កីឡាករប្រដាល់សាកលកម្ពុជា២រូបទៀត ឡើងទៅកាន់វគ្គវគ្គពាក់កណ្ដាលផ្ដាច់ព្រ័ត្រ
- ភ្នំពេញ
ស៊ីហ្គេមវៀតណាម ៖ កីឡាករប្រដាល់សាកលកម្ពុជាចំនួន២រូបទៀតហើយដែលមានឱកាសបន្តដំណើរ
ស៊ីហ្គេមវៀតណាម ៖ កីឡាករប្រដាល់សាកលកម្ពុជាចំនួន២រូបទៀតហើយដែលមានឱកាសបន្តដំណើរឡើងទៅកាន់កៅអីប្រកួតវគ្គពាក់កណ្ដាលផ្ដាច់ព្រ័ត្រជាបន្តទៀតនៃព្រឹត្តិការណ៍កីឡាអាស៊ីអាគ្នេយ៍លើកទី៣១នៅទីក្រុងហាណូយប្រទេសវៀតណាម គឺកីឡាករសៅ រង្សីនិងកីឡាករហ៊ុន គឹមរៀង។
តាមការឱ្យដឹងពីសហព័ន្ធកីឡាប្រដាល់សាកលកម្ពុជា កីឡាករសៅ រង្សីបានយកឈ្នះកីឡាករម៉ាឡេស៊ីSheikh Rahmatullah Bin Ibrahim ដោយពិន្ទុ ប្រកួតលើប្រភេទទម្ងន់៥៧គីឡូក្រាមកាលពីល្ងាចថ្ងៃទី១៦ឧសភានៅទីក្រុងហាណូយ ។ ការយកឈ្នះលើម្ចាស់មាដាយសំរឹទ្ធិស៊ីហ្គេមឆ្នាំ២០១៩រូបនេះ ធ្វើឱ្យគេក្លាយជាបេក្ខភាពទី៣ដែលបានកក់មេដាយសំរឹទ្ធក្នុងដៃបន្ទាប់ពីកីឡាករអ៊ុង ភារ៉ាក់និងកីឡាការិនីវី ស្រីស្រស់ដែលបាននឹងកំពុងតែបានចាប់ឆ្នោតឈរចាំនៅវគ្គពាក់កណ្ដាលផ្ដាច់ព្រ័ត្រដូចគ្នា។
ចំណែកកីឡាករហ៊ុន គឹមរៀងវិញពិតជាធ្វើឱ្យមានការភ្ញាក់ផ្អើលយ៉ាងខ្លាំង បន្ទាប់ពីគេបានវាយផ្ដួលកីឡាករមីយ៉ាយ៉ាន់ម៉ាYe Win Naingឱ្យសន្លប់នៅត្រឹមទឹកទី១ប៉ុណ្ណោះដើម្បីបានបន្តដំណើរទៅកាន់កៅអីប្រកួតវគ្គពាក់កណ្ដាលផ្ដាច់ព្រ័ត្រដូចគ្នា នៅក្នុងប្រភេទទម្ងន់៧៥គីឡូក្រាម ។ ដូច្នេះគិតរហូតមកទល់ពេលនេះកីឡាករ កីឡាការិនីប្រដាល់សាកលកម្ពុជាចំនួន៤រូបរួចមកហើយ ដែលមានឱកាសដណ្ដើមយកមេដាយសំរឹទ្ធមកទុកនៅក្នុងដៃ និងបានបន្តដំណើរឡើងទៅកាន់កៅអីប្រកួតនៅវគ្គពាក់កណ្ដាលផ្ដាច់ព្រ័ត្រដណ្ដើមយកមេដាយប្រាក់ជាបន្តទៀត ៕
ចែករំលែកព័តមាននេះ