រាជធានីភ្នំពេញ ៖ ការវិវត្តមិនប្រក្រតីនៃបេះដូងពីកំណើត (Malformation cardiaque congénitale) បានកើតមាន៣០% ក្នុងចំណោមជំងឺបេះដូងពីកំណើតទាំងអស់ ។ ក្នុងករណីបេះដូងធម្មតា (coeur normal)
រាជធានីភ្នំពេញ ៖ ការវិវត្តមិនប្រក្រតីនៃបេះដូងពីកំណើត (Malformation cardiaque congénitale) បានកើតមាន៣០% ក្នុងចំណោមជំងឺបេះដូងពីកំណើតទាំងអស់ ។ ក្នុងករណីបេះដូងធម្មតា (coeur normal) ថតខាងក្រោមទាំងពីរនៃបេះដូង ត្រូវបានខណ្ឌចែកដោយសន្ទះមួយ(Septum inter ventriculaire)។ ដកស្រង់ប្រសាសន៍ លោកវេជ្ជបណ្ឌិត សេង វណ្ណៈ ជំនាញផ្នែកជំងឺបេះដូងនៃមន្ទីរពេទ្យកាល់ម៉ែតដែលបានធ្វើការកត់សម្គាល់ថា ក្នុងករណីជំងឺប្រហោងបេះដូងថតខាងក្រោម គឺមានវត្តមានប្រហោងនៅលើសន្ទះដែលខណ្ឌចែកថតខាងក្រោមទាំងពីរនោះ ។
១-មូលហេតុ (Etiologie)៖ មានកត្តាមួយចំនួនដែលជាមូលហេតុដូចជា ៖ ភាពមិនប្រក្រតីនៃហ្សែន (gène): microdélétion -ភាពមិនប្រក្រតីនៃក្រូម៉ូសូម (Chromsome): Trisomie 21 -ការញ៉ាំស្រាកំឡុងពេលមានផ្ទៃពោះ (Syndrome alcoolofoetal)
២-រោគសញ្ញា (signes cliniques) ៖ រោគសញ្ញាគឺអាស្រ័យទៅលើទំហំប្រហោងថតបេះដូចជាៈ -ពេលខ្លះកុមាររស់នៅក្នុងស្ថានភាពគ្មានរោគសញ្ញាអ្វីទាំងអស់ (CIV de Roger) ក្រៅពីឮសំឡេងមិនធម្មតា ពេលស្តាប់បេះដូង (Souffle systolique en rayons de roue)។ -ពេលខ្លះទៀតមានរោគសញ្ញាដូចជា បែកញើសលើថ្ងាស ដកដង្ហើមញាប់ (Polypnée) ឬហត់ដង្ហក់ (Dyspnée) រលាកសួតញឹកញាប់ (Infection respiratoire à répétition) ដើមទ្រូងឡើងប៉ោង (Déformation thoracique) ការលូតលាស់នៃរាងកាយយឺតយ៉ាវ (Retard de croissance) សភាពស្បែកឡើងស្វាយ (Cyanose): ជាសញ្ញាមួយបញ្ជាក់ថា ការមកទទួលធ្វើរោគវិនិច្ឆ័យឺតយ៉ាវ (CIV dépassée) មានន័យថា ហួសពេលធ្វើការវះកាត់បេះដូងហើយ (Syndrome d’eisenmenger) ។
៣-ការធ្វើរោគវិនិច្ឆ័យ (Diagnostique)៖ យើងអាចធ្វើរោគវិនិច្ឆ័យបានយ៉ាងងាយស្រួលតាមរយៈអេកូសាស្ត្របេះដូង (Echocardiographie): ធ្វើឡើងនៅអំឡុងពេលម្តាយមានផ្ទៃពោះ (Anténatal) ចាប់ពី៤ខែឡើងទៅ ។ ក្រោយពេលសម្រាល (Post natal) ។ -អេកូបេះដូងក៏ជាមធ្យោបាយមួយក្នុងការវាយតម្លៃអំពីប្រហោងបេះដូងថា ត្រូវធ្វើការវះកាត់ ឬមិនចាំបាច់។ ម្យ៉ាងទៀតអេកូបេះដូងអាចកំណត់កាលវេលាក្នុងការធ្វើការវះកាត់ ។
៤-ការព្យាបាល៖ វិធីព្យាបាលជំងឺប្រហោងថតក្រោមនៃបេះដូង រំពឹងទាំងស្រុងទៅលើការវិភាគពេលធ្វើអេកូបេះដូង និងពេលខ្លះតម្រូវធ្វើរហូតទៅដល់«ការវាស់សម្ពាធឈាមនៅសរសៃឈាមសួត (Cathétérisme cardiaque)» ។ ការព្យាបាល គឺអាស្រ័យទៅលើលក្ខណៈសណ្ឋាន ឬស្ថានភាពនៃប្រហោងបេះដូងនីមួយៗ: ប្រហោងបេះដូងខ្លះមិនតម្រូវឱ្យមានការព្យាបាលដោយថ្នាំ ឬដោយការវះកាត់ទេ (CIV de Roger) ពោលគឺគ្រាន់តែមកតាមដានជាមួយគ្រូពេទ្យឱ្យបានជាប់លាប់។
-ការព្យាបាលដោយថ្នាំជាមធ្យោបាយមួយគ្រាន់តែជួយបន្ធូរបន្ថយរោគសញ្ញាប៉ុណ្ណោះ។
-ប្រហោងបេះដូងខ្លះតម្រូវឱ្យធ្វើការវះកាត់បិទប្រហោងនោះទើបបានជាសះស្បើយ។ -ប្រហោងបេះដូងមួយចំនួនតូច អាចធ្វើការព្យាបាលដោយគ្រាន់តែប្រើឆ្នុក (Prothèse) ដោយមិនចាំបាច់ធ្វើការវះកាត់បើកទ្រូងឡើយ។ -ប្រហោងបេះដូងមួយចំនួនទៀតគឺមិនអាចធ្វើការវះកាត់បានឡើយ ពោលគឺហួសពេលក្នុងការធ្វើការវះកាត់ (Syndrome d’Eisenmenger) ។
ចំណាំ៖ ប្រសិនបើមានរោគសញ្ញា ឬអាការដូចដែលបានជម្រាបខាងលើ សូមនាំកូនរបស់លោកអ្នកមកមន្ទីរពេទ្យកាល់ម៉ែត ដើម្បីទទួលការធ្វើរោគវិនិច្ឆ័យ និងព្យាបាលឱ្យបានទាន់ពេលវេលា ជៀសវាងយឺតពេលដែលនាំឲ្យអ្នកជំងឺរស់ក្នុងស្ថានភាពលំបាកមួយជីវិត ៕
ចែករំលែកព័តមាននេះ