ខេត្តបាត់ដំបង ៖ អាជីវករលក់សាច់ជ្រូកម្នាក់ត្រូវចោរគាស់ទ្វារផ្ទះចូលលួចគ្រឿងអល័ង្ការ និងលុយកាក់អស់គ្មានសល់ កាលពីវេលាម៉ោង៥ព្រឹកថ្ងៃទី០៥ ឧសភា ស្ថិតនៅចំណុចភូមិគរ ឃុំស្នឹង ស្រុកបាណន់ ក្រោយពេលងើបដឹកប្រពន្ធទៅលក់សាច់ជ្រូកនៅ…
ខេត្តបាត់ដំបង ៖ អាជីវករលក់សាច់ជ្រូកម្នាក់ត្រូវចោរគាស់ទ្វារផ្ទះចូលលួចគ្រឿងអល័ង្ការ និងលុយកាក់អស់គ្មានសល់ កាលពីវេលាម៉ោង៥ព្រឹកថ្ងៃទី០៥ ឧសភា ស្ថិតនៅចំណុចភូមិគរ ឃុំស្នឹង ស្រុកបាណន់ ក្រោយពេលងើបដឹកប្រពន្ធទៅលក់សាច់ជ្រូកនៅ «ផ្សារស្នឹង» នៅសល់តែម្ដាយក្មេកចាំផ្ទះ។ ជនរងគ្រោះឈ្មោះ ចន ចំរើន ហៅ មៀម អាយុ៤៨ឆ្នាំ និងប្រពន្ធឈ្មោះ សាន សុខា អាយុ៤២ឆ្នាំ ជាអាជីវិករលក់សាច់ជ្រូកនៅ «ផ្សារស្នឹង»។
អ្នកស្រី សាន សុខា បាននិយាយប្រាប់កោះសន្តិភាពនៅព្រឹកកើតហេតុថា ជនមិនស្គាល់មុខ បានគាស់ទ្វារផ្ទះគាត់ចូលលួចគ្រឿងអល័ង្ការ និងប្រាក់មួយចំនួននៅវេលាទៀតភ្លឺ ។ ពោល គឺក្រោយពេលគាត់និងស្វាមីចេញ
ទៅផ្សារផុតបន្តិច ។ អ្នកស្រី សុខា បានបញ្ជាក់ថា ពេលគាត់និងស្វាមីចេញទៅផ្សារ គឺបន្សល់ទុកម្ដាយនៅចាំផ្ទះ ហើយម្ដាយគាត់បានទូរស័ព្ទប្រាប់គាត់ភ្លាមៗ បន្ទាប់ពីត្រូវចោរចូលលួចទ្រព្យសម្បត្តិ ព្រោះគាត់បានពើបប្រទះនឹងចោរនោះផ្ទាល់ពេលចូលធ្វើសកម្មភាពបានសម្រេចដើរចេញមកខាងមុខ។
ម្ដាយជនរងគ្រោះ គឺឈ្មោះ សុន គឹមអាន វ័យ៦៧ឆ្នាំ បានរៀបរាប់ថា ពេលកូនស្រីនិងកូនប្រសារ ងើបដឹកគ្នាទៅលក់សាច់ជ្រូកនៅផ្សារស្នឹង នៅវេលាម៉ោងជាង៤ទៀបភ្លឺ គឺគាត់នៅម្នាក់ឯង ។ ប៉ុន្តែពេលនោះគាត់បានបើកទ្វារខាងក្រោយចេញទៅក្រៅ ហើយទ្វារផ្ទះខាងមុខនៅចាក់សោរនៅឡើយ រីឯទ្វាររបងខាងមុខក៏ចាក់សោរវិញ
ភ្លាមៗដែរ បន្ទាប់ពីកូនៗចេញទៅផ្សារ ។ គាត់និយាយថា ពេលនោះ គាត់បានឮសម្លេងបើកទ្វារផ្ទះខាងមុខ ហើយគាត់ក៏ដើរមកមើល ស្រាប់តែឃើញជនម្នាក់ដើរចេញមកវ៉ាក់អឺទល់មុខគ្នានឹងគាត់នៅមាត់ទ្វារ ។ ស្ថិតក្នុងស្ថានភាពប្រថុចញ៉ុចបែបនេះ គាត់បានសួរជននោះថា អ្នកណា ? ចូលផ្ទះខ្ញុំធ្វើអី ? តើចូលយកអ្វី ? ហើយជននោះបានឆ្លើយតបមកគាត់វិញ តែប៉ុន្មានម៉ាត់ប៉ុន្មានម៉ាត់ថា «មិនបានយកអ្វីទេ» ហើយក៏ដើរសំដៅទៅមុខផ្លោះរបងចេញទៅផ្លូវជាតិបាត់ស្រមោលភ្លាមៗដែរ ។
គាត់បានបញ្ជាក់ថា ពេលនោះ គាត់បានស្ទុះទៅមើលក្នុងបន្ទប់ដេក ស្រាប់តែឃើញក្រដាសស្នាមរាយប៉ាយ និង បាត់បង់ទ្រព្យសម្បត្តិអស់ពីក្នុងថតតុ ទើបគាត់ទូរស័ព្ទហៅកូនឲ្យត្រឡប់មកផ្ទះវិញ។ ប៉ុន្តែគាត់មិនបានដឹងថា ចោរនោះម្នាក់គ្មានប៉ុន្មាននាក់ ជិះអ្វីមកទេ ព្រោះពេលចោរដើរទៅផ្លោះរបងចេញក្រៅ គាត់ប្រញ៉ាប់រកទូរស័ព្ទខលហៅកូន ។ ចោរម្នាក់នោះរាងស្គមដើរស្ទើររលំ បាក់អាវខ្មៅដៃវែង និងពាក់មួកក្រណាត់ដែលមានស្បៃគ្របលើស្មារ តែមិនរុំមុខទេ។ គាត់សង្ស័យចោរនោះស្គាល់គាត់ផងក៏មិនដឹង តែបើតាមពិនិត្យលើភិនភាគ ចោរម្នាក់នេះ ទំនងមិនមែនមកពីឆ្ងាយទេ ។
ពាក់ព័ន្ធនឹងការបាត់បង់ទ្រព្យសម្បត្តិវិញ អ្នកស្រី សាន សុខា បានបញ្ជាក់ប្រាប់ថា ទ្រព្យសម្បត្តិដែលត្រូវចោរលួចមាន ខ្សែកមាស០១ខ្សែ ទម្ងន់០១តំលឹង, ខ្សែដៃមាស០១ខ្សែទម្ងន់០១តំលឹង, ចិញ្ចៀនមាស០១វង់ទម្ងន់០៥ជី, ប្រាក់ចំនួន៥លាន៣០ម៉ឺនរៀល និងប្រាក់ដុល្លារចំនួន១,០៥០ដុល្លារទៀត។ មន្រ្តីនគរបាលប៉ុស្តិ៍រដ្ឋបាលស្នឹង បានចុះទៅកាន់កន្លែងកើតហេតុភ្លាមៗ ក្រោយទទូលដំណឹងនេះ ដើម្បីពិនិត្យ និង សួរនាំជនរងគ្រោះ ។ ប៉ុន្តែគ្មានតម្រុយពីមុខសញ្ញាជនសង្ស័យទេ ហើយក៏មិនទាន់វាយតម្លៃស្ថានភាពនេះបែបណាដែរ បានត្រឹមសួរនាំជនរងគ្រោះ និងតាមដានគន្លងចេញនិងចូលរបស់ជនសង្ស័យ ។
សូមបញ្ជាក់ថា រយៈពេលមួយឆ្នាំចុងក្រោយនេះ នៅក្នុងអាណាចក្រ ឃុំស្នឹង សកម្មភាពចោរលួច ចោរគាស់ផ្ទះ និងចោរកាច់សោលួចយកម៉ូតូរបស់ប្រជាពលរដ្ឋ ហាក់មានសន្ទុះខ្លាំងក្លាណាស់ ខណៈសមត្ថកិច្ចគ្មានសមត្ថភាពក្នុងការទប់ស្កាត់ ឬធ្វើការស្រាវជ្រាវ ដើម្បីវែកមុខជនសង្ស័យ។ ជាក់ស្ដែង កាលពីថ្ងៃទី១៥ មីនា ប្រមាណជាង១ខែកន្លងទៅនេះ ចោរដែលគេមិនស្គាល់មុខ បានធ្វើសកម្មភាពទាំងព្រឹក គាស់ទ្វារផ្ទះគ្រូពេទ្យម្នាក់ឈ្មោះ ម៉េង គឹមហួយ អាយុ៣៤ឆ្នាំ ដែលទើបសាងសង់រួច នៅក្នុងភូមិសំរោង ឃុំស្នឹង ស្រុកបាណន់ ដែលមានចម្ងាយប្រហែល៣០០ម៉ែត្រពីផ្ទះជនរងគ្រោះខាងលើ រួចចូលលួចលុយកាត់ និងគ្រឿងអល័ង្ការអស់គ្មានសល់ ខណៈម្ចាស់ផ្ទះចេញផុត។
បើតាមរបាយការណ៍សមត្ថកិច្ច លោកគ្រូពេទ្យ ម៉េង គឹមហួយ ត្រូវលោកចោរលួចអស់ទ្រព្យក្រាសក្រែល ក្នុងនោះ មានប្រាក់ខ្មែរចំនួន៤,៥លានរៀល, ប្រាក់ថៃចំនួន២៥,០០០បាត, ប្រាក់ដុល្លាចំនួន៣៥០ដុល្លា, ខ្សែកប្លាទីនចំនួន០៤ខ្សែគិតជាប្រាក់ចំនួន៦,០០០ដុល្លា, ខ្សែកមាស១ខ្សែគិតជាប្រាក់ចំនួន២,៦៥០ដុល្លា រួមទាំងឯសារមួយចំនួនទៀត។
ជុំវិញអំពើចោរកម្មដ៏កក្រើកនេះ គេឃើញមន្រ្តីនគរបាលទាំងកម្លាំងស្នងការខេត្ត ទាំងកម្លាំងអធិការស្រុកបាណន់ និងមន្រ្តីមូលដ្ឋានផង បាននាំគ្នាចុះព្រោងព្រាត ធ្វើការស្រាវជ្រាវរកមុខសញ្ញាជនសង្ស័យ ។ ប៉ុន្តែផ្ទុយទៅវិញ រហូតមកដល់ពេលនេះ លោកចោរដែលធ្វើសកម្មភាពគាស់ទំលុះទំលាយលំនៅឋានពលរដ្ឋ ដែលមានភិនភាគដដែលៗ នៅតែបន្តប្រព្រឹត្តបទល្មើសដដែលៗទៀត។
រីឯសមត្ថកិច្ចហាក់គ្មានលទ្ធភាពស្វែងរកតម្រុយនៃមុខសញ្ញាជនសង្ស័យឃើញឡើយ សូម្បីប៉ុនក្រចក។ ប្រជាពលរដ្ឋបាននិងកំពុងព្រួយបារម្ភខ្លាំងបំផុត ពីមួយថ្ងៃទៅមួយថ្ងៃអំពីបញ្ហាសន្តិសុខនៅក្នុងមូលដ្ឋាន ដោយសារតែសកម្មភាពនៃអំពើចោរកម្មដែលកើតឡើងនៅទឹកដីអាណាចក្រ ឃុំស្នឹង គ្មានសញ្ញាថមថយ។ ផ្ទុយទៅវិញបង្កើនស្ទុះកាន់តែខ្លាំងឡើងៗ ខណៈសមត្ថកិច្ចហាក់គ្មានលទ្ធភាពទប់ស្កាត់ ឬបង្ក្រាប ៕
ចែករំលែកព័តមាននេះ