ខេត្តសៀមរាប ៖ ក្មេងប្រុសអាយុ១២ឆ្នាំម្នាក់បានលង់ទឹកស្លា.ប់ ខណៈបានចុះទៅងូតទឹកនៅក្រោមស្ពានតាហ៊ីង បង្កឱ្យមានការភ្ញាក់ផ្អើលដល់អ្នកធ្វើដំណើរតាមផ្លូវជាតិលេខ៦
ខេត្តសៀមរាប ៖ ក្មេងប្រុសអាយុ១២ឆ្នាំម្នាក់បានលង់ទឹកស្លាប់ ខណៈបានចុះទៅងូតទឹកនៅក្រោមស្ពានតាហ៊ីង បង្កឱ្យមានការភ្ញាក់ផ្អើលដល់អ្នកធ្វើដំណើរតាមផ្លូវជាតិលេខ៦ និងសមត្ថកិច្ច ចុះមកអន្តរាគមន៍ភ្លាមៗផងដែរ។ ហេតុការណ៍ភ្ញាក់ផ្អើលនេះធ្វើឡើងកាលពីវេលាម៉ោង០៩និង២០នាទីព្រឹក ថ្ងៃទី១៩ ខែតុលា ឆ្នាំ២០១៦ នៅចំណុចស្ពានតាហ៊ីង ទឹកដីភូមិពួកថ្មី ឃុំពួក ស្រុកពួក ខេត្តសៀមរាប។ លោកវរេសនីយ៍ត្រី ទេព ពុំសែន អធិការស្រុកពួកបានប្រាប់កោះសន្តិភាពនៅរសៀលថ្ងៃទី១៩ ខែតុលា ឆ្នាំ២០១៦ថា បន្ទាប់ពីមានសេចក្តីរាយការណ៍មកថា មានករណីមនុស្សលង់ទឹកស្លាប់ នៅក្រោមស្ពានតាហ៊ីង តាមបណ្តោយផ្លូវជាតិលេខ៦ ទើបលោកបានឱ្យកម្លាំងជំនាញ ចុះទៅដល់កន្លែងកើតហេតុភា្លមៗផងដែរ។
លោកបានបន្ថែមទៀតថា សពជនរងគ្រោះមានឈ្មោះ គង់ ភក្ដី ហៅគល់ ភេទប្រុស អាយុ១២ឆ្នាំ មុខរបរសិស្ស រស់នៅភូមិឃុំ កើតហេតុខាងលើ។ មូលហេតុបណ្ដាលឲ្យលង់ទឹក ដោយសារងូតទឹកទាំងខោ អាវ ខូវប៊យ ទើបលិចទៅក្នុងទឹក ខណៈពេលនោះជនរងគ្រោះ ហែលមិនរួចក៏បានលង់ទឹកបាត់ លុះដល់១០នាទីក្រោយមក ទើបរកឃើញរួចនាំគ្នាយកមកលើ ដើម្បីលើកទម្លាក់ៗ ឱ្យវា ចេញទឹកពីក្នុងពោះ ប៉ុន្តែអកុសលក្មេងប្រុសនោះបានដាច់ខ្យល់ស្លាប់បាត់ទៅហើយ។
លោកបានបញ្ជាក់បន្ថែមទៀតថា ក្រោយពីក្មេងប្រុសនោះបានស្លាប់ លោកបានឱ្យសមត្ថកិច្ចស្រាវជ្រាវ រកក្រុមគ្រួសារដើម្បីប្រគល់ឱ្យ បានមួយសន្ទុះទើបក្រុមគ្រួសារបានមកដល់ រួច ប្រគល់សាកសពឱ្យក្រុមគ្រួសារយកទៅធ្វើបុណ្យតាមប្រពៃណី។ សូមបញ្ជាក់ផងដែរថា ក្នុងរយៈពេលមួយខែសោះ ក្នុងរដូវវស្សាធ្វើឱ្យមនុស្សស្លាប់ទាំងក្មេង ទាំងចាស់ ដោយសារលង់ទឹក ក្នុងខេត្តសៀមរាប មានការកើនឡើង ដូច្នេះសូមបងប្អូនប្រជាពលរដ្ឋត្រូវមានការប្រុងប្រយ័ត្ន កុំឱ្យកូនចៅ នាំគ្នាទៅងូតទឹក បឹងបួរ ឬនៅតាមស្ពានជាដើម៕
ចែករំលែកព័តមាននេះ