រឿងជំពាក់មាស12ជី ប្តឹងកូនបំណុលអស់ទាំងដីស្រែ និងប្តីប្រពន្ធជាប់គុកបន្តបន្ទាប់
ខេត្តព្រៃវែង ៖ ដោយសារតែរឿងជំពាក់មាស១២ជីស្មើ១តម្លឹង២ជី ពីរនាក់ប្តីប្រពន្ធ ត្រូវម្ចាស់បំណុលប្តឹងដាក់គុកជាបន្តបន្ទាប់ដោយមិនដឹងមូលហេតុ
ខេត្តព្រៃវែង ៖ ដោយសារតែរឿងជំពាក់មាស១២ជីស្មើ១តម្លឹង២ជី ពីរនាក់ប្តីប្រពន្ធ ត្រូវម្ចាស់បំណុលប្តឹងដាក់គុកជាបន្តបន្ទាប់ដោយមិនដឹងមូលហេតុ
ខេត្តព្រៃវែង ៖ ដោយសារតែរឿងជំពាក់មាស១២ជីស្មើ១តម្លឹង២ជី ពីរនាក់ប្តីប្រពន្ធ ត្រូវម្ចាស់បំណុលប្តឹងដាក់គុកជាបន្តបន្ទាប់ដោយមិនដឹងមូលហេតុ ហើយដីស្រែក៏ត្រូវរឹបអូសគ្មានដីសម្រាប់ធ្វើស្រែចិញ្ចឹមកូនតទៅទៀតដែរ ។ អ្នកស្ត្រី សារិន រ៉ា និងប្តីឈ្មោះ ឈន អឿន រស់នៅភូមិព្រៃមាន់ ឃុំឫស្សីស្រុក ស្រុកពាមជ បានរៀបរាប់ថា កាលពីឆ្នាំ២០០៩ ពួកគាត់ពីរនាក់ប្តីប្រពន្ធ បានទៅខ្ចីមាសពីឈ្មោះ ជួន នឿក និងប្រពន្ធឈ្មោះ ឈឿង យ៉ាវ ចំនួន១២ជី ដោយសន្យាថា ខ្ចីចំនួន២ឆ្នាំនឹងឱ្យថ្លៃការក្នុងមួយឆ្នាំ១ជី២ហ៊ុន ។
លុះ១ឆ្នាំក្រោយមក ពួកគាត់បានយកមាសចំនួន៨ជីទៅសងឱ្យម្ចាស់បំណុលពីរនាក់ប្តីប្រពន្ធនោះដល់ផ្ទះ តែនៅពេលសងនោះ ទាំងពីរនាក់ប្តីប្រពន្ធមិនបានធ្វើឯកសារណាមួយនិងគ្មានសាក្សីដឹងឮដែលបញ្ជាក់ថា បានសងមាសទៅម្ចាស់បំណុលនោះឡើយ ។ អ្នកស្រីបន្តទៀតថា បន្ទាប់មកជាង៣ខែ ពួកគាត់ពីរនាក់ប្តីប្រពន្ធក៏បានយកមាសចំនួន៤ជីទៀតទៅសងម្ចាស់បំណុលខាងលើ និងបានប្រាប់ទៅម្ចាស់បំណុលថា ឱ្យពួកគេទូទាត់ថ្លៃការដែលជំពាក់នោះទៅ គាត់នឹងសងទៀត ។ ស្រាប់តែឈ្មោះ ជួន នឿក និងប្រពន្ធ បាននិយាយថា ពួកគាត់នៅជំពាក់ចំនួន១តម្លឹង៦ជី៥ហ៊ុន ព្រោះគេមិនដែលបានទទួលមាស៨ជីដែលពួកគាត់បានយកមកសងកាលពីលើកមុននោះទេ និងបានសួរពួកគាត់ថា តើមានអ្វីបញ្ជាក់ថា ពួកគាត់បានសងមាសឱ្យនោះ ។
ដោយការចរចាមិនត្រូវគ្នា ព្រោះម្ចាស់បំណុលទាមទារមាសដែលជំពាក់ទាំងអស់ចំនួន១តម្លឹង៦ជី៥ហ៊ុន តែគាត់ថាកូនបំណុងទាមទារសងត្រឹមតែ៤ជី និងថ្លៃការដែលសន្យាគ្នា ធ្វើឱ្យម្ចាស់បំណុលទាំងពីរនាក់ប្តីប្រពន្ធខឹងសម្បាក៏បានប្តឹងទៅតុលាការខេត្ត និងបានកោះហៅកូនបំណុលទាំងពីរនាក់ឱ្យទៅទូទាត់សងបំណុលដែលជំពាក់ទាំងអស់ ។ តែនៅពេលនោះ ពួកគាត់កូនបំណុល បានឱ្យម្ចាស់បំណុលស្បថនៅចំពោះមុខតុលាការថា មិនបានទទួលមាស៨ជី ដែលពួកគាត់បានសង តែម្ចាស់បំណុលមិនព្រមស្បថ គាត់ជាកូនបំណុលក៏មិនព្រមសងទៅតាមការទាមទាររបស់ម្ចាស់បំណុលដែរ ។ ពេលនោះ ស្រាប់តែតុលាការអនុវត្តសាលដីកាឱ្យរឹបអូសយកដីស្រែរបស់កូនបំណុលចំនួន១ហិកតា៥អា យកទៅលក់ឡាយឡុងបានតម្លៃ២តម្លឹងមាស ដើម្បីយកមកទូទាត់សងទៅម្ចាស់បំណុល ហើយនៅសល់មាសចំនួន៣ជី៥ហ៊ុន ដែលត្រូវប្រគល់ទៅឱ្យកូនបំណុលវិញ តែគាត់ជាកូនបំណុលមិនព្រមទទួល តុលាការក៏រក្សាទុកមាសនោះ និងបានប្រាប់ថា ពេលណាចង់បានទៅយកក៏បានដែរ ។ តែនៅក្នុងចំណាត់ការនោះក៏កើតមានភាពមិនប្រក្រតីមួយកើតឡើង គឺបើតាមផ្លូវច្បាប់ម្ចាស់បំណុលគ្មានសិទ្ធិទិញយកសម្ភារ ឬអ្វីៗគ្រប់យ៉ាងរបស់កូនបំណុលដែលតុលាការលក់ឡាយឡុងនោះទេ តែក្នុងរឿងនេះឈ្មោះ ជួន នឿក និងប្រពន្ធ បានទិញយកដីស្រែរបស់កូនបំណុល ដោយឱ្យប្អូនប្រុសជាអ្នកឈរឈ្មោះទិញពីតុលាការ ។ ពេលនោះដីស្រែដែលតុលាការបានឡាយឡុងលក់នោះ ក៏ដល់ពេលស្រូវទុំត្រូវច្រូត ស្រាប់តែម្ចាស់បំណុលបានឱ្យប្អូនប្រុសរបស់ខ្លួននោះ ចុះទៅច្រូតស្រូវនោះយកទៀត ហើយពេលប្តីគាត់ទៅឃាត់ ម្ចាស់បំណុលក៏បានប្តឹងទៅតុលាការឱ្យចាប់ខ្លួនប្តីគាត់ដោយចោទពីបទបង្ករបួសស្នាម និងត្រូវជាប់គុករយៈពេល៨ខែ ។
តាមអ្នកស្រី សារិន រ៉ា បានបន្តថា នៅពេលនោះគាត់ បានទៅជួបក្រឡាបញ្ជី គេក៏បានប្រាប់ថា បើសិនជាចង់ឱ្យប្តីចេញពីគុក គាត់ត្រូវបង់លុយឱ្យគេ២០០០ដុល្លារសិន ដោយដីនៅតែជារបស់គេដដែល ដោយសារតែអត់លុយ ប្តីរបស់គាត់ក៏ត្រូវជាប់គុកតាមយថាកម្ម ។ នៅពេលដែលចេញពីគុក ពួកគាត់ជាកូនបំណុលទាំងពីរនាក់ប្តីប្រពន្ធក៏បានដាក់ពាក្យបណ្តឹងទៅកាន់សាលាឧទ្ធរណ៍ ដើម្បីតវ៉ាបន្តរឿងដីស្រែរបស់គាត់បន្តទៀត ហើយពេលចេញពីសាលាឧទ្ធរណ៍វិញ មិនដឹងថាយ៉ាងណា គាត់ក៏ត្រូវសមត្ថកិច្ចចាប់ខ្លួនម្តងទៀត ដោយមិនដឹងមូលហេតុ នឹងត្រូវជាប់គុកអស់រយៈពេល៦ខែទៀត និងបានដោះលែងមកវិញ កាលពីថ្ងៃទី២៤ ខែកុម្ភៈ ឆ្នាំ២០១៦ កន្លងមកនេះ ។
បន្ទាប់ពីចេញពីគុក ពួកគាត់ក៏បានដាក់ពាក្យបណ្តឹងទៅកាន់ក្រសួងយុត្តិធម៌ ដើម្បីឱ្យជួយដោះស្រាយរកយុត្តិធម៌ជូនពួកគាត់ តែដោយសារអាជ្ញាធរមូលដ្ឋានសរសេរឈ្មោះគាត់ខុស ដោយឈ្មោះរបស់គាត់ គឺសារិន រ៉ា តែអាជ្ញាធរសរសេរត្រឹម រិន រ៉ា ដែលធ្វើឱ្យខុសនីតិវិធី ក្រសួងមិនអាចដោះស្រាយបាន និងធ្វើឱ្យពួកគាត់ពីរនាក់ប្តីប្រពន្ធត្រូវជាប់គុកដោយមិនដឹងមូលហេតុ និងបាត់បង់ដីស្រែសម្រាប់ចិញ្ចឹមជីវិតថែមទៀតផង ។
ការបរិយាយខាងលើនេះ គឺជាព័ត៌មានដែលបានទទួលពីភាគីកូនបំណុល ដែលគាត់ចាញ់ក្ដី និងមិនទាន់ទាក់ទងសុំការបំភ្លឺបានពីមន្ត្រីតុលាការខេត្ត និងភាគីម្ចាស់បំណុលនៅឡើយនោះទេ ដោយសារតែការទាក់ទងសុំការបំភ្លឺតប បានជួបនូវការលំបាក តែរំពឹងថានឹងមានការបំភ្លឺសម្រាប់ព័ត៌មានមួយនេះ ដើម្បីសាធារណជន និងយុត្តិធម៌ ៕
ចែករំលែកព័តមាននេះ