រថយន្តដឹកដី១គ្រឿងរបស់ក្រុមហ៊ុនចម្ការចេកអំបូងក្រហម ហ័ងអញ់់យ៉ាឡាយ បានបុកម៉ូតូបណ្តាលឱ្យស្លា.ប់ម្នាក់នៅកន្លែងកើតហេតុ និងអ្នករួមដំណើរម្នាក់ទៀតរងរបួសធ្ងន់ ហើយបានបើករត់បាត់ កាលពី
ខេត្តរតនគិរី ៖ រថយន្តដឹកដី១គ្រឿងរបស់ក្រុមហ៊ុនចម្ការចេកអំបូងក្រហម ហ័ងអញ់់យ៉ាឡាយ បានបុកម៉ូតូបណ្តាលឱ្យស្លា.ប់ម្នាក់នៅកន្លែងកើតហេតុ និងអ្នករួមដំណើរម្នាក់ទៀតរងរបួសធ្ងន់ ហើយបានបើករត់បាត់ កាលពីវេលាម៉ោងប្រមាណ៩និង២៥នាទីព្រឹកថ្ងៃទី១ ខែឧសភា ឆ្នាំ២០២២ ។ គ្រោះថ្នាក់នេះ កើតមាននៅលើកំណាត់ផ្លូវជាតិលេខ៧៦ មុខតូបជាងម៉ូតូឈ្មោះ ម៉ាន ចន្លោះបង្គោលគីឡូម៉ែត្រលេខ២៧១-២៧២ ស្ថិតក្នុងភូមិដីឡូត៍ ឃុំជ័យឧត្តម ស្រុកលំផាត់ ។
តាមប្រភពព័ត៌មានឱ្យដឹងថា រថយន្តដឹកដីដែលបុកម៉ូតូនេះ គេសង្ស័យថាមានថៅកែរួមដំណើរជាមួយផងដែរ ទើបបញ្ជាឱ្យអ្នកបើកបរបន្ថែមល្បឿនរត់គេចខ្លួនដោយមិនចង់ទទួលខុសត្រូវ ។ ប៉ុន្តែ ទោះបីរថយន្តខំបើករត់គេចយ៉ាណាក្តី ក៏ត្រូវកម្លាំងនគរបាលស្រុកលំផាត់ តាមចាប់បានដែរ ហើយនាំទាំងរថយន្តនិងអ្នកបើកបរមកអធិការដ្ឋាននគរបាលស្រុក ដើម្បីដោះស្រាយតាមច្បាប់ ។
ប្រភពព័ត៌មានឲ្យដឹងទៀតថា រថយន្តដឹកដីម៉ាកស្កែននៀ ពណ៌ស ពាក់ផ្លាកលេខ ត្បូងឃ្មុំ ៣A-៣២៧៦ បើកបរពីខាងជើងទៅខាងត្បូងក្នុងល្បឿនលឿន ។ លុះទៅដល់ចំណុចខាងលើ ដោយមានរថយន្តកាមរីមួយគ្រឿងចតនៅពីមុខ ក៏ងាកក្បាលជ្រុលឆ្លងគំនូសពុះចែកទ្រូងផ្លូវ បណ្តាលឲ្យបុកម៉ូតូកំពុងធ្វើដំណើរបញ្ច្រាសទិសគ្នាពេញទំហឹងតែម្តង ។
កម្លាំងនគរបាលស្រុកលំផាត់ ដឹកនាំដោយវរសេនីយ៍ឯក ក្លុល ថើង និងមានការសម្របសម្រួលពីលោក លាង អ៊ូ ព្រះរាជអាជ្ញារងនៃអយ្យការអសាលាដំបូងខេត្តផងនោះ បានតាមប្រមាញ់និងស្រាវជ្រាវលើចម្ងាយផ្លូវពីកន្លែងកើតហេតុជាងដប់គីឡូម៉ែត្រ ក៏ប្រទះឃើញរថយន្តចតលាក់ទុកនៅក្នុងដែនជម្រកសត្វព្រៃបរិវេណដីក្រុមហ៊ុនជីកយកថ្មម៉ាប ទើបធ្វើការរឹបអូសយកមកក្សាទុក ។
ទាំងអ្នកបើកបរ និងថៅកែដែលរួមដំណើរត្រូវបានឃាត់ខ្លួននាំមកអធិការដ្ឋាននគរបាលស្រុកលំផាត់ ដើម្បីសាកសួរ ។ អ្នកបើកបរឈ្មោះ ថុល លីណេត ភេទប្រុស អាយុ២៤ឆ្នាំ ជាអ្នកបើកបររថយន្តដឹកដីឱ្យក្រុមហ៊ុនចម្ការចេកមានស្រុកកំណើតនៅភូមិរមូល ឃុំរអាង ស្រុកកំពង់សៀម ខេត្តកំពង់ចាម ។ ចំណែកអ្នករួមដំណើរឈ្មោះ ខុម សុឃា ភេទប្រុស អាយុ៣១ឆ្នាំ ជាថៅកែរថយន្តដឹកដីឱ្យក្រុមហ៊ុនចម្ការចេក និងមានស្រុកកំណើតនៅភូមិ៥៥ ឃុំក្រែក ស្រុកពញាក្រែក ខេត្តត្បូងឃ្មុំ ។
រីឯអ្នកជិះម៉ូតូដែលរងគ្រោះ អ្នកដែលស្លា.ប់ឈ្មោះ ធៀង មៀង ភេទប្រុស អាយុ២៥ឆ្នាំ ជនជាតិឡាវសញ្ជាតិខ្មែរ ជាកសិករ មានទីលំនៅក្នុងភូមិស្រែឈូក ឃុំជ័យឧត្តម ស្រុកលំផាត់ ជាអ្នកបើកបរម៉ូតូ បានបាក់ភ្លៅឆ្វេងបាក់.កដៃឆ្វេង ខ្ទេចក្បាល និងផ្ទៃមុខ ។ ចំណែកអ្នករួមដំណើរដែលរបួសធ្ងន់ឈ្មោះ ដុំ ឆវី ភេទប្រុស អាយុ១៩ឆ្នាំ ជនជាតិឡាវសញ្ជាតិខ្មែរ ជារបរកសិករ មានទីលំនៅក្នុងភូមិ-ឃុំជាមួយគ្នា បាក់ភ្លៅខាងឆ្វេងបាក់ដើមដៃឆ្វេង ឈាមហូរតាមត្រចៀក និងតាមច្រមុះ ។
រីឯម៉ូតូជនរងគ្រោះម៉ាកហុងដាវ៉េវអាល់ហ្វា ដែលពលរដ្ឋតំបន់នោះហៅថា ម៉ូតូឆ្លាម អត់មានផ្លាកលេខ បានខូចខាតទាំងស្រុង រួមទាំងរថយន្ត ត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកលំផាត់ ដើម្បីធ្វើការដោះស្រាយតាមផ្លូវច្បាប់ ៕
ចែករំលែកព័តមាននេះ