ស្ត្រីជាម្តាយគ្រប់រូបគប្បីឧស្សាហ៍ពិនិត្យមើលអាការរបស់កូនៗកុំរំលង ព្រោះជំងឺទាំង៦ប្រភេទនឹងអាចកើតលើកូនតូចរបស់លោកអ្នកនៅពេលណាមួយ ដែលពិបាកនឹងចៀសបំផុត។ ខាងក្រោមនេះជារោគសញ្ញា ដែលមិនគួរមើលរំលង៖
១-ជំងឺកញ្ជ្រឹលនិងជំងឺស្អូច ៖ ជំងឺប្រភេទនេះអាចបណ្តាលឲ្យកូនលោកអ្នកមានសញ្ញាគ្រុនក្តៅខ្លាំង ចេញកន្ទួលក្រហម និងអាចមានសញ្ញារួមផ្សំមួយចំនួនទៀតដូចជា ក្អក ហៀរសំបោរ និងមានសញ្ញាក្រហមភ្នែកជាដើម ។
២-ជំងឺគ្រុនស្វិតដៃជើង ៖ កុមារដែលមានអាយុក្រោម១៥ឆ្នាំ អាចនឹងមានអាការខ្វិនទន់អវយវៈ កើតឡើងភ្លាម ។
៣-ក្អកមាន់ ៖ កុមារអាចនឹងមានអាការក្អកខ្លាំង ហើយជាប់ៗគ្នាសឹងរកពេលដកដង្ហើមមិនបាន បន្ទាប់មកក៏ចាប់ផ្តើមក្អកទៀត ។ អាការក្អកបែបនេះមានជារៀងរាល់ថ្ងៃ រហូតរយៈពេលពីរសប្តាហ៍ឡើងទៅ ។
៤-តេតាណូសទារក ៖ ទារកអាចចាប់ផ្តើមយំរហូត ហើយមិនអាចបៅដោះម្តាយបានរយៈពេលជាច្រើនម៉ោងឬច្រើនថ្ងៃ ទារកអាចមានអាការរឹងថ្គាម ។
៥-ខាន់ស្លាក់ ៖ ជំងឺនេះអាចជាសញ្ញារលាកបំពង់កស្រួចស្រាវ រលាកអាមីដាល និងមានភ្នាសពណ៌សឬពណ៌ប្រផេះជាប់ស្អិតបំពង់កឬលើអាមីដាល នាំឲ្យពិបាកដកដង្ហើមខ្លាំង ។
៦-រលាកស្រោមខួរក្បាល ៖ កុមារដែលមានអាយុក្រោម១៥ឆ្នាំ ផ្តើមដោយគ្រុនក្តៅ និងមានរោគសញ្ញាផ្សេងៗទៀត ដូចជាវង្វេងស្មារតី សន្លប់ឬមិនអាចនិយាយបាន ប្រកាច់ឬមានចលនាមិនប្រក្រតី រឹងកជាដើម។
ប្រសិនបើលោកអ្នកសង្ស័យថា កើតមានជំងឺទាំងនេះគួរតែរាយការណ៍ទៅកាន់កម្មវិធីជាតិផ្តល់ថ្នាំបង្ការដែលនៅជិតលោកអ្នក ឬនាំកុមារទៅមជ្ឈមណ្ឌលសុខភាពជាបន្ទាន់ ៕
ចែករំលែកព័តមាននេះ