រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី២៣ ខែមករា ឆ្នាំ២០២៦ បានចេញដីកាបង្គាប់ឲ្យឃុំខ្លួនជនជាតិចិន២ នាក់ និងនេប៉ាល់២នាក់ ដោយជាប់ពាក់ពន្ធពីបទ.ចាប់ឃុំឃាំង…
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី២៣ ខែមករា ឆ្នាំ២០២៦ បានចេញដីកាបង្គាប់ឲ្យឃុំខ្លួនជនជាតិចិន២ នាក់ និងនេប៉ាល់២នាក់ ដោយជាប់ពាក់ពន្ធពីបទ.ចាប់ឃុំឃាំង ឬបង្ខាំងមនុស្សដោយខុសច្បាប់ និងអំពើលក់ដូរមនុស្ស ដាក់ពន្ធនាគារជាបណ្តោះអាសន្ន ។
ដីកាបង្គាប់ឲ្យឃុំខ្លួនទៅលើជនសង្ស័យទាំង៤ នាក់មាន ៖
១.ឈ្មោះ SHRERTHA SOMLAL ភេទប្រុស អាយុ៣៩ ឆ្នាំ ជនជាតិនេប៉ាល់ មុខរបរ អ្នកបើកបរថយន្ត
២.ឈ្មោះ SOMAN POUDEL ភេទប្រុស អាយុ៣៥ ឆ្នាំ ជនជាតិនេប៉ាល់ មុខរបរ អ្នកបើកបររថយន្ត
៣.ឈ្មោះ ZHAN TAO ភេទប្រុស អាយុ២៩ ឆ្នាំ ជនជាតិចិន
៤.ឈ្មោះ ZHANG BIN អាយុ៣៧ ឆ្នាំ ជនជាតិចិន ។
ជនសង្ស័យទាំង៤ ដោយដាក់ឲ្យស្ថិតនៅក្រោមការពិនិត្យពីបទ.ចាប់ឃុំឃាំង ឬបង្ខាំងមនុស្សដោយខុសច្បាប់ និងអំពើលក់ដូរមនុស្ស ប្រព្រឹត្តនៅចំណុចមុខអគាររីវើរ៉ា ផ្លូវបេតុង ភូមិ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ និងនៅចំណុចអគារអនឡាញម្តុំតារាសាគរ ស្រុកគិរីសាគរ ខេត្តកោះកុង កាលពីថ្ងៃទី០៤ និងថ្ងៃទី០៨ ខែមករា ឆ្នាំ២០២៦ បទល្មើសព្រហ្មទណ្ឌ ដែលមានបញ្ញត្តិឲ្យផ្តន្ទាទោសតាមមាត្រា២៥៣ ចំណុច២ នៃក្រមព្រហ្មទណ្ឌ និងមាត្រា១៤ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ។ យោងតាមមាត្រា២៥៣ ចំណុច២ នៃក្រមព្រហ្មទណ្ឌ បទ ចាប់ ឃុំឃាំង និងបង្ខាំងមនុស្សដោយខុសច្បាប់ ត្រូវផ្តន្ទាទោសដាក់ពន្ធនាគារលើជនជាប់ចោទពី៣ ឆ្នាំ ដល់៥ ឆ្នាំ ។ ចំណែកមាត្រា១៤ អំពើលក់ ដូរមនុស្ស ជនណាដែលលក់.ដូរជនដទៃ ត្រូវផ្តន្ទាទោសដាក់ពន្ធនាគារ ពី២ ឆ្នាំ ដល់៥ ឆ្នាំ ។
សូមជម្រាបថា ជនជាតិចិន២នាក់ និងនេប៉ាល់២នាក់ ខាងលើ ត្រូវបានកម្លាំងសមត្តកិច្ចការិយាល័យយនគរបាលព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួន និងបញ្ជូនទៅតុលាការ ដើម្បីធ្វើការសាកសួរនិងឃុំខ្លួនដាក់ពន្ធនាគារជាបណ្តោះអាសន្ន។ កាលពីវេលាម៉ោង១០ និង៣០នាទីថ្ងៃទី១៦ ខែមករា ឆ្នាំ២០២៦ ដោយមានការអនុវត្តតាមបញ្ជាដឹកនាំពីលោកឧត្តមសេនីយ៍ឯក ជួន ណារិន្ទ អគ្គស្នងការរង ជាស្នងការនគរបាលរាជធានីភ្នំពេញ និងលោកឧត្តមសេនីយ៍ត្រី ប៊ុន សត្យា ស្នងការរងទទួលផែននគរបាលព្រហ្មទណ្ឌ ដឹកនាំផ្ទាល់ដោយលោកវរសេនីឯក ម៉ម សាវន នាយការិយាល័យនគរបាលព្រហ្ម ទណ្ឌកំរិតស្រាល បានចុះសហការជាមួយអធិការដ្ឋាននគរបាល ខណ្ឌចំការមន ធ្វើការស្រាវជ្រាវ និងឃាត់ខ្លួនជនសង្ស័យ៤ នាក់ ពាក់ពន្ធករណីចាប់ឃុំឃាំង និងបង្ខាំងមនុស្សដោយខុសច្បាប់ និងជួញដូរមនុស្សដោយខុសច្បាប់ (ចាប់ជនរងគ្រោះដាក់ចូលក្នុងរថយន្ត) នៅចំណុចក្នុងកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីវេលាម៉ោង០០និង៣០នាទី ឈានចូលថ្ងៃទី០៨ ខែមករា ឆ្នាំ២០២៦ ។
ក្រោយការឃាត់ខ្លួនជនសង្ស័យទាំង៤ នាក់ បានឆ្លើយសារភាពប្រហាក់ប្រហែលគ្នាថា ពួកគេពិតជាបានចាប់ជនរងគ្រោះឈ្មោះ ZHANG XIAOYANG ភេទប្រុស អាយុ៣៦ ឆ្នាំ ជាជនជាតិចិន ញាត់ចូលក្នុងរថយន្ត ដឹកយកទៅឃុំឃាំងទុកនៅតំបន់អភិវឌ្ឈន៍ពិសេស តារាសាគរ អគារសៀងហៃ ស្ថិតក្នុងស្រុក គីរីសាគរ ខេត្តកោះកុង ក្នុងគោលបំណងជម្រិតទារប្រាក់ ប្រាកដមែន ។
បន្ទាប់ពីមានចម្លើយរបស់ជនសង្ស័យសមត្ថកិច្ចបានចុះទៅសហការ រំដោះជនរងគ្រោះដោយជោគជ័យ។ សមត្ថកិច្ចក៏បានកសាងសំណុំរឿងបញ្ជូនជនសង្យ័យទាំង៤ នាក់ ទៅសាលាដំបូងរាជធានីភ្នំពេញ តាមនីតិវិធី ៕
ចែករំលែកព័តមាននេះ