ខេត្តកំពង់ឆ្នាំង ៖ កម្លាំងសមត្ថកិច្ចចម្រុះស្រុកបរិបូណ៌ នៅថ្ងៃទី១០ ឧសភា បានចាប់ឃាត់ខ្លួនមនុស្សប្រុសស្រីចំនួន១៤នាក់ ក្នុងបទកាប់ទន្ទ្រានដីព្រៃលិចទឹកតំបន់៣ ក្នុងភូមិសាស្ត្រ ឃុំឆ្នុកទ្រូ និងឃុំត្រពាំងចាន់ ស្រុកបរិ
បូណ៌ ។
លោក គិត គន្ធា មេបញ្ជាការកងរាជអាវុធហត្ថស្រុកបរិបូណ៌បានបញ្ជាក់ឲ្យដឹងថា ដោយមានកិច្ចសហការរវាងកងរាជអាវុធហត្ថស្រុក កម្លាំងអធិការនគរបាលស្រុកបរិបូណ៌ និងមន្ត្រីជំនាញ ព្រមទាំងមានការចូលរួមពីអាជ្ញាធរ មូលដ្ឋានផងបានចែកកម្លាំងជា២ផ្នែកចេញប្រតិបត្តិការបង្ក្រាបការកាប់ទន្ទ្រានដីព្រៃលិចទឹកតំបន់៣ ដោយបានធ្វើការឃាត់ខ្លួនមនុស្សចំនួន១៤នាក់ ក្នុងនោះ មនុស្ស៧នាក់ បានធ្វើសកម្មភាពកាប់ទន្ទ្រានដីព្រៃរបស់រដ្ឋនៅចំណុចអ្នកតាទាំង ក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ និង៧នាក់ទៀតបានឃាត់ខ្លួននៅភូមិត្រពាំងចាន់ ឃុំត្រពាំងចាន់ ស្រុកបរិបូណ៌ ។
លោកមេបញ្ជាការកងរាជអាវុធហត្ថស្រុកបរិបូណ៌បានបញ្ជាក់ថា ការឃាត់ខ្លួនជនសង្ស័យទាំង១៤ នាក់ក្នុងនោះ ៧នាក់បានកាប់ទន្ទ្រានដីព្រៃលិចទឹកអស់ចំនួន២ហិកតា និង៧នាក់ទៀតបានកាប់ទន្ទ្រានដីព្រៃលិចទឹកអស់ចំនួន ០.១៥ហិកតា ។ ជនសង្ស័យទាំង ១៤ នាក់ត្រូវបានកសាងសំណុំរឿងបញ្ជូន ខ្លួនទៅមន្ត្រីជំនាញជលផលដើម្បីកសាងសំណុំរឿងតាមនីតិវិធី ។
គួររំលឹកដែរថា ក្រោយពីបទបញ្ជាយ៉ាងតឹងរឹងរបស់សម្ដេចនាយករដ្ឋមន្រ្តី ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា ស្ដីពីបទល្មើសនេសាទកន្លងមក កម្លាំងសមត្ថកិច្ចចម្រុះរបស់ខេត្តកំពង់ឆ្នាំងបានប្រតិបត្តិការ ចេញបង្ក្រាបបទល្មើសនេសាទដូចភ្លៀងរលឹម ដោយបានឃាត់ខ្លួនមនុស្សចំនួន៤នាក់បញ្ជូនទៅតុលាការ ក្នុងនោះ ២នាក់ជាអ្នកឆក់ត្រី និង២នាក់ទៀត ជាអ្នកទិញត្រីពីបទល្មើសឆក់ ។ ដោយការឃាត់ខ្លួនមនុស្សចំនួន១៤នាក់ខាងលើនេះ គឺជាអ្នកប្រព្រឹត្តបទល្មើសកាប់ទន្ទ្រានដីព្រៃលិចទឹកតំបន់៣៕
ចែករំលែកព័តមាននេះ