ប៉ូលិសចាប់យីឌុបដឹកឈើរបស់ឧកញ៉ាម្នាក់ រួចដោះលែងវិញនៅក្រុងសែនមនោរម្យ
ខេត្តមណ្ឌលគិរី ៖ សេចក្តីរាយការណ៏បានឲ្យដឹងថា ប៉ូលិសសេដ្ឋកិច្ចក្រសួងមហាផ្ទៃ បានចាប់ឃាត់រថយន្តដឹកឈើសង្ស័យខុសច្បាប់ រយៈពេលប្រមាណ៣ម៉ោង ក៏ដោះលែងវិញ
ខេត្តមណ្ឌលគិរី ៖ សេចក្តីរាយការណ៏បានឲ្យដឹងថា ប៉ូលិសសេដ្ឋកិច្ចក្រសួងមហាផ្ទៃ បានចាប់ឃាត់រថយន្តដឹកឈើសង្ស័យខុសច្បាប់ រយៈពេលប្រមាណ៣ម៉ោង ក៏ដោះលែងវិញ ដោយមិនមានមន្ត្រីជំនាញណាអះអាងថា មានច្បាប់ឬអត់ច្បាប់នោះទេ ។
ប្រភពបានឲ្យដឹងថា ក្បួនរថយន្តយីឌុបចំនួន០៤គ្រឿងដែលប៉ូលិសសេដ្ឋកិច្ចក្រសួងមហាផ្ទៃ ឃាត់ចាប់កាលពីល្ងាចថ្ងៃទី០៦ តុលា ២០១៦ ចំណុចផ្លូវចំណោតអូររមីស ក្នុងភូមិពូតាំង សង្កាត់រម្យនា ក្រុងសែមនោរម្យនោះ គឺរបស់លោកឧកញ៉ា វីដា ដែលបានដឹកឈើចេញពីស្រុកកោះញែក តែមិនដឹងថា ដឹកយកទៅណាឲ្យប្រាកដទេ។
ជាការកត់សម្គាល់ ការដឹកជញ្ជូនឈើចេញពីស្រុកកោះញែក ត្រូវបានគេដឹងថា មានសកម្មភាពប្រមាណ១សប្តាហ៏មកហើយ ខណៈមន្ត្រីជំនាញព្រៃឈើនិយាយថា ឈើទាំងនោះគេមានច្បាប់ត្រឹមត្រូវ។ អ្នកយកព័ត៌មានមិនអាចសុំការបំភ្លឺពីលោកឧកញ៉ា វីដា ឬអ្នកតំណាងរបស់លោកបានទេ នៅរសៀលថ្ងៃទី៧ តុលា។
ចំណែកសមត្ថកិច្ចពាក់ព័ន្ឋនានាក៏មិនអាចសុំការបំភ្លឺបានដែរ ប្រហែលត្រូវដងត្រូវផ្លែអស់ទៅហើយ។ ប្រជាសហគមន៏នៅស្រុកកោះញែកបាននិយាយថា មុនពេលមានសកម្មភាពដឹកឈើតាមរថយន្តយីឌុបរបស់លោកឧកញ៉ា គេបានឃើញក្រុមឈ្មួញជាច្រើនបានសម្រុកដឹកឈើចេញពីព្រៃអភិរក្ស និងព្រៃការពារយកទៅទម្លាក់ក្នុងឃ្លាំមួយកន្លែងដែលហ៊ុំព័ទ្ឋបិទជិតទៅដោយរបងស័ង្កសីពណ័ខៀវ ។ ប្រជាសហគមន៏បានដាក់ការសង្ស័យថា ការដឹកជញ្ជូនឈើតាមរយៈរថយន្តយីឌុបទាំងនោះ អាចមានភាពមិនប្រក្រតី ព្រោះតាំងពីមួយឆ្នាំមុន គេឮតែឧកញ៉ា វីដា ព្យាយាមរត់ការសុំជំនាញនិងសមត្ថកិច្ចជាច្រើនស្ថាប័ន ដើម្បីបានដឹកឈើចេញពីស្រុកកោះញែក តែត្រូវបរាជ័យ ព្រោះមានយុទ្ឋការបង្ក្រាបការរត់ពន្ឋឈើទូទាំងប្រទេស ទើបធ្វើឲ្យដំណើរការដឹកជញ្ជូនឈើរបស់លោកឧកញ៉ាម្នាក់នោះ ត្រូវអាក់ខានរហូតមកដល់ពេលនេះ ទើបឃើញមានការដឹកជញ្ជូនឡើងវិញ ។
មហាជនបានសំណូមពរដល់អាជ្ញាធរខេត្ត ចាត់វិធានការការដឹកជញ្ជូនឈើទាំងនោះផង បើសិនជាឈើទាំងនោះពិតជាបានបង់ពន្ឋចូលរដ្ឋពិតមែន ក៏គួរសាលាខេត្តមណ្ឌលគិរីចេញសេចក្តីជូនដំណឹងដល់ប្រជាពលរដ្ឋឲ្យបានជ្រាប ព្រោះសព្វថ្ងៃប្រព័ន្ឋផ្សព្វផ្សាយមានច្រើនមិនពិបាកនោះទេ ឬមួយថាឈើទាំងនោះពិតជាខុសច្បាប់ដូចគេដាក់ការសង្ស័យមែន?៕
ចែករំលែកព័តមាននេះ