ប្រឡាយរំដោះទឹកមួយខ្សែ ដែលតភ្ជាប់ពីទំនប់សម្តេច ហ៊ុន សែន ក្រវ៉ាត់ផ្សារអ្នកលឿង បុកកាត់ផ្លូវជាតិលេខ១ ( ផ្លូវឡើងស្ពានអ្នកលឿង ) ចាក់ទៅក្នុងទន្លេតូច ស្ថិតក្នុង
ខេត្តព្រៃវែង ៖ ប្រឡាយរំដោះទឹកមួយខ្សែ ដែលតភ្ជាប់ពីទំនប់សម្តេច ហ៊ុន សែន ក្រវ៉ាត់ផ្សារអ្នកលឿង បុកកាត់ផ្លូវជាតិលេខ១ ( ផ្លូវឡើងស្ពានអ្នកលឿង ) ចាក់ទៅក្នុងទន្លេតូច ស្ថិតក្នុងភូមិព្រែករាំង ពេលនេះកំពុងត្រូវបានឯកឧត្តមម្នាក់ចាក់ដីលើកជាទំនប់បិទជិត ធ្វើអោយទឹកជន់លិច ប៉ះពាល់ដល់អ្នកស្រុកជាច្រើនគ្រួសារនៅជុំវិញនោះ។
ពលរដ្ឋនៅភូមិ១ ឃុំព្រែកខ្សាយ(ខ) ស្រុកពាមរក៍ នៅក្បែរទីតាំងដែលគេកំពុងចាក់ដីនោះបានអោយដឹងថា អ្នកដែលចាក់ដីនោះ គឺឯកឧត្តម សៅ រ៉ានី ហើយដីដែលគាត់ចាក់នោះ គឺគាត់ទើបតែទិញបានពីអ្នកស្រុក។ ពលរដ្ឋទាំងនោះបាននិយាយថា ការចាក់ដីលើកទំនប់នោះ ពួកគាត់មិនទោម្នាស់អីទេ ព្រោះជាដីរបស់គេ ប៉ុន្តែគេបានចាក់លុបចូលប្រឡាយខាងជើងជិត2m ហើយចាក់បិទប្រឡាយខាងកើតជិតតែម្តង ជាហេតុធ្វើអោយមានទឹកជន់លិច ប៉ះពាល់ដល់ដីស្រែ និងស្រះត្រីរបស់ពួកគាត់ជាច្រើនគ្រួសារ នៅពេលមានភ្លៀងធ្លាក់ម្តងៗ ហេតុនេះហើយទើបពួកគាត់នាំគ្នាប្តឹងទៅអាជ្ញាធរឃុំ-ស្រុក សុំឲ្យជួយអន្តរាគមន៍ និងដោះស្រាយ ប៉ុន្តែឃើញថា អាជ្ញាធរឃុំ និងស្រុក ចុះទៅហាមឃាត់មិនអោយគេចាក់ដីបានតែប៉ុន្មានថ្ងៃ ក៏ឃើញគេយកគ្រឿងចក្រដឹកដីមកចាក់ដដែល ចំណែកឯខាងអាជ្ញាធរ លែងឃើញទៅឃាត់សង្ស័យ ខ្លាចបុណ្យគេជាឯកឧត្តមហើយមើលទៅ។
ជុំវិញការលើកឡើងនេះ ត្រូវបានឯកឧត្តម សៅ រ៉ានី ប្រាប់អោយដឹងតាមទូរស័ព្ទថា ដីនោះគឺគាត់ជាអ្នកចាក់មែន គឺចាក់លើកទំនប់ធ្វើស្រះចិញ្ចឹមត្រី ហើយការចាក់នោះ គាត់បានដាក់ឯកសារសុំច្បាប់ទៅសាលាខេត្តហើយ។
ពាក់ព័ន្ធរឿងមានអ្នកស្រុកប្តឹងផ្តល់នោះ ឯកឧត្តមបានបញ្ជាក់ថា ការចាក់ដីនោះ គាត់ចាក់តែលើដីដែលគាត់បានទិញប៉ុណ្ណោះ អត់បានចាក់លើដីអ្នកស្រុកណាទេ ហើយក៏មិនបានប៉ះពាល់ដីប្រឡាយអីដែរ ហើយបើចង់ដឹងច្បាស់ សូមសួរទៅខាងមន្ត្រីសុរិយោដីចុះ។
ដោយឡែកលោកស្រី សេង ទៀង អភិបាលស្រុកពាមរក៍ បានអោយដឹងថា ចំពោះការចាក់ដីនោះ ពិតជាមានពលរដ្ឋប្តឹងមែន ហើយលោកស្រីក៏បានបញ្ជាអោយមន្ត្រីចុះទៅឃាត់គ្រឿងចក្រម្តងហើយ ព្រោះការចាក់ប៉ះពាល់ដល់ប្រព័ន្ធផ្លូវទឹក ម្យ៉ាងគឺអត់ទាន់មានច្បាប់។ លោកស្រីអភិបាលស្រុកបានបញ្ជាក់ថា ក្រោយពីត្រូវហាមឃាត់ ឯកឧត្តម សៅ រ៉ានី បានធ្វើលិខិតសុំច្បាប់អនុញ្ញាតិមកសាលាស្រុក តែដោយទំហំការធ្វើធំ លើសពីដែនសមត្ថកិច្ច ស្រុកមិនអាចអនុញ្ញាតិបាន ឯកឧត្តមក៏ដាក់លិខិតស្នើសុំទៅសាលាខេត្តទៀត ហើយមកដល់ពេលនេះ មិនដឹងថាខេត្តចេញលិខិតអនុញ្ញាតិ ហើយឬនៅទេ។
ចំណែកលោក ចាន់ រ៉ាន់ អភិបាលរងខេត្តព្រៃវែង បានអោយដឹងថា ឯកឧត្តម សៅ រ៉ានី ពិតជាបានដាក់លិខិតស្នើសុំមកសាលាខេត្តពិតមែន ប៉ុន្តែឯកឧត្តមអភិបាលខេត្ត មិនទាន់ចេញច្បាប់អនុញ្ញាតិទេ ដោយបានចាត់អោយរូបលោកដឹកនាំមន្ត្រីជំនាញចុះទៅពិនិត្យទីតាំងសិន ប៉ុន្តែពេលនេះលោកមិនទាន់បានចុះទៅទេ គឺចុះទៅនៅអាទិត្យក្រោយនេះ តែបើគេនៅបន្តចាក់ដីទៀត លោកនឹងបញ្ជាអោយអាជ្ញាធរស្រុកចុះទៅឃាត់ភ្លាម ព្រោះមិនទាន់មានច្បាប់ មិនអាចចាក់ដីបានទេ។
ចែករំលែកព័តមាននេះ