បិទការប្រកួតកីឡាសិស្សបឋមសិក្សាថ្នាក់ជាតិឆ្នាំ ២០២២ ខេត្តមួយរកបានមេដាយច្រើនជាងគេ
- ភ្នំពេញ
រាជធានីភ្នំពេញ ៖ ការប្រកួតកីឡាក្របខណ្ឌសិស្សបឋមសិក្សាជ្រើសរើសជើងឯកថ្នាក់ជាតិប្រចាំឆ្នាំ២០២២ បានប្រារ
រាជធានីភ្នំពេញ ៖ ការប្រកួតកីឡាក្របខណ្ឌសិស្សបឋមសិក្សាជ្រើសរើសជើងឯកថ្នាក់ជាតិប្រចាំឆ្នាំ២០២២ បានប្រារព្ធពិធីបិទការប្រកួតជាផ្លូវការហើយ កាលពីល្ងាចថ្ងៃសៅរ៍ ទី៧ ឧសភា នៅវិទ្យាស្ថានជាតិហ្វឹកហ្វឺនកីឡាក្នុងសង្កាត់ស្វាយប៉ាក ខណ្ឌឬស្សីកែវក្រោមអធិបតីភាពលោកប៊ូ ជុំសេរី អនុរដ្ឋលេខាធិការក្រសួងអប់រំយុវជននិងកីឡា។
លោក ហួត សេងទ្រី ប្រធាននាយកដ្ឋានរៀបចំ និងគ្រប់គ្រងព្រឹត្តិការណ៍កីឡា នៃក្រសួងអប់រំ យុវជន និងកីឡាបានឲ្យដឹងថា ការប្រកួតនេះធ្វើឡើងចាប់ពីថ្ងៃទី២៩ មេសា និងបានបិទបញ្ចប់នៅថ្ងៃទី៧ ឧសភា ដោយមាន៨ប្រភេទកីឡា ស្មើនឹង៣៤វិញ្ញាសា លើប្រភេទកីឡាបាល់ទាត់ បាល់ទះ បាល់បោះ អត្តពលកម្ម វាយសី វាយកូនឃ្លីលើតុ តេក្វាន់ដូ WT និង តេក្វាន់ដូ ITF ដែលមានប្រតិភូ គ្រូបង្វឹក កីឡាករ កីឡាការិនី ១៦៧៧នាក់ចូលរួម ។ ដោយឡែកផ្អែកទៅលើរបាយការណ៍គណះកម្មការរៀបចំការប្រកួតបានឲ្យដឹងថា ក្រុមកីឡាខេត្តប៉ៃលិនគ្រងតំណែងជើងឯកដោយឈ្នះមេដាយមាស៨គ្រឿង ក្រុមកីឡាភ្នំពេញឈ្នះមេដាយមាស៤គ្រឿងជើងឯករង ហើយក្រុមកីឡាខេត្តស្ទឹងត្រែង ខេត្តត្បូងឃ្មុំ និងខេត្តបាត់ដំបងឈ្នះមេដាយមាស ៣ គ្រឿងដូចគ្នា។
លោកបានបន្តថា ខេត្តព្រៃវែង ខេត្តសៀបរាម និងខេត្តក្រចេះមេដាយមាស ២ គ្រឿងដូចគ្នា ចំណែកខេត្តកំពង់ឆ្នាំង ខេត្តតាកែវ ខេត្តកំពត ខេត្តកំពង់ធំ ខេត្តឧត្តរមានជ័យ ខេត្តព្រះវិហារ និងខេត្តបន្ទាយមានជ័យ មេដាយមាស ម្នាក់១ គ្រឿងប៉ុណ្ណោះ។
លោក ប៊ូ ជុំសេរី បានមានប្រសាសន៍ថា បានកោតសរសើរ និងវាយតម្លៃខ្ពស់ ចំពោះគណៈកម្មការរៀបចំការប្រកួត អង្គភាពពាក់ព័ន្ធ អាជ្ញាធរមានសមត្ថកិច្ច ប្រតិភូកីឡារាជធានី ខេត្តបានសហការរៀបចំការប្រកួតនេះឲ្យប្រព្រឹត្តទៅដោយរលូនទៅតាមការគ្រោងទុក។ ការរៀបចំការ ប្រកួតនេះគឺស្របពេល ដែលរាជរដ្ឋាភិបាលបានបើកដំណើរការប្រទេស និងសង្គមសេដ្ឋកិច្ចឡើងវិញ សកម្មភាពកីឡាក៏បានចាប់ផ្តើមដំណើរការឡើងវិញផងដែរ ក៏ប៉ុន្តែជំងឺកូវីដ-១៩ នៅតែជាបញ្ហាប្រឈមដ៏ធំ ចំពោះពិភពលោក ក៏ដូចជាកម្ពុជាផងដែរ។ ដូច្នេះយើងទាំងអស់គ្នាត្រូវបន្តរស់នៅជាមួយជំងឺនេះ តាមគន្លង ប្រក្រតីភាពថ្មី និងត្រូវសម្របសម្រួលខ្លួនក្នុងការហ្វឹកហាត់កីឡារៀបចំព្រឹត្តិ ការណ៍កីឡា ទៅតាមគន្លងប្រក្រតីភាពថ្មីដែរ ដោយរក្សានូវវិធានការការពារជាប់ជានិច្ច ពោលគឺរក្សាអនាម័យ វាស់កម្ដៅ រក្សាគម្លាត និង ពាក់ម៉ាសជាប្រចាំ។
លោកអនុរដ្ឋលេខាធិការបានបន្តថា ការប្រកួតធ្វើឡើងដើម្បីបំផុសសកម្មភាពអប់រំ កាយ និងកីឡាក្នុងគ្រឹះស្ថានសិក្សា និងនៅតាមរាជធានី-ខេត្ត និងជួយឲ្យសិស្សមានសុខុមាលភាពល្អ កាយសម្បទាមាំមួន ឆន្ទៈមោះមុត អំណត់ព្យាយាម វិន័យ ស្មារតីក្រុម គំនិតច្នៃប្រឌិត និងតស៊ូស្វិត ស្វាញ សំដៅដណ្ដើមបានលទ្ធផលល្អប្រសើរលើការប្រកួត ទទួលបានលទ្ធផលការសិក្សាល្អ និងជីវភាពរស់នៅសុខដុមរមនា។ លើកទឹកចិត្តដល់អ្នកលេងកីឡា និងអ្នកដែលមានឧបនិស្ស័យ ដើម្បីជ្រើសរើសបានជាកីឡាករ កីឡាការិនីថ្នាលល្អៗចូលក្នុងក្រុមជម្រើសជាតិ ចូលរួមក្នុងការហ្វឹកហាត់ត្រៀមលក្ខណៈចូលរួមការប្រកួតនៅលើឆាកជាតិនិងអន្តរជាតិនានា។ បង្កលក្ខណៈឲ្យសិស្សជួបជុំគ្នា ស្គាល់គ្នា ចងមិត្តភាព សាមគ្គីភាព ដើម្បីចេះរួមរស់ជាមួយគ្នានៅក្នុងសង្គម។
ចាប់ពីឆ្នាំ២០១៩ ក្រសួងបានកំណែទម្រង់ការប្រកួតកីឡាសិស្ស-និស្សិត ពីការប្រកួតកីឡាសិស្ស និស្សិតជ្រើសរើសជើងឯកថ្នាក់ជាតិប្រចាំឆ្នាំ ទៅជាការប្រកួតកីឡាសិស្សថ្នាក់ជាតិ (National School Games) និងកីឡាសាកលវិទ្យាល័យថ្នាក់ជាតិ (National University Games) រៀងរាល់០២ឆ្នាំម្តង ចាប់ពីឆ្នាំ២០១៩ ដោយធ្វើចន្លោះឆ្នាំគ្នាជាមួយការប្រកួតកីឡាជាតិ (National Games) ហើយថវិកាក្នុងឆ្នាំ ដែលមិន បានប្រកួត ក្រសួងនឹងបង្វែរទៅធ្វើទីលានកីឡានៅតាមសាលារៀនវិញ។
លោកបានបន្ថែមថា កំណែទម្រង់នេះដើម្បីឆ្លើយតបទៅនឹងការរីកចម្រើននៃវិស័យកីឡាជាតិ ក៏ដូចជាក្នុងតំបន់ ដើម្បី ជ្រើសរើសបានកីឡាករ កីឡាការិនីល្អៗចូលក្នុងក្រុមជម្រើសជាតិ ចូលរួមក្នុងការហ្វឹកហាត់ត្រៀមលក្ខណៈ ចូលរួមការប្រកួតនៅលើឆាកជាតិ និងអន្តរជាតិនានា ជាពិសេសត្រៀមខ្លួនឆ្ពោះទៅ SEA GAMES 2023 ដែលកម្ពុជានឹងធ្វើជាម្ចាស់ផ្ទះ៕
ចែករំលែកព័តមាននេះ