រាជធានីភ្នំពេញ ៖ សម្តេចព្រះមហាក្សត្រិយ នរោត្តមមុនិនាថ សីហនុ ព្រះវររាជមាតាជាតិខ្មែរ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានឧបត្ថម្ភថវិកាជូនមន្ទីរពេទ្យកុមារអង្គរនៅក្នុងខេត្តសៀមរាប តាមរយៈពិធីបុណ្យបេតិកភណ្ឌ ដើម្បីជួយដល់កុមារកម្ពុជា ដែលកំពុងសម្រាកព្យាបាលនៅក្នុងមន្ទីរពេទ្យមួយនេះ។ ការឧបត្ថម្ភថវិកានេះ បានធ្វើឡើងនាល្ងាចថ្ងៃទី១៤ ខែតុលា ឆ្នាំ២០១៦ តាមរយៈការអញ្ជើញចូលរួមពិធី «បុណ្យបេតិកភណ្ឌ» នៅសាលមហោស្រពចតុមុខ។
ពិធីបុណ្យបេតិកភណ្ឌ ត្រូវបានរៀបចំឡើងមានរយៈពេល៣ថ្ងៃ ចាប់ពីថ្ងៃទី១៤ ដល់ទី១៦ ខែតុលា ឆ្នាំ២០១៦។ ពិធីបុណ្យនេះរៀបចំដោយ «សមាគមមរតកហ្វូណន»ក្នុងគោលបំណងរំឭកខួប១៣ឆ្នាំ នៃការដាក់បញ្ចូលរបាំព្រះរាជ្យទ្រព្យ ចូលជាសម្បត្តិបេតិកភណ្ឌពិភពលោក និងខួប១១ឆ្នាំ នៃការដាក់បញ្ចូលល្ខោនស្បែកធំ ចូលជាសម្បត្តិបេតិកភណ្ឌពិភពលោក ព្រមទាំងជួយជម្រុញឲ្យយុវជនខ្មែរ ជំនាន់ក្រោយ ជួយអភិរក្ស និងអភិវឌ្ឍន៍វប្បធម៌ អរិយធម៌ខ្មែរឲ្យមានភាពរីកចម្រើនតទៅមុខ និងស្វែងរកមូលនិធិ ដើម្បីជួយដល់មន្ទីរពេទ្យកុមារអង្គរ នៅខេត្តសៀមរាប។
ពិធីបុណ្យធ្វើឡើងក្រោមអធិបតីភាពឧបនាយករដ្ឋមន្ត្រី យឹម ឆៃលី និងរដ្ឋមន្ត្រីមកពីបណ្តាក្រសួងពាក់ព័ន្ធមួយចំនួនទៀត ។ ថវិកាឧបត្ថម្ភធ្វើតាមរយៈលោកជំទាវ តាន់ ម៉េងហួយ ព្រះរាជលេខាផ្ទាល់ តំណាងដ៏ខ្ពង់ខ្ពស់សម្តេចព្រះមហាក្សត្រិយ ព្រះវរមាតាជាតិខ្មែរ នរោត្តមមុនិនាថសីហនុ សម្តេចម៉ែ សម្តេចយាយ សម្តេចយាយទួត ជាទីគោរពសក្ការៈដ៏ខ្ពង់ខ្ពស់បំផុត ចំនួន ១.០០០ដុល្លារ ។ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា តំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ចំនួន១០លានរៀល ព្រមទាំងឯកឧត្តម យឹម ឆៃលី ឧបនាយករដ្ឋមន្ត្រីចំនួន ៣លានរៀល។
ជាមួយគ្នានោះលោកស្រី អ៊ឹង សុផា ប្រធានសមាគមមរតកហ្វូណន បានសម្ដែងការដឹងគុណ និងថ្លែងអំណរព្រះគុណ និងសូមអរគុណយ៉ាងជ្រាលជ្រៅចំពោះ សម្តេចព្រះមហាក្សត្រិយ ព្រះវរមាតាជាតិខ្មែរ នរោត្តម មុនិនាថសីហនុ សម្តេចម៉ែ សម្តេចយាយ សម្តេចយាយទួត សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងឯកឧត្តម យឹម ឆៃលី ឧបនាយករដ្ឋមន្ត្រី ដែលបានជួយឧបត្ថម្ភដល់មន្ទីរពេទ្យកុមារអង្គរ តាមរយៈពិធីបុណ្យបេតិកភណ្ឌ។ លោកស្រីបានគោរពថ្វាយព្រះពរ សម្តេចព្រះមហាក្សត្រិយ ព្រះវរមាតាជាតិខ្មែរ នរោត្តមមុនិនាថសីហនុ សម្តេចម៉ែ សម្តេចយាយ សម្តេចយាយទួត មានព្រះកាយពលមាំមួន ព្រះជន្មរយវស្សា និងសូមគោពរជូនពរសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងឯកឧត្តម យឹម ឆៃលី មានសុខភាពល្អ និងជួបប្រទះពុទ្ធពរទាំង៤ប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាត៕
ចែករំលែកព័តមាននេះ