សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ២០២២ បានលើកឡើងថា នៅឆ្នាំនេះ គឺជាខួបលើកទី៤៥ នៃទំនាក់ទំនងកិច្ចសន្ទនារវាងអាស៊ាន-សហរដ្ឋអាមេរិក ហើយពេលនេះជាវិធីមួយដ៏សាកសមដែលថ្នាក់ដឹកនាំអាស៊ាន និង
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ២០២២ បានលើកឡើងថា នៅឆ្នាំនេះ គឺជាខួបលើកទី៤៥ នៃទំនាក់ទំនងកិច្ចសន្ទនារវាងអាស៊ាន-សហរដ្ឋអាមេរិក ហើយពេលនេះជាវិធីមួយដ៏សាកសមដែលថ្នាក់ដឹកនាំអាស៊ាន និងសហរដ្ឋអាមេរិក បានជួបជុំគ្នានៅក្នុងសេតវិមាន ដើម្បីរំលឹកនូវព្រឹត្តិការណ៍ ជាប្រវត្តិសាស្ត្រ នៃភាពជាដៃគូដ៏យូរអង្វែងរបស់យើង ។
ការលើកឡើងរបស់សម្ដេចតេជោ ប្រធានអាស៊ានប្តូវេនឆ្នាំ២០២២ បែបនេះ ធ្វើឡើងនៅក្នុងពិធីលាងសាយភោជន៍រៀបចំ ដោយលោក ចូ បៃដិន ប្រធានាធិបតីសហរដ្ឋអាមេរិក នៅថ្ងៃទី១៣ ខែឧសភា ឆ្នាំ២០២២ (ម៉ោងនៅកម្ពុជា) នារដ្ឋធានីវ៉ាស៊ីនតោនឌីស៊ី។
នៅក្នុងឱកាសនោះ សម្ដេចតេជោ បានថ្លែងអំណរគុណចំពោះលោក ចូ បៃឌិន ដែលបានផ្ដល់នូវបដិសណ្ឋារកិច្ចដ៏កក់ក្ដៅដល់រូបសម្ដេច នឹងប្រមុខថ្នាក់ដឹកនាំ នៃបណ្ដាប្រទេសអាស៊ានដទៃទៀត នៅក្នុងអំឡុងពេលនៃការស្នាក់នៅរបស់យើង នៅសហរដ្ឋអាមេរិក និងជាពិសេសការរៀបចំនូវពិធីលាងសាយភោជន៍ ដ៏ប្រពៃសម្រាប់ថ្ងៃនេះផង។
សម្ដេចបន្តថា ជាការពិតកិច្ចសហប្រតិបត្តិការរបស់យើងដែលឈរលើមូលដ្ឋានមួយដ៏រឹងមាំ និងម៉ឺងម៉ាត់នៃការគោរពគ្នាទៅវិញទៅមក មានការរក្សានូវឧត្តមប្រយោជន៍រួម បានឆ្លងកាត់រយៈពេលមួយដ៏វែងឆ្ងាយ និងជាពិសេសបានជំនះនូវឧបសគ្គប្រកបដោយភាពជោគជ័យ។ សម្តេចតេជោ ក៏បានរំលែកទុក្ខ ដោយសារសហរដ្ឋអាមេរិក បានប្រកាសនៅក្នុងថ្ងៃនេះ ដែលអាមេរិកបានទម្លាក់ទង់ជាតិមកពាក់កណ្ដាលដង ដើម្បីគោរពដល់វិញ្ញាណក្ខន្ធប្រជាពលរដ្ឋចំនួន ១លាននាក់ ដែលបានបាត់បង់ជីវិត ដោយសារជំងឺកូវីដ-១៩ ហើយសម្ដេចក៏សូមចូលរួមសំដែងសាមគ្គីភាពដ៏ជ្រាលជ្រៅ ចំពោះប្រជាពលរដ្ឋសហរដ្ឋអាមេរិក ក្នុងឱកាសនេះ។
សម្ដេចតេជោបសនបញ្ជាក់ថា ៖ «នាពេលនេះ យើងមានឱកាស សញ្ជឹងគិតអំពីដំណើរការដ៏វែងឆ្ងាយ ដែលអាស៊ានសហរដ្ឋអាមេរិក ធ្វើការរួមគ្នាដោយការខិតខំប្រឹងប្រែង ដែលនឹងជួយពង្រឹងទំនាក់ទំនងរបស់យើងលើគ្រប់វិស័យ»។ សម្តេចតេជោ បានគូសបញ្ជាក់ផងដែរថា ក្នុងនាមជាប្រធានអាស៊ាន នៅឆ្នាំ២០២២នេះ កម្ពុជាបានជ្រើសរើស យកប្រធានបទអាស៊ាន រួមគ្នាធ្វើការដោះស្រាយ បញ្ហាប្រឈមទាំងអស់គ្នា ដែលផ្អែកលើស្មារតី ដែលអាស៊ាន បាននិងកំពុងខិតខំរួមគ្នា ដើម្បីរក្សាសន្តិភាព និងស្ថិរភាព ក៏ដូចជាលើកកម្ពស់ ការអនុវត្តនូវវិបុលភាព ប្រកបដោយចីរភាព និងបរិយាបន្ន ជាការពិតយើងក៏ទទួលស្គាល់តួនាទី ប្រកបដោយភាពវិជ្ជមាន របស់ដៃគូខាងក្រៅរបស់អាស៊ាន ជាពិសេសសហរដ្ឋអាមេរិក នៅក្នុងដំណើរការទាំងមូលនេះ។
សម្ដេចតេជោក៏បានលើកឡើងថា អាស៊ានសូមវាយតម្លៃខ្ពស់ លើរាល់កិច្ចការ ដែលសហរដ្ឋអាមេរិក បានធ្វើសម្រាប់តំបន់។ ក្នុងនាមខ្លួនសម្ដេចផ្ទាល់ សម្ដេចសូមថ្លែងអំណរគុណ យ៉ាងជ្រាលជ្រៅចំពោះលោកប្រធានាធិបតី និងប្រជាពលរដ្ឋសហរដ្ឋអាមេរិក ដែលគាំទ្រតួនាទីរបស់កម្ពុជា ជាប្រធានអាស៊ាននៅឆ្នាំនេះ។ សម្តេចតេជោបានបន្តទៀតថា ជាមួយនឹងសន្ទុះ ដែលបាននឹងកំពុងវិវឌ្ឍយ៉ាងលឿននៃការឈានឆ្ពោះ ទៅរកប្រយោជន៍រួមតែមួយ សម្ដេចតេជោ សូមយកឱកាសនេះ អញ្ជើញលោកប្រធានាធិបតី ដោយផ្ទាល់ ចូលរួមក្នុងកិច្ចប្រជុំកំពូលអាស៊ាន-អាមេរិក លើកទី១០ ដែលនឹងប្រព្រឹត្តទៅនៅកម្ពុជា ក្នុងខែវិច្ឆិកាខាងមុខនេះ។
សម្ដេចតេជោក៏បានគូសបញ្ជាក់ នៅក្នុងឱកាសនោះថា សហរដ្ឋអាមេរិក គឺដើរតួនាទីសំខាន់ នៅក្នុងពិភពលោក ហើយតួនាទីនេះប្រសិនជាសេដ្ឋកិច្ច សហរដ្ឋអាមេរិកល្អ នោះសេដ្ឋកិច្ចពិភពលោក ក៏ល្អប្រសើរផងដែរ ហើយលើសពីនេះកន្លងមក អាមេរិកបានដើរតួនាទីសំខាន់ ក្នុងការប្រយុទ្ធប្រឆាំងនៅកូវីដ-១៩ ក្នុងការផលិតវ៉ាក់សាំងជាដើម។ នៅក្នុងឱកាសនោះ សម្តេចតេជោ ក៏បានអរគុណដល់ប្រធានាធិបតីអាមេរិក ដែលបានផ្ដល់វ៉ាក់សាំង ជូនដល់ប្រទេសកម្ពុជា រួមទាំងវ៉ាក់សាំង johnson and johnson ចំនួន ១លានដូស ហើយនិងមានវ៉ាក់សាំងពីរលានដូសបន្ថែមទៀត ហើយសន្យាថានឹងផ្ដល់វ៉ាក់សាំងជាង ៥លានដូសបន្ថែមទៀត សម្រាប់ប្រទេសកម្ពុជា នាពេលខាងមុខនេះ ៕
ចែករំលែកព័តមាននេះ