លោកនេនដែលប៉ូលិសចាប់ខ្លួនបញ្ជូនទៅតុលាការបានដោះលែងជាបណ្តោះអាសន្នសិន
- សៀមរាប
ខេត្តសៀមរាប ៖ លោក យិន ស្រាង អ្នកនាំពាក្យសាលាដំបូងខេត្តសៀមរាបបានប្រាប់តាមឆាត តេលេក្រាមថា លោកនេនឈ្មោះ តឹក…
ខេត្តសៀមរាប ៖ លោក យិន ស្រាង អ្នកនាំពាក្យសាលាដំបូងខេត្តសៀមរាបបានប្រាប់តាមឆាត តេលេក្រាមថា លោកនេនឈ្មោះ តឹក…
ខេត្តសៀមរាប ៖ លោក យិន ស្រាង អ្នកនាំពាក្យសាលាដំបូងខេត្តសៀមរាបបានប្រាប់តាមឆាត តេលេក្រាមថា លោកនេនឈ្មោះ តឹក សំណាង គង់នៅវត្តអរញ្ញេរង្ស៊ី ហៅវត្តល្អក់ ស្ថិតនៅក្នុងភូមិល្អក់ ឃុំកណ្តែក ស្រុកប្រាសាទបាគង ខេត្តសៀមរាប ដែលកម្លាំងការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តចាប់ខ្លួនបញ្ជូនមកកាន់តុលាការនោះ ត្រូវបានចៅក្រមស៊ើបសួរសម្រេចដោះលែងឱ្យនៅក្រៅឃុំហើយវិញ នារសៀលថ្ងៃទី១៦ ឧសភា ឆ្នាំ២០២២ នេះ ដោយក្រោមការត្រួតពិនិត្យរបស់តុលាការ។
គួរបញ្ជាក់ផងដែរ ករណីចោរចូលលួចលុយអស់ជិត២ម៉ឺនដុល្លារ ក្នុងបន្ទប់សឹងរបស់លោក ចៅអធិការវត្តអរញ្ញ រង្ស៊ី ហៅ វត្តល្អក់ នោះ បានកើតឡើងនៅវេលាម៉ោងប្រមាណ១១និង៤០នាទីថ្ងៃត្រង់ថ្ងៃទី១២ ខែឧសភា ឆ្នាំ២០២២ ស្ថិតនៅចំណុចក្នុងបរិវេណវត្តភូមិល្អក់ ឃុំកណ្តែក ស្រុកប្រាសាទបាគង ខេត្តសៀមរាប ។
ប្រភពពីសមត្ថកិច្ចបានឱ្យដឹងដែរថា ករណីជនសង្ស័យលួចគាស់ទ្វារបន្ទប់ព្រះគ្រូចៅអធិការវត្ត អរញ្ញរង្ស៊ី ហៅវត្តល្អក់យកលុយអស់ជិត២ម៉ឺនដុល្លារនោះ ត្រូវបានកម្លាំងនគរបាលស្រុកប្រាសាទបាគង និងកម្លាំងនគរបាលព្រហ្ម ទណ្ឌកម្រិតធ្ងន់ ស្រាវជ្រាវឃាត់ខ្លួនបានជនសង្ស័យម្នាក់ជាលោកនេន នោះឈ្មោះ តឹក សំណាង ភេទប្រុស អាយុ១៥ឆ្នាំ រស់នៅភូមិត្រពាំងទឹម ឃុំកណ្ដែក ស្រុកប្រាសាទបាគង ខេត្តសៀមរាប តែត្រូវបានតំណាងអយ្យការសាលាដំបូងខេត្តសៀមរាប ធ្វើការដោះលែងឱ្យនៅក្រៅឃុំជាបណ្តោះអាសន្ន។
ចំពោះការបំភ្លឺរបស់ព្រះអង្គ គ្រួច លន់ ព្រះជន៦៧ព្រះវស្សា ជាចៅអធិការវត្តអរញ្ញរង្សីហៅវត្តល្អក់ ជាជនរង គ្រោះបានមានសង្ឃដីកាថា ជារៀងរាល់ថ្ងៃ ព្រះអង្គតែងតែយកលុយចំនួន៣០លានរៀល ដែលជាលុយបានមកពីការប្រគេនរបស់ព្រះពុទ្ធបរិស័ទប្រគេនទុកសំរាប់ព្យាបាលព្រះរោគ និង លុយចំនួន១.២០០០ដុល្លារ ជាលុយបានមកពីការចូលរួមរបស់មហាជនជួយសាងសងសាលាអនុវិទ្យាល័យអរញ្ញរង្សី ហើយលុយទាំងនោះព្រះអង្គបានដាក់ក្នុងថង់យាម ហើយយកទៅទុកក្បាលគ្រែខាង កើតលោក សឹង និង បានយកខ្នើយគ្របពីលើជិត ។
លុះនៅវេលាម៉ោង៥និង ៣០នាទីល្ងាច ថ្ងៃទី១២ខែ ឧសភា ព្រះអង្គបានចេញពីបន្ទប់កុដ្ឋសឹងខាងលើ រួចចុះទៅក្រោមនិងបានឆាន់ចង្ហាន់ពេលព្រឹកនៅសាលាឆាន់រួចនៅចាំទទួលចង្ហាន់នៅទីនោះ ពីពុទ្ធបរិស័ទមិនបានឡើងមកកុដ្ឋវិញទេ រហូតដល់ពេលឆាន់ថ្ងៃត្រង់រួចម៉ោងប្រហែល ១១និង៤០នាទីថ្ងៃត្រង់ ទើបព្រះអង្គឡើងមកកុដ្ឋវិញ រួចមកដល់កុដ្ឋយកកូនសោចាក់ ស្រាប់តែបាត់មេសោ ទើបព្រះអង្គចូលទៅមើលកន្លែងទុកលុយ ស្រាប់តែបាត់អស់មិនឃើញតែម្ដង រួចក៏ផ្អើលឆោឡោនិងឃើញមេសោ និងដែកថ្នាំងអំពៅប្រវែងជិតមួយម៉ែត្រនៅមុខទ្វារឈៀងខាងត្បូង ។
បើតាមចម្លើយរបស់ឈ្មោះ តឹក សំណាង ភេទប្រុស អាយុ១៥ឆ្នាំ រស់នៅភូមិត្រពាំងទឹម ឃុំកណ្ដែក ស្រុកប្រាសាទ បាគង ខេត្តសៀមរាប បានបដិសេធទាំងស្រុងថា មិនមានការពាក់ព័ន្ធក្នុងការលួចលុយរបស់ចៅអធិការវត្តឡើយ ។ បច្ចុប្បន្ន លោក នេន ដែលកម្លាំងនគរ បាលព្រហ្មទណ្ឌកម្រិតធ្ងន់នៃស្នងការដ្ឋាននករបាលខេត្តសៀមរាប បញ្ជូនខ្លួន មក តុលាការ ដើម្បីចាត់ការបន្តតាមផ្លូវច្បាប់ នោះ ត្រូវបានចៅក្រមស៊ើបសួរសម្រេចចិត្តដោះលែង ឱ្យនៅក្រៅឃុំបណ្តោះអាសន្ន ក្រោមការត្រួតពិនិត្យ របស់តុលាការ ។ នេះបើយោងតាម ប្រសាសន៍របស់លោក យិន ស្រាង អ្នកនាំពាក្យសាលាដំបូងខេត្តសៀមរាប៕
ចែករំលែកព័តមាននេះ