ADផ្ទាំងផ្សព្វផ្សាយពាណិជ្ជកម្ម

Picture

សម្តេចតេជោ អញ្ជើញទៅរដ្ឋធានីវ៉ាស៊ីនតោន ប្រកប ដោយសុវត្ថិភាព

1 ខែ មុន
  • ភ្នំពេញ

រាជធានី​ភ្នំពេញ ៖ សម្តេច​តេ​ជោ ហ៊ុន សែន និង​គណៈប្រតិភូ​ជាន់ខ្ពស់​កម្ពុជា​អញ្ជើញ​ទៅ​ដល់​រដ្ឋធានី​វ៉ា​ស៊ិ​ន​តោន​សហរដ្ឋអាមេរិក ប្រកបដោយ​សុវត្ថិភាព​នៅ​វេលា​ម៉ោង​១៧​និង​៣៣​នាទី​ល្ងាច ថ្ងៃ​ទី​១០ ខែឧសភា (​ម៉ោង​នៅ​រដ្ឋធានី​វ៉ា​ស៊ិ​ន​តោន​)…

រាជធានី​ភ្នំពេញ ៖ សម្តេច​តេ​ជោ ហ៊ុន សែន និង​គណៈប្រតិភូ​ជាន់ខ្ពស់​កម្ពុជា​អញ្ជើញ​ទៅ​ដល់​រដ្ឋធានី​វ៉ា​ស៊ិ​ន​តោន​សហរដ្ឋអាមេរិក ប្រកបដោយ​សុវត្ថិភាព​នៅ​វេលា​ម៉ោង​១៧​និង​៣៣​នាទី​ល្ងាច ថ្ងៃ​ទី​១០ ខែឧសភា (​ម៉ោង​នៅ​រដ្ឋធានី​វ៉ា​ស៊ិ​ន​តោន​) ត្រូវ​នឹង​ម៉ោង​៦​និង​៣៣​នាទី​ព្រឹក ថ្ងៃ​ទី​១១ ខែឧសភា ឆ្នាំ​២០២២ (​ម៉ោង​នៅ​រាជធានី​ភ្នំពេញ​) ។

Picture

សម្តេច​អគ្គមហាសេនាបតី​តេ​ជោ ហ៊ុន សែន នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា និង​ជា​ប្រធាន​អាស៊ាន​បាន​អញ្ជើញ​ទៅ​ដល់​រដ្ឋធានី​វ៉ា​ស៊ិ​ន​តោន​សហរដ្ឋអាមេរិក ប្រកបដោយ​សុវត្ថិភាព ដើម្បី​អញ្ជើញ​ចូលរួម​កិច្ចប្រជុំ​កំពូល​ពិសេស​អាស៊ាន​-​សហរដ្ឋអាមេរិក ដែល​នឹង​ប្រារព្ធ​ធ្វើ​ឡើង​នៅ​ថ្ងៃ​ទី​១២-១៣ ខែឧសភា ឆ្នាំ​២០២២​នេះ ។

យោង​តាម​បណ្តាញ​សង្គម​ហ្វេ​ស​ប៊ុ​ក​សម្តេច នៅ​ថ្ងៃ​ទី​១១ ឧសភា​បាន​ឲ្យ​ដឹង​ថា នៅ​អាកាសយានដ្ឋាន​អន្តរជាតិ Joint Base Andrews រដ្ឋធានី​វ៉ា​ស៊ិ​ន​តោន សហរដ្ឋអាមេរិក វត្តមាន​នៃ​ការ​អញ្ជើញ​ដល់​របស់​សម្តេច​តេ​ជោ នាយក​រដ្ឋមន្ត្រី និង​គណៈប្រតិភូ​ជាន់ខ្ពស់​រាជរដ្ឋាភិបាល​កម្ពុជា​ត្រូវ​បានការ​ធ្វើ​គារវកិច្ច​ស្វាគមន៍​យ៉ាង​ស្និទ្ធស្នាល​បំផុត​ពី​ឥស្សរជន​ជាន់ខ្ពស់​ពិធីការ​ក្រសួង ការ​បរទេស​សហរដ្ឋអាមេរិក ឯកឧត្តម កែវ ជា ឯកអគ្គរាជទូត​វិសាមញ និង​ពេញ​សមត្ថភាព​នៃ​ព្រះរាជាណាចក្រ​កម្ពុជា ប្រចាំ​សហរដ្ឋអាមេរិក ព្រមទាំង​វត្តមាន ឯកឧត្តម លោក​ជំទាវ ជា​ឥស្សរជន​ជាន់ខ្ពស់​សហរដ្ឋអាមេរិក និង​ឥស្សរជន​ការទូត​របស់​ព្រះរាជាណាចក្រ​កម្ពុជា ប្រចាំ​រដ្ឋធានី​វ៉ា​ស៊ិ​ន​តោន​ជា​ច្រើន​រូប ។

Picture

សូម​បញ្ជាក់​ដែរ​ថា តាម​កម្មវិធី​ដែល​បាន​គ្រោងទុក​ក្រៅពី​ការ​អញ្ជើញ​ចូលរួម​កិច្ចប្រជុំ​កំពូល​ពិសេស​អាស៊ាន​-​សហរដ្ឋអាមេរិក នា​ថ្ងៃ​ទី​១២-១៣​ឧសភា សម្តេច​តេ​ជោ នាយក​រដ្ឋមន្ត្រី ក្នុង​នាម​ជា​ប្រធាន​អាស៊ាន និង​ជា​សហ​ប្រធាន​នៃ​កិច្ចប្រជុំ​កំពូល​ពិសេស​អាស៊ាន​-​សហរដ្ឋអាមេរិក មាន​គម្រោង​ជួប​ពិភាក្សា​ទ្វេភាគី​ជាមួយ​ឯកឧត្តម ផា​ម មិ​ញ​ជី​ញ នាយក​រដ្ឋមន្ត្រី​វៀតណាម និង​បណ្តា​មេដឹកនាំ​អាស៊ាន សហរដ្ឋអាមេរិក ជា​ច្រើន​រូប ពិសេស​ជួប​សន្ទនា​ដោយ​ផ្ទាល់​ជាមួយ​សហគមន៍​ខ្មែរ​ប្រមាណ​១​ពាន់​នាក់​រស់នៅ​សហរដ្ឋអាមេរិក ។

Picture

ចំពោះ​ព័ត៌មាន​ពិស្តារ​ស្តី​ពី​សកម្មភាព សម្តេច​តេ​ជោ នាយក​រដ្ឋមន្ត្រី អញ្ជើញ​ចូលរួម​កិច្ចប្រជុំ​កំពូល​ពិសេស​អាស៊ាន​-​សហរដ្ឋអាមេរិក ដែល​ប្រារព្ធ​ធ្វើ​ឡើង​នៅ​ថ្ងៃ​ទី​១២-១៣ ឧសភា និង​ពិធី​សំណេះសំណាល ដោយ​ផ្ទាល់​រវាង​សម្តេច​តេ​ជោ នាយក​រដ្ឋមន្ត្រី ជាមួយនឹង​សហគមន៍​ខ្មែរ​រស់នៅ​សហរដ្ឋអាមេរិក​នឹង​ធ្វើការ​ផ្សព្វផ្សាយ​ជូន​ទស្សនា​ដោយ​ផ្ទាល់​ពី​រដ្ឋធានី​វ៉ា​ស៊ិ​ន​តោន សហរដ្ឋអាមេរិក ទៅ​កាន់​ព្រះរាជាណាចក្រ​កម្ពុជា ៕

Picture
Picture
Picture