ខេត្តសៀមរាប ៖ ក្មេងប្រុស២នាក់បងប្អូនដែលរត់ចោលផ្ទះនោះ ឥឡូវបានដំណឹងហើយ គឺនៅភ្នំពេញ មានសុវត្ថិភាពទេ ខណៈពេលនេះកម្លាំងនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប បានសហការជាមួយកម្លាំងស្នងការនគរបាលរាជធានីភ្នំពេញ ចុះស្រាវជ្រាវ ដើម្បីស្វែងរកក្មេងប្រុសទាំង២នាក់បងប្អូន ដែលបាត់នោះយកមកប្រគល់ជូនឱ្យឪពុកម្តាយវិញ ខណៈពេលដែលប្រជាពលរដ្ឋបានប្រទះឃើញនៅភ្នំពេញ។
សូមបញ្ជាក់ថា ករណីបាត់ក្មេងប្រុសទាំង២នាក់នោះ បានកើតឡើងកាលពីវេលាម៉ោងប្រមាណ៣រសៀល ថ្ងៃទី១២ ខែឧសភា ឆ្នាំ២០២២ នេះ ស្ថិតនៅក្នុងភូមិល្អក់ ឃុំកណ្តែក ស្រុកប្រាសាទបាគង ខេត្តសៀមរាប។
សូមបញ្ជាក់បន្តថា នៅថ្ងៃទី១៤ ខែឧសភា ឆ្នាំ២០២២ វេលាម៉ោង២រសៀល កម្លាំងការិយាល័យព្រហ្មទណ្ឌកម្រិតស្រាល ចុះស្រាវជ្រាវករណីបាត់ក្មេង កាលពីថ្ងៃទី១២ ខែឧសភា នៅក្នុងឃុំកណ្ដែក ស្រុកប្រាសាទបាគង បានបែងចែកជាពីរក្រុម ៖ ដោយក្រុមទីមួយ ដឹកនាំដោយលោកឧត្តមសេនីយ៍ត្រីស្នងការរង អ៊ុ ចំរើន ស្នងការរងទទួលដឹកនាំការិយាល័យព្រហ្មទណ្ឌកម្រិតស្រាល ទៅផ្ទះជនរងគ្រោះទុកចោលនៅភូមិធ្លកអណ្ដូង សង្កាត់ស្លក្រាម ចុះត្រួតពិនិត្យកាមេរ៉ាសុវត្ថិភាព និងបំភ្លឺអ៊ុំស្រីឈ្មោះ ទី ឌៀប ភេទស្រី ដែលរស់នៅជិតផ្ទះ ករណីក្មេងដែលបានបាត់ពីផ្ទះ ហើយអ៊ុំស្រីក៏បានបំភ្លឺថា នៅវេលាម៉ោង១១ថ្ងៃត្រង់ ក្នុងថ្ងៃទី១២ ខែឧសភា គាត់បានឃើញក្មេងប្រុសទាំងពីរនោះ ជិះកង់កាត់មុខផ្ទះរបស់គាត់ ។
ចំណែកឯក្រុមទី២ មានលោកវរសេនីយ៍ទោ សំ សុខហេង អនុប្រធាននាយកដ្ឋានបច្ចេកទេស, លោកឧត្តមសេនីយ៍ត្រី ស្នងការរងទទួលដឹកនាំការិយាល័យបច្ចេកទេសវិទ្យាសាស្ត្រ ,លោកនាយការិយាល័យបច្ចេកទេស និងវិទ្យាសាស្ត្រ, លោកប្រធានការិយាល័យព្រហ្មទណ្ឌកម្រិតស្រាល, មន្ត្រីនគរបាលប៉ុស្តិ៍កណ្ដែក ចុះទៅស៊ើបអង្កេតផ្ទះគ្រួសារដែលបានបាត់ក្មេង ក្នុងឃុំកណ្ដែក ។
ប្រភពដដែលបន្តថា លុះរហូតដល់វេលាម៉ោង៤និង៣០នាទីរសៀល កម្លាំងយើងបានទទួលព័ត៌មានថា ឃើញក្មេងទាំងពីរនោះនៅក្រុងភ្នំពេញ លោកស្នងការរង អ៊ុ ចំរើន ក៏បានទាក់ទងទៅវរសេនីយ៍ឯក សាន សុខសីហា ប្រធានក្រុមការងារប្រតិកម្មរហ័សរបស់ស្នងការដ្ឋាននគរបាលរាជធានីភ្នំពេញ បានឲ្យចុះទៅទីតាំងវត្តថាន់ និងក្រុមការងាររបស់លោកវរសេនីយ៍ទោ សំ សុខហេន បានឆែកកាមេរ៉ាសុវត្ថិភាពក្នុងវត្តថាន់ វេលាម៉ោង៩និង០០នាទីព្រឹក ក្នុងថ្ងៃទី១៤ ខែឧសភា ក៏បានប្រទះឃើញក្មេងទាំងពីរនាក់នោះដើរចេញពីក្នុងបរិវេណវត្តថាន់ ទៅក្បាលថ្នល់ ហើយកម្លាំងយើងក៏បានទទួលវីដេអូកាមេរ៉ាសុវត្ថិភាពដែលឆែកឆេរនៅក្នុងវត្តថាន់ ឱ្យឪពុកម្ដាយ និងបងប្អូនមើលវីដេអូកាមេរ៉ាសុវត្ថិភាពនោះ ដើម្បីបញ្ជាក់ថា រូបភាពក្មេងទាំងពីរនាក់នោះ ពិតជាកូនប្រុសទាំងពីររបស់គាត់ពិតប្រាកដមែន ហើយកម្លាំងយើងក៏បានទាក់ទងទៅសមត្ថកិច្ចរាជធានីភ្នំពេញ ដើម្បីជួយអន្តរាគមន៍រកក្មេងបន្តទៀត ។
គួរបញ្ជាក់ថា ករណីក្មេងរត់ចេញពីផ្ទះនោះ មិនមែនជាករណីចាប់ជំរិតក្មេងប្រុសទាំង២នាក់ បងប្អូននោះទេ គឺព្រោះតែខឹងឪពុកម្តាយដែលតែងតែអប់រំ និងវា.យជារឿយៗ ទើបធ្វើឱ្យក្មេងប្រុសទាំង២នាក់រត់ចេញពីផ្ទះ ។
គួរបញ្ជាក់បន្តថា លោកស្នងការរងនគរបាលខេត្តបានប្រាប់ថា កាលពីថ្ងៃទី១៣ ខែឧសភា ឆ្នាំ២០២២ ដោយបានទទួលព័ត៌មានពីឈ្មោះ ប៉ិច សុខេន ភេទស្រី អាយុ៣៦ឆ្នាំ នៅភូមិល្អក់ ឃុំកណ្ដែក ស្រុកប្រាសាទបាគង ខេត្តសៀមរាប ត្រូវជាម្ដាយក្មេងរងគ្រោះបានរាយការណ៍មកថា កូនប្រុសទាំង២នាក់របស់គាត់ គឺម្នាក់ឈ្មោះ ហ៊ុន គឹមហេង អាយុ១៤ឆ្នាំ និងម្នាក់ទៀតឈ្មោះ ហ៊ុន សុខវិសាល អាយុ៩ឆ្នាំ បានចេញទៅរៀននៅម៉ោង៦ព្រឹកថ្ងៃទី១២ ខែឧសភា ឆ្នាំ២០២២ នៅសាលាអនុវិទ្យាល័យធ្លកអណ្ដូង ស្ថិតក្នុងភូមិធ្លកអណ្ដូង សង្កាត់ស្លរក្រាម ក្រុង-ខេត្តសៀម រាប ហើយតែងតែមកដល់ផ្ទះនៅម៉ោង១២និង៣០នាទីរសៀល ដូចសព្វមួយដង។
លោកបានបន្ថែមទៀតថា កាលពីថ្ងៃទី១២ ខែឧសភា នៅវេលាម៉ោង៦និង០០នាទីព្រឹក កូនរបស់គាត់ទាំង២នាក់បានចេញទៅរៀនតាមទំលាប់ដូចរាល់ដង ដោយឌុបគ្នាជាមួយបងប្អូន ហើយរហូតដល់ម៉ោងជិត១រសៀល ថ្ងៃទី១២ ខែឧសភា ស្រាប់តែមិនឃើញកូនមកវិញ គាត់ក៏បានទូរស័ព្ទទៅកូនតែមិនចូល ដោយប្លែកព្រោះរាល់ដងកូនគាត់មិនដែលបិទទូរស័ព្ទទេ ហើយគាត់បានទូរស័ព្ទសួរបងប្អូនថា តើបានឃើញកូនដែរឬទេ0x017d7 ប៉ុន្តែបងប្អូនប្រាប់ថា «អត់ឃើញទេ» ទើបគាត់ និងប្ដី ព្រមទាំងបងប្អូនបាននាំគ្នាដើររក តែដើរកមិនឃើញរហូតមកដល់ថ្ងៃទី១៤ ខែឧសភា ឆ្នាំ២០២២ នេះ។
គួរបញ្ជាក់ទៀតថា ៖ ឪពុកម្តាយបង្ហោះថាគេចាប់កូនប្រុស២នាក់ដាក់ឡាន លុះចុះពិនិត្យ ទើបដឹងរឿងពិត ៕
ចែករំលែកព័តមាននេះ