រាជធានីភ្នំពេញ ៖ ការប្រកួតប្រដាល់នៅលើសង្វៀនទូរទស្សន៍ស៊ីធីអិនថ្ងៃសៅរ៍ ទី២៩ តុលា ស្អែកនេះ កីឡាករបងប្អូនត្រកូលឃីម២រូបគឺឃីម ឌីម៉ា និងឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យដូចគ្នា ត្រូវបានគេផ្គូផ្គង
រាជធានីភ្នំពេញ ៖ ការប្រកួតប្រដាល់នៅលើសង្វៀនទូរទស្សន៍ស៊ីធីអិនថ្ងៃសៅរ៍ ទី២៩ តុលា ស្អែកនេះ កីឡាករបងប្អូនត្រកូលឃីម២រូបគឺឃីម ឌីម៉ា និងឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យដូចគ្នា ត្រូវបានគេផ្គូផ្គងឱ្យជួបប្រកួតជាមួយកីឡាករបរទេស ។ អ្នកនិយមទស្សនាការប្រកួតប្រដាល់ភាគច្រើនកំពុងទន្ទឹងរង់ចាំមើលថា តើកីឡាករកម្ពុជា២នាក់បងប្អូននេះទៅរួចឬអត់ ខណៈកីឡាករបរទេសដែលពួកគេត្រូវជួបនាពេលនេះហាក់មានសមត្ថភាពពិបាកផ្ដួលអីុចឹងនោះ។
ឃឹម ឌីម៉ា ដែលមានប្រវត្តិប្រកួត៦៣ដង ឈ្នះ៥៤ដង ចាញ់៦ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន១៩ដង ត្រូវបានគេរៀបចំឱ្យជួបប្រកួតជាមួយកីឡាករឡាវឈ្មោះYod Khunphon Ekbang Sai ក្នុងប្រភេទទម្ងន់៦៣,៥គីឡូក្រាម ។ កីឡាករឡាវរូបនេះធ្លាប់ប្រកួតបាន៨៥ដង ឈ្នះ៦៩ដង ចាញ់១៤ដងស្មើ២ដង និងផ្ដួលគូប្រកួតឱ្យសន្លប់បាន៣ដង។ Yod Khunphon Ekbang Sai ធ្លាប់មកប្រកួតនៅស្រុកខ្មែរជាច្រើនដងរួចមកហើយ ឯថ្វីដៃប្រកួតនៅលើសង្វៀនក៏មិនអន់ប៉ុន្មានដែរដូច្នេះចាំមើលឃីម ឌីម៉ា អាចយកឈ្នះគេបានឬអត់ ។
ចំណែកឃីម បូរ៉ា ធ្លាប់ប្រកួត៥៨ដង ឈ្នះ៤០ដង ចាញ់១៨ដង និងផ្ដួលគូប្រកួតឱ្យសន្លប់១៦ដង នឹងជួបប្រកួតជាមួយកីឡាករថៃឈ្មោះPhit Noypeaka Care ក្នុងប្រភេទទម្ងន់៦០គីឡូក្រាម ។ កីឡាករថៃរូបនេះធ្លាប់ប្រកួត៦៥ដង ឈ្នះ៥៣ដង ចាញ់៩ដង ស្មើ២ដង និងធ្លាប់មកប្រកួតនៅលើសង្វៀនស្រុកខ្មែរជាច្រើនលើករួចមកហើយ ប៉ុន្តែសម្រាប់ការមកជួបជាមួយឃីម បូរ៉ា លើកនេះពិបាកប៉ាន់ស្មានលទ្ធផលទុកមុនណាស់ដោយសារកីឡាករទាំងពីរមានសមត្ថភាពមិនអន់ដូចគ្នា ដូច្នេះបើចង់ដឹងថាអ្នកណាខ្លាំងជាងអ្នកណាមានតែរង់ចាំមើលការប្រកួតជាក់ស្ដែងនៅលើសង្វៀនប៉ុណ្ណោះ។
នៅលើសង្វៀនដដែលក៏មានការប្រកួតរវាងកីឡាករក្នុងស្រុកផងដែរដូចជា កីឡាករ សុខ ទូ មកពីក្លិបឃ្លាំងមឿងកីឡា ប្រកួតជាមួយកីឡាករ បឺត សង្ឃឹម មកពីក្លិបរ៉ាហាប់ស្វាយប៉ាក ។ កីឡាករ ផាន់ សារុន មកពីក្លិបគជសារកីឡា ប្រកួតជាមួយកីឡាករ សួង សុវណ្ណថា មកពីសមាគមកីឡាប្រដាល់ក្រសួងការពារជាតិ និងគូចុងក្រោយកីឡាករ រ៉ន កត្តា មកពីក្លិបភិរម្យគុនខ្មែរ ប្រកួតជាមួយកីឡាករ ឡុង សុភ័ស្ស មកពីក្លិបសាលវ័ន្តកីឡា ។
ដោយឡែកនៅលើសង្វៀនទូរទស្សន៍ស៊ីអិនស៊ី នាយប់ថ្ងៃសៅរ៍នេះក៏មានការប្រកួតអន្តរជាតិចំនួន២គូផងដែរ ។ គូអន្តរជាតិដែលត្រូវបង្ហាញខ្លួននៅយប់នេះមាន សែន រ៉ាដេត មកពីក្លិបអប្សរាគុនខ្មែរ ប្រកួតជាមួយកីឡាករថៃឈ្មោះ Loukyort Sit Sampayark ក្នុងប្រភេទទម្ងន់៥១គីឡូក្រាម និងកំពែង ខ្មៅ មកពីក្លិបអប្សរាគុនខ្មែរដូចគ្នា ប្រកួតជាមួយកីឡាករថៃឈ្មោះSamsing Loukchunprathan ក្នុងប្រភេទទម្ងន់៥៤គីឡូក្រាម ។ ចំណែកគូប្រកួតមិត្តភាពធម្មតារវាងកីឡាករកម្ពុជានិងកម្ពុជាមាន រិន សារដ្ឋ មកពីក្លិបខេត្តព្រៃវែង ប្រកួតជាមួយ ផន ផល្លា មកពីក្លិបតាព្រហ្មមានជ័យ និងចាន់ សំអាត មកពីក្លិបកងពលតូចលេខ៨ភ្នំទ្រព្យ ប្រកួតជាមួយង៉ែត រដ្ឋា មកពីក្លិបតាព្រហ្មមានជ័យ។
នៅថ្ងៃអាទិត្យទី៣០ តុលា ខាងស្អែក នៅលើសង្វៀនដដែលក៏មានការប្រកួតប្រដាល់ដែលរៀបចំឡើងដោយក្រុមហ៊ុនស្រាសាច់ដុំពិសេសផងដែរ។ សមាសភាពកីឡាករដែលចូលរួមប្រកួតនៅថ្ងៃនោះសុទ្ធតែមានសមត្ថភាពខ្លាំងមិនធម្មតា។ កីឡាករ ពីន ណាថៃ មកពីក្លិបកងពលតូចអន្តរាគមន៍លេខ៨ភ្នំទ្រព្យ ប្រកួតជាមួយកីឡាករ ប៉ែន ដេវីត មកពីក្លិបកងពលតូចលេខ៧០។ កីឡាករ អេ សារ័ត្ន មកពីក្លិបអេភូថងកីឡា ប្រកួតជាមួយកីឡាករ ឡុង សុធា មកពីក្លិបខ្លារខិនមានរិទ្ធ ។ កីឡាករ ហៃ សុខបាន មកពីក្លិបតាឡីដំរីមានរិទ្ធ ប្រកួតជាមួយកីឡាករ រឿន ឈី មកពីក្លិបគុហារព្រហ្មមានជ័យ ។ កីឡាករ នីម នន មកពីក្លិបទ័ពពិសេសឆត្រយោង៩១១ ប្រកួតជាមួយកីឡាករ ឡុង វ៉ាន់ត មកពីក្លិបសាលវ័ន្តកីឡា ។ កីឡាករ ផន ភឿត មកពីក្លិបឃ្លាំងមឿងកីឡា ប្រកួតជាមួយកីឡាករ ខុន បូឡា មកពីក្លិបកងពលតូចអន្តរាគមន៍លេខ៨ភ្នំទ្រព្យ និងគូចុងក្រោយកីឡាករ សី ដាវីត មកពីក្លិបចាន់បុរីវង្ស ប្រកួតជាមួយកីឡាករ សិទ្ធ ដេវីត មកពីក្លិបសាមគ្គីកូនខ្មែរ ៕
ចែករំលែកព័តមាននេះ