ខេត្តបន្ទាយមានជ័យ៖ ក្នុង ១ថ្ងៃ ប្រជាពលរដ្ឋខ្មែរ ដែលចេញទៅប្រទេសថៃ មានប្រមាណជាង ១០០នាក់ និងប្រជាពលរដ្ឋខ្មែរ ដែលចូលមកកម្ពុជាវិញ មាន ១ថ្ងៃ ជាង ២.០០នាក់។ ចំណែកជនជាតិថៃ ចូលមកកម្ពុជាវិញ មានប្រមាណជាង ៥០នាក់ ក្នុង ១ថ្ងៃ​។ នេះបើតាមនគរបាលអន្តោប្រវេសន៍ ប្រចាំច្រកព្រំដែន​អន្តរជាតិ ប៉ោយប៉ែត។

​លោក ជួន សារី នាយរងប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត បានឱ្យដឹងថា ក្រោយបើក​ច្រកទ្វារអន្តរជាតិប៉ោយប៉ែត អោយប្រជាពលរដ្ឋចេញ.ចូល រយៈពេល ៣ថ្ងៃ គិតត្រឹមថ្ងៃទី៣ឧសភា មានអ្នកធ្វើដំណើរចេញចូល ឆ្លងព្រំដែន​ប្រមាណជាង ១.០០០នាក់  ភាគច្រើន ជាអាជីវករលក់នៅផ្សាររ៉ូងក្លឿ ប្រទេសថៃ​។

លោក ជួន សារី បានបន្ថែមថា ​ការបើកច្រកទ្វារអន្តរជាតិប៉ោយប៉ែត អោយប្រជាពលរដ្ឋចេញ.ចូល ចាប់ពីថ្ងៃទី០១ ដល់ថ្ងៃទី៣ ខែឧសភា ឆ្នាំ២០២២នេះ គឺក្នុង ១ថ្ងៃ មានប្រជាពលរដ្ឋខ្មែរ ដែលចេញទៅប្រទេសថៃ ប្រមាណជាង ១០០នាក់ និងប្រជាពលរដ្ឋខ្មែរ ដែលចូលមកកម្ពុជាវិញ មាន ១ថ្ងៃ ជាង ២.០០នាក់។ ក្នុងនោះ ក៏មានជនជាតិថៃ ចូលមកកម្ពុជា មានប្រមាណជាង ៥០នាក់ ក្នុង ១ថ្ងៃផងដែរ​។

លោក ជួន សារី បានបញ្ជាក់ថា សម្រាប់ប្រជាពលរដ្ឋខ្មែរ ដែលចូលទៅប្រទេសថៃ​ប្រើប្រាស់ប័ណ្ណ​ព្រំដែន (BORDER PASS) កាលពីមុនព្រឹត្តិការណ៍កូវីដ.១៩ គឺទៅប្រទេសថៃ អាច​ស្នាក់នៅបានរយៈពេល ៦យប់ ៧ថ្ងៃ តែពេលនេះ ភាគីថៃតម្រូវអោយស្នាក់នៅ រយៈពេលតែ ២យប់ ៣ថ្ងៃ ត្រូវត្រឡប់មក​វិញ។ រហូតពេលនេះ អ្នកដែលប្រើប្រាស់ប៉ាស្ព័រ (PASS PORT) មិនមានចេញ.ចូលទៅប្រទេសថៃ នៅឡើយទេ ព្រោះ​ភាគីថៃ បានតម្រូវឱ្យ​ទិញលិខិត (THAILAND PASS) និងទិញកញ្ចប់ធានារ៉ាប់រង ចំនួន ១០.០០០ដុល្លារ ក្នុងតំលៃ ៥០ដុល្លារ ទិញកញ្ចប់ធានារ៉ាប់រងចំនួន ២០.០០០ដុល្លារ តំលៃ ៧០ដុល្លារដ ដែលជាវិធានការសុខាភិបាល ទប់ស្កាត់​កូវីដ១៩។ កញ្ចប់ធានារ៉ាប់រងទាំងនោះ ត្រូវទិញ​រយៈពេល ៤៨ម៉ោង មុនឆ្លងដែនចូលទឹកដី និងមានសុពលភាព អាចប្រើប្រាស់បាន ១ខែ៕ ប៊ុន ធឿន