មួយប៉ប្រិចភ្នែក ឆក់យកជីវិតក្មេង៣នាក់
ខេត្តសៀមរាប ៖ ក្មេងប្រុសម្នាក់បានទៅតាមក្រោយ តែមិនឃើញក្មេងប្រុសស្រី៣នាក់ដែលនាំគ្នាទៅលេងទឹកអាងនៅខាងលិចភូមិ ក៏រត់ទៅប្រាប់អាណាព្យាបាល …
ខេត្តសៀមរាប ៖ ក្មេងប្រុសម្នាក់បានទៅតាមក្រោយ តែមិនឃើញក្មេងប្រុសស្រី៣នាក់ដែលនាំគ្នាទៅលេងទឹកអាងនៅខាងលិចភូមិ ក៏រត់ទៅប្រាប់អាណាព្យាបាល និងនាំគ្នាទៅរកភ្លាមៗ តែអកុសលក្មេងទាំង៣នាក់បានលង់ទឹកស្លាប់បាត់ទៅហើយ ។
ហេតុការណ៍លង់ទឹកស្លាប់នេះបានកើតឡើងកាលពីវេលាម៉ោង១១ និង៣៥នាទី ថ្ងៃទី១៣ ខែតុលា ឆ្នាំ២០១៦ នៅចំណុចអាងទឹកមួយកន្លែងខាងកើតវត្តជ្រោយនាងងួន និងពីខាងលិចភូមិអំពៅដៀបចម្ងាយប្រហែល១៥០ម៉ែត្រ ស្ថិតក្នុងឃុំជ្រោយនាងងួន ស្រុកស្រីស្នំ ។
លោកវរសេនីយ៍ត្រី អ៊ុន ស្រស់ អធិការនគរបាលស្រុកស្រីស្នំ បានឱ្យដឹងថា ក្មេងទាំង៣នាក់បាននាំគ្នាទៅលេងទឹកនៅទីតាំងខាងលើ បន្ទាប់មកមានក្មេងប្រុសម្នាក់ទៀតបានដើរទៅក្រោយ ពេលទៅដល់កន្លែងកើតហេតុក៏មិនឃើញក្មេងទាំង៣នាក់នោះ ក៏បានរត់មកប្រាប់អាណាព្យាបាលក្មេងទាំងនោះ ហើយបាននាំគ្នាទៅរកភ្លាមៗដែរ តែអកុសលក្មេងទាំងនោះបានលង់ទឹកស្លាប់បាត់បង់ជីវិតទៅហើយ ។
លោកអធិការបញ្ជាក់បន្ថែមថា ក្មេងរងគ្រោះទាំង៣នាក់មាន ១-ឈ្មោះ ឆុន ស្រីកុត ភេទស្រី អាយុ៨ឆ្នាំ, ២-ឈ្មោះ ឆុន សៀងហៃ ភេទប្រុស អាយុ៦ឆ្នាំ ជាប្អូបប្រុសបង្កើតរបស់ឈ្មោះ ឆុន ស្រីកុត និង ៣-ឈ្មោះ ហួ លីហៀង ភេទប្រុស អាយុ៥ឆ្នាំ ។សព្វថ្ងៃក្មេងប្រុសស្រីទាំង៣នាក់ មានទីលំនៅក្នុងភូមិជ្រោយនាងងួន ឃុំជ្រោយនាងងួន ស្រុកស្រីស្នំ ខេត្តសៀមរាប ។
ក្រោយពីបានធ្វើការពិនិត្យ និងធ្វើកំណត់ហេតុរួចរាល់មក សមត្ថកិច្ចនគរបាលស្រុកស្រីស្នំបានប្រគល់សពក្មេងប្រុសស្រីទាំង៣នាក់ជួនក្រុមគ្រួសារចាត់ចែងរៀបចំធ្វើបុណ្យតាមប្រពៃណី ។
គួរបញ្ជាក់ផងដែរថា ក្នុងនាមកងកម្លាំងនគរបាលចំណុះឱ្យស្នងការដ្ឋាននគរបាលខេត្តសៀមរាប សូមសំណូមពរដល់អាណាព្យាបាល មាតាបិតា ក្មេងប្រុសស្រីទាំងអស់ ត្រូវបង្កើនការយកចិត្តទុកដាក់ចំពោះកូនចៅគ្រប់ពេលវេលា ដោយសាររដូវនេះជារដូវវស្សា ដែលមានទឹកជំនន់ជន់លិចដែលធ្វើឱ្យក្មេងៗនាំគ្នាទៅលេងទឹក ទើបបណ្ដាលឱ្យលង់ស្លាប់ដូចករណីខាងលើនេះ ៕
ចែករំលែកព័តមាននេះ