស៊ីស្ទឹងត្រែង បានបញ្ជាក់ថា ចាប់ពីឆ្នាំ២០១៥មកក្រុមហ៊ុនដាំស្វាយបានចំនួន១១ប្រភេទ ក្នុងនោះមានចំនួន០៩ប្រភេទបានទទួលផល ហើយក្នុងចំណោម០៩ប្រភេទនេះ មាន៤ប្រភេទទទួលបានផលច្រើនជាងគេ ដូចជា ស្វាយឈ្មោះជីងវ៉ាំង -ស៊ី សឺ-ឃេត -និងអាយម៉ាង ជាដើម ។
លោកបន្តថា បច្ចុប្បន្នកម្មករធ្វើការនៅក្នុងក្រុមហ៊ុនទទួលបានបច្ចេកទេសអាចយកទៅបង្ហាត់បង្រៀនគ្នាបានដោយមិនបាច់ឱ្យកសិករចំណាយពេលវេលាមករៀនទេឱ្យតែកសិករមានផ្ទៃដីដែលមានប្រភពទឹកគ្រប់គ្រាន់អាចមកយកពូជទៅដាំដុះបានហើយ ។
សូមបញ្ជាក់ថា ក្រុមហ៊ុនក្រែនស៊ីស្ទឹងត្រែងបានទទួលសិទ្ធវិនិយោគដីសម្បទានសេដ្ឋកិច្ចពីរាជរដ្ឋាភិបាល ជាង៩០០០ហិកតា នៅឆ្នាំ២០០១ សំរាប់ដាំកៅស៊ូ តែដោយសារផ្ទៃដីនេះមិនអំណោយផល ទើបចាប់ពីឆ្នាំ២០១៥ មកបានប្តូរទៅដំណាំដាំស្វាយវិញ បច្ចុប្បន្នបានទទួលផល និងបាននាំចេញទៅទីផ្សារក្រៅប្រទេសហើយ ៕
ចែករំលែកព័តមាននេះ